‏ Acts 14

İkoniyada

1İkoniya kasabasında hep butürlü oldu. Pavli hem Varnava girdilär iudey sinagogasına da lafettilär ölä, ani inandı çok insan iudeylerdän hem urumnardan.

2Ama o iudeylär, angıları inanmadılar, debreştirdilär tayfännarı da çevirdilär onnarın üreklerini kardaşlara karşı.

3Hep okadar çok vakıt kalıp orada, lafettilär kıyışmaklan Saabi için, Angısı inandırırdı sözü Kendi iivergisi için da verirdi kuvet, onnarın ellerinnän yapılsın meraklı nışannar hem şaşmaklı işlär.

4İnsan kasaba içindä bölündü. Kimisi iudeylerin, kimisi apostolların tarafındaydı.

5Tayfännar hem iudeylär zaabitlerinnän bilä neetlendilär zeetlesinnär da öldürsünnär taşlan apostolları.

6Apostollar annadılar bunu da kaçtılar Likaoniya, Listra hem Derviya kasabalarına hem dolay erlerinä.

7Bu erlerdä onnar annattılar İi Haberi.

Listrada hem Derviyada

8Listra kasabasında vardı bir adam, sakat ayaklarından. O duumaktan hiç gezmemişti.

9O, oturup erdä, seslärdi, ne söleer Pavli. Pavli baktı uz onun gözlerinä, gördü, ani onda var inan saa olmaa deyni,

10da büük bir seslän ona dedi: «Sana deerim, Saabi İisus Hristozun adınnan, kalk ayakça!» O adam çabuk kalktı ayakça da başladı gezmää.

11İnsannar, görüp, ne yaptı Pavli, kaldırdılar bir büük ses da Likaon dilindä dedilär: «Allahlar indilär aramıza adama benzär!»

12Varnavaya ad koydular Zevs, ama Pavliyä Ermis, zerä bu lafetmeklerdä kullanıcıydı.

13Zevsin ayoz binası bulunardı kasabanın hemen dışında. Zevsin popazı getirdi ayoz bina tokatlarına öküzleri hem feneţleri, isteyip insannan barabar kurban getirsin.

14Ama apostollar, Varnava hem Pavli, işidip bunu, yırttılar kendi rubalarını korkudan, hızlandılar insan içinä da baardılar:

15«Adamnar, neçin bunu yapêrsınız? Biz sizin gibi insanız. Biz sizä ii haber getireriz, ki dönäsiniz boşuna işlerdän diri Allaha, Ona, Kim yarattı gökü, eri, denizi hem hepsini, ne var onnarda.

16Allah evelki vakıtlarda braktı, hepsi milletlär gitsinnär kendi yollarında.

17Ama hiç durgunmadı şaatlık vermää kendisi için, zerä yaptı iilik, verdi yaamur göktän hem bereket, bolluktan imäk verdi hem sevindirdi üreklerinizi».

18Bu laflarlan bilä hemen-hemen durgudabildilär insanı kurban getirmektän onnara.

19Antiohiya hem İkoniya kasabalarından geldi birkaç iudey da, insanı kendi taraflarına çekip, düüdülär Pavliyi taşlan, sora sanarak, ani öldü, sürüdülär kasabadan dışarı.

20Ama Pavlinin üürenicileri toplandılar dolayına, da o, kalkıp, girdi kasaba içinä. İkinci günü Varnavaylan gittilär Derviya kasabasına.

21Annattılar İi Haberi bu kasabada da edendilär çok üürenici.

Antiohiya kasabasına dönüş

Sora döndülär geeri Listra, İkoniya hem Antiohiya kasabalarına.

22Üürenicileri duhça kaaviledilär hem üreklendirdilär, ki inanda kalsınnar. Dedilär, ani lääzım çok acılardan geçelim, ki Allahın Padişahlıına giräbilelim.

23Herbir klisedä ayırdılar presviterleri, dua edip hem oruç tutup, verdilär onnarı Saabinin elinä, Angısına inandılar.

24Ondan sora geçtilär Pisidiyadan da etiştilär Pamfiliya erinä.

25Haberledilär Saabinin sözünü Pergä kasabasında, sora gittilär Attaliya kasabasına.

26Oradan gemiylän üzdülär Antiohiya kasabasına, neredä baştan verilmiştilär Allahın iivergisinä o iş için, ne şindi tamannadılar.

27Etişip orayı, topladılar kliseyi da annattılar hepsini, ne Allah yaptı onnarlan hem nicä açtı başka milletlerä inan kapusunu.

28Orada kaldılar üürenicilärlän çok vakıt.