Act 20 | GagNTL | STEP | Karışmalık uslanmasından sora Pavli topladı üürenicilerini, girginnetti onnarı, sora söledi onnara «kalın saalıcaklan» da yollandı yola, Makedoniyaya gitmää.

‏ Acts 20

Pavli Makedoniyada

1 Karışmalık uslanmasından sora Pavli topladı üürenicilerini, girginnetti onnarı, sora söledi onnara «kalın saalıcaklan» da yollandı yola, Makedoniyaya gitmää.

2 Geçip oralardan, çok lafetti inancılarlan da onnarı üreklendirdi. Sonda etişti Ellada erlerinä.

3 Orada üç ay kaldıktan sora Pavli istedi gemiylän gitsin Siriyaya, ama iudeylär kötü neet kurdular ona karşı. Onuştan kararladı dönsün geeri Makedoniyadan.

4 Ona yoldaş oldular /Asiyaya kadar/: veriyalı Sopater, Pirin oolu; Aristarh hem Sekund, Salonik kasabasından; derviyalı Gay; Timofey; Tihik hem Trofim Asiyadan.

5 Onnar öncä gittilär da beklärdilär bizi Troada kasabasında.

6 Hamursuz yortuyu geçirdiynän, biz üzdük gemiylän Filip kasabasından. Beş gündän sora etiştik onnarı Troada kasabasında, neredä kaldık edi gün.

Evtih

7 Haftanın ilk günü ^{▼▼Haftanın ilk günü – pazar günü.}, açan topluyduk ekmek kırmak için, Pavli, angısı ertesi günü lääzımdı gitsin, nasaat etti üürenicilerä da uzattı lafını gecä yarısınadan.

8 O yukarkı odada, neredä biz topluyduk, çok şafk yanardı.

9 Bir delikannı, adı Evtih, oturardı pençeredä. Pavlinin uzun nasaatında Evtih uyuyar kaldı da, ensenmiş uykudan, düştü üçüncü kattan erä. Onu kaldırdılar ölü.

10 Pavli aşaa indi, kapandı üstünä, sora, alıp onu kucak, dedi: «Kahırlanmayın, o diri».

11 Pavli enidän pindi geeri içeri, kırdı ekmää da idi. O lafetti aydınnanınca, sora gitti kendi yoluna.

12 Bu genç olanı getirdilär içeri diri da bu oluş için çok girginnendilär.

Troadadan Militä yolculuk

13 Biz Pavlidän ileri gittik gemiyä da üzdük As kasabasına. Oradan Pavliyi almaa düşünürdük, zerä o bölä sımarladı. Kendisi düşünürdü orayı kadar yayan gitmää.

14 Açan buluştu bizimnän As kasabasında, aldık onu da gemiyä da gittik Mitilini kasabasına.

15 Oradan gemiylän üzdük. İkinci günü geldik Hios adanın karşısına. Ertesi günü etiştik Samos adaya, /durgunduk Trogilliya kasabasında,/ bir gündän sora gittik Milit kasabasına.

16 Pavli kararlamıştı geçmää Efes kasabasının yanından, ki oyalanmasın Asiyada, zerä o alatlardı, kolaya görä bulunsun İerusalimdä Ellinci yortusunda.

Pavli deer «kalın saalıcaklan» Efestän presviterlerä

17 Pavli Milittän yolladı haber Efes kasabasına da çaarttı klisenin presviterlerini.

18 Açan yanına geldilär, Pavli onnara dedi: «Siz bilersiniz, nicä herzaman sizinnändim ilk gündän, ayak bastıım zaman Asiyaya.

19 İzmet ettim Saabiyä bütün yavaşlıklan hem yaşlarlan, koymayarak esaba zorlukları, ani başıma geldi iudeylerin kötü neetleri beterinä.

20 Bilersiniz, ani bişey sizdän saklamadım, ne ani sizin için faydalıdır. Sakınmadım haberleyim hem üüredeyim sizi insan önündä hem evlerinizdä.

21 Çaardım hem iudeyleri, hem urumnarı, dönsünnär günahlarından Allaha da inansınnar Saabimiz İisusa.

22 Şindi bän, Ayoz Duhtan çekilmiş, giderim İerusalimä. Bilmeerim, ne orada benimnän olacek.

23 Sade herbir kasabada Ayoz Duh bana haberleer, ki orada beni sincirlär hem zeetlär bekleer.

24 Ama bän bişeyä bakmêêrım, yaşamamı da paaya koymêêrım. İsteerim salt sevinmäklän yolumu hem izmetçiliimi başa çıkarayım, ani kablettim Saabi İisustan, da şaatlık edeyim İi Haberi Allahın iivergisi için.

25 Ama şindi bilerim, ani artık hiç biriniz bilä benim üzümü görmeyecek, kiminnän gezdim hem nasaat ettim Allahın Padişahlıını.

26 Büün şaatlık ederim sizä, ne dä olursa sizin kanınızdan bän pakım.

27 Zerä sakınmadım haberleyim sizä Allahın bütün istediini.

28 Esap alın kendi-kendinizä hem bütün sürüyä, kimin üstünä Allah koydu sizi güdücü, ki güdäsiniz Saabinin /hem Allahın/ klisesini, angısını kazandı Kendi kanınnan.

29 Bilerim, ani benim gitmemdän sora sizin aranıza paralayıcı yabanılar girecek, angıları acımayacek sürüyü.

30 Sizin dä aranızdan kalkacek ölä adamnar, angıları tersinä lafedeceklär, ki üürenicileri kendi tarafına çeksinnär.

31 Onun için, kuşku olun hem unutmayın, ani bän üç yıl gecä-gündüz yaşlar gözlerimdä durmamayca herkezinizi üürettim.

32 Ama şindi vererim sizi, kardaşlar, Allahın elinä hem Onun hayırlı sözünä, ani var nasıl sizi kaavilesin da miraslık versin bütün ayoz halkınnan.

33 Tamahlanmadım kimseyin gümüşünä, altınına yada rubasına.

34 Kendiniz bilersiniz, ani bu ellerim izmet etti kendi lääzımnıklarıma hem onnara, kim benimnän barabardı.

35 Herbir üzerä sizä gösterdim, ani, butürlü işleyip, lääzım yardım edelim yufka olannara da unutmayalım Saabi İisusun sözlerini, zerä O Kendisi dedi: „Taa mutlu vermää, nekadar almaa“».

36 Bölä lafettiktän sora Pavli diz çöktü da hepsinnän barabar dua etti.

37 Hepsi çok aaladı da, sarmaşıp Pavlinin boynusuna, öptülär onu.

38 Kahırlandılar taa pek laflarından, ani dedi, ki artık görmeyeceklär onun üzünü. Sora geçirdilär onu gemiyä kadar.