Act 13 | GagNTL | STEP | Antiohiyada, oradakı klisedä vardı kimi proroklar hem üüredicilär: Varnava; Simon, angısına denilärdi Niger; Luţiy, Kirinä kasabasından; Manain, angısı büüdü İrod beylän barabar; hem Saul.

‏ Acts 13

Varnava hem Saul yollanêrlar nasaat etmää

1 Antiohiyada, oradakı klisedä vardı kimi proroklar hem üüredicilär: Varnava; Simon, angısına denilärdi Niger; Luţiy, Kirinä kasabasından; Manain, angısı büüdü İrod beylän barabar; hem Saul.

2 Açan izmet edärdilär Saabiyä hem oruç tutardılar, Ayoz Duh dedi: «Ayırın Bana Varnavayı hem Saulu o işä, ani Bän çaardım onnarı».

3 Oruçtan hem duadan sora koydular ellerini onnarın üstünä da kolverdilär onnarı.

Saul hem Varnava Kipruda

4 Varnava hem Saul, yollanmış Ayoz Duhtan, geldilär Selevkiyä kasabasına. Oradan geçtilär gemiylän Kipru adasına.

5 Etiştiynän Salamin kasabasına, haberledilär Allahın sözünü iudey sinagogalarında. İoanı almıştılar yardımcı kendilerinä.

6 Bütün adayı aykırladılar Paf kasabasına kadar. Orada uuradılar bir iudey büücüsü, bir yalancı prorok üstünä. Onun adı Variisus.

7 O prokonsul ^{▼▼Prokonsul – kullanıcı.} Sergiy Pavlinin, akıllı bir adamın, çevresindeydi. Prokonsul çaardı Varnavayı hem Saulu, zerä istärdi işitsin Allahın sözünü.

8 Ama Variisus, angısının öbür adı – Elima, «büücü» maanasında, karşı durardı onnara, da bakardı saptırsın prokonsulu inandan.

9 Ozaman Saul, ani adı Pavli, dolu Ayoz Duhlan, baktı uz onun gözlerinä da dedi:

10 «Adam, dolu hertürlü şalvirliklän hem kötülüklän, diavolun oolu, duşman herbir doorulaa! Durgunmayacan mı sän yalan sölemää Allahın düz yolu için?

11 Şindi Saabinin eli sana karşı. Sän köör olacan da görmeyecän gün şafkını bir parça vakıt». Birdän bir duman, bir karannık çöktü Elimanın üstünä, da o, dönüp ötää-buyanı, aarardı insannarı, götürsün onu elindän.

12 Açan prokonsul gördü, ne oldu, çok şaştı Saabinin üüretmesinä da inandı.

Pergä hem Pisidiya Antiohiya kasabalarında

13 Pavli hem kafadarları yollandılar gemiylän Paftan da gittilär Pergä kasabasına, ani Pamfiliya erindä. İoan sa ayırıldı onnardan da döndü geeri İerusalimä.

14 Onnar Pergedän çıktılar da, erdän erä gezeräk, gittilär Pisidiya Antiohiya kasabasına. Cumertesi günü girdilär sinagoga içinä da oturdular.

15 Açan okunurdu Zakon hem prorokların yazılarından, sinagoganın öndercileri yolladılar, ki sorsunnar onnara: «Kardaşlar, eer varsaydı bir nasaadınız insana, söleyin».

16 Pavli kalktı, yaptı nışan elinnän da dedi: «İzrailin adamnarı hem Allahtan korkannar, sesleyin!

17 Bu halkın, İzrailin, Allahı bizim bobalarımızı ayırdı da büük bir millet yaptı, açan Mısırda yaşardılar. Sora Kendi kaavi elinnän oradan onnarı çıkardı.

18 Kırk yıla yakın doyurdu onnarı çol erdä.

19 Edi millet yok etti Hanaan memleketindä, erlerini payetti, verip onnara.

20 Ondan sora, bir dörtüz elli yıl yollardı onnara izmetkerlerini prorok Samuilin vakıdına kadar.

21 Sora onnar istedilär padişah. Allah verdi onnara Saulu, Kisin oolunu, Veniaminin tamızlıından. O kırk yıl padişahlık etti.

22 Ondan sora Allah kaldırdı onnara padişah Davidi, angısı için şaatlık etti, deyip: „Buldum bir adam kendi üreemä görä, İesseyin oolunu, Davidi, angısı yapacek hepsini, ne Bän isteerim“.

23 Davidin senselesindän Allah adamasına görä kaldırdı İzrail insanına bir Kurtarıcı – İisusu.

24 Onun gelmesinin önü sora İoan nasaat etti hepsi İzrail insanına, ani lääzım dönsünnär günahlarından Allaha da vaatiz olsunnar.

