‏ Ephesians 2

Ölümdän yaşamaya geçtik

1Siz ölüydünüz kabaatlarınız hem günahlarınız beterinä,

2angılarda vakıdın birindä yaşardınız bu dünneyin adetinä görä, izleyeräk önderciyi ▼

▼Önderci – şeytan.

, ani zaabitlik eder gökün altında, o duhu, ani işleer seslämeyän insannarda.

3Onnarın arasında biz hepsimiz dä vakıdın birindä yaşardık tenimizin havezlerinä görä. Tamannardık tenimizin hem aklımızın istediklerini. Haliz halımızda biz daavalı olmuştuk Allahın üfkesinä, nicä dä kalan insannar.

4Ama Allah, cömert acıyannıınnan, bizi çok sevdi.

5Makar ki biz ölüydük kabaatlarımız beterinä, O sevgiylän yaşamak verdi bizä Hristozlan barabar. Siz Onun iivergisinnän kurtuldunuz.

6Allah diriltti bizi İisus Hristozda da oturttu Onunnan barabar göklerdä,

7ki gelär zamannarda göstersin iivergisinin kenarsız zenginniini iiliklän, ani yaptı bizim için İisus Hristozda.

8Zerä siz Onun iivergisinnän, inannan kurtuldunuz. Bu diil sizdän, ama baaşış Allahtan,

9diil yaptıklarınızdan, kimsey üünmesin deyni.

10Zerä biz – Allahın ustalıı, İisus Hristozda yaradılı, ki yapalım iilikleri, ne Allah öncä hazırladı, ki yaşarkan tamannayalım.

Allahın eni insanı

11Onuştan unutmayın, ne vardınız bir vakıtlar. Siz tencesinä tayfändınız. Onnar, kimin adı «kesikli», sizä «kesiksiz» deerlär, makar ki kesiklik insan elinnän güüdedä yapılêr.

12Unutmayın, ani sizdä ozaman Hristos yoktu, İzrail vatandaşlıından kesilmiştiniz, yabancıydınız baalantılara, ani temellenmiş Allahın adamaklarına, umutsuz hem Allahsızdınız bu dünnedä.

13Şindi sä İisus Hristozda siz, ani vakıdın birindä Allahtan uzaktınız, yakın oldunuz Hristozun kanınnan.

14Zerä Odur bizim usluluk, Angısı ikidän bir yaptı, da Kendi güüdesinnän duvarı yıktı, ani aramızda durardı, da duşmannık yaradardı.

15O Ayoz Zakonu sımarlamaklarınnan hem sıralarınnan kuvetsiz yaptı, ki, usluluk getirip, ikisindän bir eni adam yapsın Kendisindä,

16ki stavrozda ölmäklän ikisini dä bir güüdedä Allahlan barıştırsın. Bununnan duşmannıı yok etti.

17O, gelip, getirdi usluluun ii haberini sizä, uzak olannara hem yakın olannara.

18Zerä O kolaylık verdi, ki biz ikimiz dä bir Duhun yardımınnan Bobaya yaklaşalım.

19Butakım siz şindän sora ne yabancı, ne dä musaafirsiniz, ama vatandaş Allahın ayoz halkınnan hem Onun aylesinin ekleri.

20Siz apostolların hem prorokların temeli üstünä yıvıldınız, neredä Kendi İisus Hristos – köşä taşı.

21Onda bütün yapı, uygun birliktä toplu, üüselip, olsun bir ayoz bina Saabinin izmetindä.

22Siz yapınêrsınız o binada, ki olsun er, neredä Allah Duhlan yaşasın.