Act 19 | GagNTL | STEP | Açan Apollos Korinf kasabasındaydı, Pavli geçti iç dolaylardan da geldi Efes kasabasına. Orada buldu birkaç üürenici.

‏ Acts 19

Efes kasabasında

1 Açan Apollos Korinf kasabasındaydı, Pavli geçti iç dolaylardan da geldi Efes kasabasına. Orada buldu birkaç üürenici.

2 O sordu onnara: «Kablettiniz mi Ayoz Duhu, açan inandınız?» Onnar cuvap ettilär: «Biz hiç işitmedik Ayoz Duh için».

3 Ozaman sordu: «E ne vaatizliklän vaatiz oldunuz?» Onnar cuvap ettilär: «İoanın vaatizliinnän».

4 Pavli dedi: «İoan vaatiz edärdi onnarı, kim dönärdi günahlarından Allaha. O sölärdi insana, inansınnar ondan sora Gelenä, Ona, Kimä dener İisus».

5 İşidip bunu, vaatiz oldular Saabi İisusun adına.

6 Açan Pavli koydu ellerini onnarın üstünä, indi Ayoz Duh, da onnar başladılar başka dillerdä lafetmää hem prorokluk etmää.

7 Onnar hepsi bir oniki adamdı.

8 Sora girdi sinagoga içinä da üç ay insana korkusuz annadardı hem inandırardı Allahın Padişahlıını.

9 Ama çünkü bir boyu çetinnettilär üreklerini da inanmadılar, fena lafederäk insanın önündä Allahın yolunu, Pavli braktı onnarı, ayırdı kendi üürenicilerini da her gün lafedärdi Tiranın salonunda.

10 Bölä tuttu iki yıla kadar. Ölä hepsi Asiyada, hem iudeylär, hem urumnar, işittilär Allahın sözünü.

11 Allah yaptı görülmemiş kudretli işlär Pavlinin ellerinnän.

12 Ona kadar, ani basmalar yada parçalar, neyä diimişti o, açan götürülüp koyulurdu hastalara, onnar alışardı hastalıktan hem fena duhlardan kurtulurdu.

13 Kimisi iudey büücülerdän, ani erdän erä gezärdilär, baktılar faydalanmaa Saabi İisusun adınnan, ki alıştırsınnar, kimdä vardı fena duh, deyeräk: «Emir ederim sizä İisusun adınnan, Angısını Pavli haberleer, dışarı çıkasınız».

14 Bunu yapardı Skeva adlı bir iudey büük popazın edi oolu.

15 Ama fena duh cuvap etti: «İisusu tanıyêrım, Pavliyi da bilerim, ama siz kimsiniz?»

16 O adam, kimdä vardı fena duh, atıldı onnarın üstünä da hepsini, üsteleyip, ölä ensedi, ani onnar çıplak hem yaralı kaçtılar o evdän.

17 Bu oluş için haber etişti hepsi iudeylerä hem urumnara, angıları yaşardılar Efes kasabasında. Bir korku hepsini aldı, da Saabi İisusun adı büük bir saygı kazandı.

18 Çoyu onnardan, kim inandı, gelärdilär, şaatlık edip, açardılar kendi kötü yaptıklarını.

19 Çoyu onnardan, kim büücülük edärdi, getirdilär kiyatlarını da yaktılar hepsinin önündä. Açan sayıldı kiyatların paası, çıktı elli bin gümüş.

20 Bölä kuvetlän Allahın sözü daalardı hem kaavilenärdi.

Kalkınmak Efes kasabasında

21 Açan bu işlär oldu, Pavli kararladı, Makedoniya hem Ahaya erlerindän geçip, İerusalimä gitsin. O dedi: «İerusalimdän sora Roma kasabasını da göreyim giderim».

22 Onun yardımcılarından ikisini yolladı Makedoniyaya, Timofeyi hem Erastı, ama kendisi kaldı bir parça vakıt Asiyada.

23 O vakıt oldu bir büük kalkınmak Saabinin yoluna karşı.

24 Bir gümüş ustası, adı Dimitri, yapardı gümüştän Artemida ^{▼▼Artemida – urumnarın büük allahkası. Latincä adı Diana. Onun en büük ayoz binası Efes kasabasındaydı.} ayoz binanın maketlerini, zanaatçıları bu iştän çok para kazandırardı.

25 O topladı zanaatçıları hem hepsini, kim yapardı buna benzär işlär, da dedi onnara: «Arkadaşlar, bilersiniz, ani bizim zanaat kazanç bizä getirer,

26 ama görersiniz hem işidersiniz, ani Pavli, diil sade Efes kasabasında, ama yakın bütün Asiyada çok insanı inandırıp-saptırdı, deyip, ani adam elinnän yapılı allahlar – diil hakına allahlar.

27 Diil sade, ani bizim zanaat saygısı düşer, ama büük allahın, Artemidanın, ayoz binası da artık hiç bişey sayılmayacek. Onun büüklüü, angısını ikramnêêr bütün Asiya hem dünnä, yok olacek».

28 Bunu sesleyennär üfkeylän doldular da başladılar baarmaa: «Büüktür Efesli Artemida!»

29 Bütün kasaba karıştı. İnsan tuttu makedoniyalıları, Gayı hem Aristarhı, Pavlinin yoldaşlarını da birliktä üüştülär teatru içinä.

30 Pavli baktı çıksın insan karşısına, ama üürenicilär kolvermedilär.

31 Asiyanın öndercilerindän, kim Pavliylän dosttu, haber yolladılar, yalvarıp gösterilmesin teatruda.

32 Kimisi baarardı bir türlü, başkası – başka türlü. Zerä toplantı bir alak-bulaktı, çoyu hiç bilmärdi, neçin toplandılar.

33 Açan iudeylär karşıya çıkardılar Aleksandruyu, kimisi insandan sandılar, ani onun bu iştä var karışmalıı. Aleksandru elinnän nışan yaptı, ki isteer korunmak için lafetmää.

34 Ama annayıp, ani o iudeylerdän, hepsi bir seslän yakın iki saat baardılar: «Büüktür Efesli Artemida!»

35 Kasabanın sekretarı uslandırdı insanı da dedi: «Efeslilär! Acaba kim bilmeer, ani Efes kasabası büük Artemidanın ayoz binanın koruyucusu hem onun taşının, ani göktän düştü?

36 Çünkü bunnarı kimsey inkär edämäz, lääzım uslanasınız da yapmayasınız bişey düşünmedään.

37 Siz getirdiniz bu adamnarı, kim ne ayoz binayı soydu, ne dä allahımızı kötüledi.

38 Ama Dimitrinin hem onun zanaat arkadaşlarının varsa daavaları birkimseyä karşı, bunun için var daava hem prokonsullar ^{▼▼Prokonsullar – kullanıcılar, daavacılar.}. Orada aalaşsınnar biri-birinä.

39 Ama eer sizdä varsa başka bir neet, ozaman bu kararlanacek zakona görä toplanmakta.

40 Büün kabaatlı olabiliriz bir kalkınmak için. Zerä yok bir dä sebep, ki gösteräbilelim, neçin bu karışmalık oldu».

41 Bu laflardan sora topluşu kolverdi.