25 İoan kendi izmetçiliinin bitkisindä dedi: „Kimim, siz sanêrsınız beni? Bän diilim Hristos, ama bendän sora geler Birisi, Angısının bän diilim yakışıklı çözmää ayak kaplarını“.

26 Kardaşlar, Avraamın senselesindän gelennär hem Allahtan korkannar, bizä ^{▼▼Bizä: kimi tekstlerdä «sizä».} yollanıldı haber bu kurtulmak için.

27 Zerä İerusalimdä yaşayannar hem onnarın öndercileri İisusu tanımadılar, daava kestilär Ona da bölä tamannadılar prorokların sözlerini, ani her cumertesi okunêr.

28 Bulamadılar ölüm için bir da kabaat Onda, ama hep okadar istedilär, ki Pilat cezalasın Onu ölümnän.

29 Açan tamannadılar hepsini, ne yazılıydı Onun için, indirdilär Onu stavrozdan da koydular mezar içinä.

30 Ama Allah diriltti Onu ölüdän.

31 O çok vakıt gösterildi onnara, kim Onunnan barabar Galileyadan İerusalimä geldiydilär, ani büün Onun şaatları insanın önündä.

32 Biz haberleeriz sizä İi Haberi, ne adanmıştı Allahtan bobalarımıza.

33 O tamannadı bu adamasını bizä, Kendi uşaklarına, açan kaldırdı İisusu. Nicä var yazılı ikinci Psalmada: „Sän Benim Oolumsun, büün Senin boban oldum“.

34 Allah diriltti Onu ölüdän, ölä ki Onun güüdesi hiç bir vakıt çürümeyecek, da bunun için bölä dedi: „Bän bir inanç sevgiylän davranacam Sana, nicä adadım Davidä“.

35 Onuştan başka bir Psalmada deer: „İzin vermeyecän, ki Senin Ayozunun güüdesi çürüsün“.

36 David, izmet edip kendi vakıdında insana Allahın ii istediinä görä, geçindi, sora gömüldü kendi bobaların yanında, da güüdesi çürüdü.

37 Ama Onu, Kimi Allah diriltti, Onun güüdesi çürümedi.

38 Ölä ki, biläsiniz, kardaşlar, ki salt Ona verileräk sizä haberlener, ani var nicä günahlarınız afedilsin,

39 da paklanasınız hepsindän, nedän paklamadı Moiseyin Zakonu.

40 Onuştan bakın, gelmesin başınıza, ne sölenmiş proroklardan:

41 „Bakın siz, gülmää alannar, şaşın hem yok olun, zerä yapêrım Bän ölä iş sizin vakıtta, ani hiç inanmayaceydınız, eer birkimsey söleseydi sizä“».

42 Onnar sinagogadan çıktıynan dışarı, insan yalvarardı, ki gelän cumertesinä dä lafetsinnär hep bu işlär için.

43 Açan toplantı daalıştı, çok iudey hem dinni yabancılar, kim dönmüştü iudey dininä, gittilär Pavlinin hem Varnavanın ardına, angıları durdular lafa onnarlan da bakardılar inandırmaa onnarı, ki ileri dooru verilsinnär Allahın iivergisinä.

44 Gelän cumertesi yakın bütün kasaba insanı toplandı seslemää Saabinin sözünü.

45 İudeylär, görüp kalabalıı, kıskandılar. Karşı lafettilär Pavlinin sözlerinä hem kötüledilär onu.

46 Ama Pavli hem Varnava girgin dedilär: «İlkin sizä lääzımdı sölensin Allahın sözü, ama çünkü siz onu ret edersiniz da istämeersiniz kabletmää diveç yaşamak, onuştan biz döneriz başka milletlerä.

47 Zerä bölä sımarladı bizä Saabi: „Koydum seni şafk edäsin milletlerä da kurtulmayı götüräsin erin kenarınadan“».

48 İudey olmayannar, açan işittilär bunu, sevindilär hem metinnedilär Saabinin sözünü, da hepsi, kim sıralanmıştı diveç yaşamak için, inandılar.

49 Saabinin sözü bütün memlekettä daaldı.

50 Ama iudeylär debreştirdilär dinni karıları, anılmışları kasabada, hem kasabanın öndercilerini. Başladılar koolamaa Pavliyi hem Varnavayı da uurattılar onnarı kendi erlerindän.

51 Pavli hem Varnava silktilär tozları ayaklarından, onnara azar gibi, da gittilär İkoniya kasabasına.

52 Bu vakıt üürenicilär sevinmeliklän hem Ayoz Duhlan doluydular.