‏ 2 Timothy 4

1Eminneerim seni Allahın hem Saabi İisus Hristozun önündä, Angısı daava kesecek dirilerä hem ölülerä, zerä O, gelip, padişahlık edecek.

2Allahın sözünü haberlä, herzaman çalış bu iştä, ii vakıtta hem zor vakıtta. İnandır, takazala, üreklendir, üürederäk bütün saburluklan.

3Zerä vakıt gelecek, açan saa üüretmeklerä dayanamayaceklar, ama yannarına toplayaceklar üüredicileri kendi istediklerinä görä, ki nazlandırsınnar onnarı.

4Kulaklarını tıkayaceklar, ki seslämesinnär aslılıı, yoldan saparak, masallara davranaceklar.

5Ama sän herbir iş üzerä kuşku ol, zeetlerä dayan, İi Haberi nasaat et, izmetçiliini tamanna.

6Zerä şindän sora benim kanım dökülecek, nicä şarap kurbanın üstünä, benim için geçinmäk vakıdı yaklaştı.

7İi savaşta düüştüm, yarışı bitirdim, inanı korudum.

8Şindän sora bana hazır durêr dooruluk feneţi, ani Saabi, Dooru Daavacı, o Gündä verecek bana, diil sade bana, ama hepsinä, kim özlemäklän bekleer Onun gelmesini.

Pavlinin kendi istemekleri hem selämneri

9Nekadar tez çalış bana gelmää.

10Zerä Dimas beni braktı, çünkü taa çok sevdi bu dünneyi da gitti Salonik kasabasına. Kriskis gitti Galatiyaya, Tit – Dalmatiyaya.

11Salt bir Luka kaldı benimnän. Al Markı da getir seninnän, zerä o bana yardımcı olar izmettä.

12Bän Tihiki yolladım Efes kasabasına.

13Açan gelecän, getir yaamurluu, ani braktım Troada kasabasında Karpın evindä. Getir kiyatları, ayırı, pergamentleri ▼

▼Pergament – yazmak için deridän kiyat.

.

14Bakırcı Aleksandru çok fenalık bana yaptı. Saabi ödesin onun işlerinä görä!

15Sän dä sakın ondan, zerä çok karşı durdu bizim sözlerimizä.

16İlk korunmak lafımda kimsey benim tarafımda kalmadı, hepsi beni braktı. Bunun için onnardan esap sorulmasın!

17Ama Saabi benim yanımdaydı, O beni kaaviledi, ki nasaat işi tamannansın benim aazımnan, da hepsi milletlär onu işitsinnär. Bölä aslanın aazından kurtuldum.

18Saabi beni hertürlü kötülüktän kurtaracek da Kendi Gökteki Padişahlıı için koruyacek. Ona metinnik diveçtän divecä! Amin.

19Seläm ver Priskillaya hem Akilaya hem Onisiforun evdekilerinä.

20Erast kaldı Korinf kasabasında. Trofimi hasta braktım Milit kasabasında.

21Çalış kıştan öncä bana gelmää. Seläm sana verer Evvul, Pudens, Lin, Klavdiya hem hepsi kardaşlar.

22Saabi /İisus Hristos/ olsun senin duhunnan. Sizinnän iivergi olsun. /Amin./