‏ Colossians 4

1Siz, çorbacılar, verin ne düşer çıraklara, da hepsini birtürlü sayın, bileräk, ani sizin dä var Çorbacınız göktä.

Hertürlü nasaatlar

2Herzaman verilin duaya. Dua edärkän, kuşku olun hem şükür edin.

3Dua edin bizim için dä, ki Allah açsın bizä bir kapu nasaat için, ki haberleyelim Hristozun saklılıını, angısı için kapana düştüm,

4ki bunu açık bildiräbileyim, da, nicä düşer, lafedeyim.

5Klisedän dışanda olannarlan götürün kendinizi aarifliklän, vakıdı paaya koyup.

6Sizin lafınız herzaman hayırlı olsun, tuzlanmış, ki biläsiniz, nicä düşer herkezinä cuvap etmää.

Bitki selämnär

7Sizä, benim için hepsini söleyecek Tihik, bizim sevgili kardaş hem inanç yardımcı, hem kafadar Saabinin izmetindä,

8angısını sizä maasuz yolladım, ki annasın halınızı da üreklendirsin sizi.

9Onunnan bilä yolladım Onisimi dä, angısı inanç hem sevgili kardaştır sizin aranızdan. Onnar söleyeceklär sizä hepsini, ne burada olêr.

10Seläm yollêêr sizä Aristarh, ani kapalı benimnän barabar, hem Mark, Varnavanın teyzä oolu, angısı için siz sımarlamak aldınız, ki geldiynän kabledäsiniz onu,

11hep ölä İisus, angısına dener İust. Kesikli olannardan yalnız bunnar işleerlär benimnän bilä Allahın Padişahlıı için. Onnar üreemi serinnettilär.

12Seläm yollêêr sizä Epafras, İisus Hristozun çıraa, ani sizdän. O herzaman çalışkan sizin için duada, ki olasınız taman hem kaavi inanda, tanıyarak hepsini, ne isteer Allah.

13Şaatlık ederim onun için, ani o çok çalışkan sizin için hem onnar için, kim Laodikiya hem İerapol kasabalarında bulunêr.

14Seläm yollêêr sizä Luka, sevgili doftor, hem Dimas.

15Selämneyin kardaşları Laodikiya kasabasından, hem Nimfayı hem kliseyi, ani bu karının evindä toplanêr.

16Bu kiyat aranızda okunduktan sora, bakın da verin, Laodikiya klisesinä okusunnar. Siz dä okuyun kiyadı, ani Laodikiyadan gelecek.

17Söleyin Arhipä bölä: «Bak da tamanna izmetçilii, ani kablettin Saabidän».

18Bän, Pavli, yazêrım bu selämi kendi elimnän. Unutmayın benim sincirlerimi. Sizinnän iivergi olsun. /Amin./