‏ 2 Corinthians 2

1Ölä ki, bän kararladım kendi-kendimä, ki geldiynän, sizi enidän gücendirmeyim.

2Eer bän sizi gücendirärseydim, kim beni şennendirecek, sizdän kaarä, kimi gücendirdim?

3Hep bunu yazdım sizä, ki, geldiynän, beni gücendirmesin, kim düşer sevindirsin. Zerä çok inanêrım, ani benim sevinmäm hepsinizi dä sevindirer.

4Büük kahırlan hem ürek acısınnan yazdım sizä, çok yaş ta döktüm, diil ani gücenäsiniz, ama annayasınız, nekadar çok severim sizi.

Afetmäk günahkerä

5Eer birkimsey gücendirdiseydi, gücendirmedi salt beni, ama biraz, istämeerim zeedelemää, sizi hepsinizi.

6Bu adama etär ceza, ani çoyunuz verdi.

7Ölä ki, şindi zeedä cezalamayın onu, ama afedin hem iilendirin, ki zeedesinnän kahırlanmasın.

8Onuştan yalvarêrım sizä, enidän gösterin ona sevgi.

9Bunun için yazdım, ki deneyim sizi da göreyim, aslı mı, ani beni herzaman sesleersiniz?

10Kimi siz afedersiniz, onu bän dä afederim. Eer afettiseydim birkimseyi bişey için, afettim sizin için Hristozun önündä,

11ki yapmasın bir türlü keder bizä şeytan. Zerä biz habersiz diiliz onun neetlerindän.

Apostolun izmetçilii

12Gelip Troada kasabasına İi Haberlän Hristos için, makar ki Saabinin izmeti için bana kapu açıldı,

13hep okadar duhça uslanamadım, zerä bulamadım orada benim kardaşımı, Titı. Onuştan, deyip «kal saalıcaklan» onnara, gittim Makedoniyaya.

14Ama şükür Allaha, Kim herzaman gezdirer bizi Hristozun ensemäk paradında hem bizimnän hererdä daadêr gözäl kokuyu, ne geler Onu tanımaktan.

15Zerä biz Hristozun ii kokuluu Allah için, hem onnarın arasında, kim kurtulmak yolunda, hem onnarın arasında, kim kayıplık yolunda.

16Kimisi için ölüm getirän ölüm kokusuyuz, ama başkası için yaşamak getirän yaşamak kokusuyuz. Kim annar bunnarı acaba?

17Zerä biz çoyu gibi bozmêêrız Allahın sözünü, ki bezirgennik yapalım, ama nasaat ederiz Allahın önündä bir temiz ürektän, nicä onnar, kim Allahtan yollanmış hem Hristoza inanêr.