2Cor 10 | GagNTL | STEP | Bän, Pavli, ani usluyum aranızda, ama kıyakım sizdän uzak olarak, yalvarêrım İisus Hristozun münüzlüünnän hem yalpaklıınnan

‏ 2 Corinthians 10

Pavli doorulêêr izmetçiliini

1 Bän, Pavli, ani usluyum aranızda, ama kıyakım sizdän uzak olarak, yalvarêrım İisus Hristozun münüzlüünnän hem yalpaklıınnan

2 hem isteerim, ki açan gelecäm, lääzım olmasın, ki kıyak olayım bir kıyışmaklan hem girginniklän, ne düşünerim göstermää onnara, kim sayêr, ani biz yaşêêrız tenä görä.

3 Zerä, makar ki biz tencä yaşêêrız, tencä düüşmeeriz.

4 Bizim düüşümüzün silähları diil tencä, ama onnarda var Allahtan kuvet, kaleleri yıksınnar deyni.

5 Biz yıkêrız boş fikirleri hem hepsini, ani şişkinniklän kalkêr da durgudêr insanı Allahı tanımaktan. Herbir düşünmekleri esir alêrız, ki Hristozu seslesinnär.

6 Hazırız cezalamaa herbir seslämezlii, açan sizin seslemeniz taman olacek.

7 Bakın önünüzä. Kim inanêr, ani kendisi Hristozun, o düşünsün, nicä o Hristozun, ölä biz dä Hristozunuz.

8 Eer bän zeedä üünärseydim bizim kuvetlän, ne Saabi verdi bizä, sizi kaaviletmäk için, ama diil yıkmak için, kalmayacam utanmış.

9 Bunu deerim, ki sanmayasınız, ani bän sizi kiyatlarımnan korkudêrım.

10 Zerä deerlär: «Onun kiyatları keskin hem kaavi, ama kendisi bizdeykän, güüdesi yufka, lafı da kaba».

11 Kim bölä lafeder, ko annasın, ani, ne deeriz sizä kiyatlarımızda, uzakta bulunarkan, hep onu yapacez, aranızda bulunarkan.

12 Dooru, ani biz kıyışmêêrız benzemää eki konmaa onnarlan, kim kendini meteder. Onnar kendilerini benzederlär hem ölçerlär kendi ölçülerinnän. Aarif olan bölä yapmaz.

13 Ama biz zeedesinnän üünmeyecez. Üünmemiz o ölçüdä kalêr, ani Allah verdi bizä, ki, nasaat ederäk, etişelim sizä kadar.

14 Biz zorlamêêrız kendimizi, sansın sizä etişmedik. Zerä ilkin biz sizä etiştik Hristozun İi Haberinnän.

15 Biz üünmeeriz ölçüdän dışarı başkaların işlerinnän, ama umutlanêrız, ani sizin inanınız büüdükçä, aranızda işlemäk kırlarımız zeedeliklän genişlenecek,

16 ölä ki nasaat edäbileriz İi Haberi sizdän taa ötää. Zerä istämeeriz üünelim işlärlän, ani yapıldı başka bir adamın alanında.

17 «Kim üüner, üünsün Saabiylän».

18 Zerä diil o, kim kendini meteder, beenilecek, ama kimi Saabi meteder.