‏ 2 Corinthians 1

Seläm

1Bän, Pavli, İisus Hristozun apostolu Allahın istediinä görä, hem kardaş Timofey seläm yollêêrız Allahın klisesinä, ani Korinf kasabasında, barabar Allahın bütün ayoz halkınnan, ani bulunêr Ahaya dolayında.

2Sizä iivergi hem usluluk Allah Bobamızdan hem Saabi İisus Hristozdan.

İilendirän Allah

3Şükür Allaha, bizim Saabi İisus Hristozun Bobasına! Odur yalpak ürekli Boba hem hertürlü kahırda iilendirän Allah,

4Angısı iilendirer bizi herbir zeetlerdä, ki biz dä iilendiräbilelim onnarı, kim bulunêr hertürlü zeetlerdä hep ölä, nicä Allah bizi kendimizi iilendirer.

5Zerä nekadar çok Hristos için acı çekeriz, okadar taa çok iilendirmäk kablederiz Hristozdan.

6Eer kahır çekärseydik, bu sizin iilenmeniz için hem kurtulmanız için. Eer iilendirilirseydik, bu da sizin iilendirilmeniz için, ani açılêr dayanmanızda zeetlerä, angılarını biz dä çekeriz.

7Bizim büük umudumuz var sizdä, zerä bileriz, ani pay alêrsınız bizimnän barabar, nicä zeetlerdä, hep ölä iilenmektä dä.

8Kardaşlar, biz istämeeriz, bilmeyäsiniz, nelär geçirdik Asiyada. Bir büük ük altındaydık, kuvedimizdän dışarı. Ölä ki, umudu aldıydık yaşamaktan.

9Kendimizi duyduk, sansın ölüm döşeendä. Bu oldu, ki umutlanmayalım kendimizä, ama Allaha, Ani ölüleri dirilder.

10O bizi ölä yakın ölümdän kurtardı hem kurtarêr. İnanêrız, ani, eer bizä yardım edärseydiniz duanızlan, O bizi önümüzdä vakıtlarda da kurtaracek,

11ki çok insannar Allaha şükür etsinnär bizim için, zerä çoyunun dualarınnan bizä iivergi verildi.

12Bununnan üüneriz, pak üzlän bunu var nasıl söleyelim, ani biz dünnedä hem maasuz sizin aranızda yaşadık, halizliklän verilip Allaha, diil insan aarifliinä görä, ama Allahın iivergisinä görä.

13Biz yazmêêrız sizä başka bişey, ondan kaarä, ne kendiniz dä okuyêrsınız hem annêêrsınız. Umutlanêrım, bizi dooru annayacenız,

14nicä dä biraz annêêrsınız, ani bizim Saabi İisusun günündä siz bizimnän üünäbilirsiniz, nicä dä biz sizinnän.

Pavlinin gelişi oyalanêr

15Bu üzerä, büük inannan neetlendim ilkin sizä gideyim, ki iki katına iivergi Allahtan edenäsiniz,

16da, sizdän geçip, Makedoniyaya gideyim, sora Makedoniyadan geeri döneyim sizä, ki siz beni geçiräbiläsiniz İudeyaya.

17Bölä düşünüp, ne kararsız mı davrandım acaba? Yada dünneycesinä mi işleerim, deyip hem «olur», hem «olmaz»?

18Allah inançtır; O şaat bana, ani ne söledik sizä, diil hem «olur», hem «olmaz».

19Zerä Allahın Oolu İisus Hristos, Kimin için biz – bän, Siluan hem Timofey – nasaat ettik, olmadı hem «olur», hem «olmaz», ama Onda salt «olur».

20Zerä hepsi Allahın adamakları Onda «olur». Onuştan biz deeriz Onun adınnan «Amin», Allah metinnensin.

21O, Kim kaavileer bizi barabar sizinnän Hristozda hem yaalêêr bizi, O Allahtır,

22Angısı bizi mühürledi hem pey verdi Ayoz Duhu bizim üreklerimizä.

23Şaat alêrım bana Allahı, ani şindiyä kadar gelmedim Korinf kasabasına, çünkü canım acıyêr sizä.

24Diil, ani isteeriz çorbacı olalım sizin inanınıza, ama sizinnän işleeriz sevinmeniz için, çünkü siz inanda kaavi durêrsınız.