‏ Ephesians 5

1Allaha benzeyin, nicä sevgili uşaklar.

2Sevgiliktä yaşayın, nicä Hristos bizi sevdi da Kendini bizim için verdi Allaha gözäl kokulu bir baaşış hem kurban gibi.

3Ama orospuluk hem hertürlü diilpaklık eki tamahlık hiç anılmasın bilä sizin aranızda, çünkü bu yakışmaz Allahın ayoz halkına.

4Ayıp sözlär, boş laflar hem kaskatı şakalar da olmasın. Bunnar yaraşmêêr. Taa islää şükür edin.

5Zerä bilersiniz, ani hiç bir orospu, diilpak, eki tamah olan, angısı idollara baş iildän gibi, mirasçı olmayacek Hristozun hem Allahın padişahlıında.

6Kimsey aldatmasın sizi boş laflarlan, zerä bu işlär beterinä Allahın üfkesi geler seslämeyän insannar üstünä.

7Onnarlan paydaş olmayın.

Aydınnıkta yaşayın

8Vakıdın birindä siz karannıktınız, ama şindi Saabidä aydınnıksınız. Götürün kendinizi, nicä aydınnık evlatları.

9Zerä aydınnıın meyvası hertürlü iilik, dooruluk hem aslılık.

10Bakın üürenmää, ne Saabi beener.

11Karannıın kısır işlerindä pay almayın. Ama takazalayın onnarı.

12Zerä ayıptır sölemää o işleri, ne onnar saklı yapêrlar.

13Ama aydınnık hepsini belli eder, üzä çıkarıp, zerä hepsi, ne belli olêr, aydınnıktır.

14Onuştan dener: «Sän, ani uyuyêrsın, uyan uykudan, ölüdän diril! Hristos sana şafk eder».

15Ölä ki, ii bakın, nicä yaşêêrsınız. Olmayın fikirsiz, ama aarif olun.

16Vakıdı paaya koyun, zerä bu günnär kötü günnär.

17Onuştan olmayın akılsız, ama annayın, nedir Allahın istedii.

18Sarfoş olmayın şaraplan, zerä sarfoşluk sizi zapsızlaa götürür, ama doluşun Ayoz Duhlan.

19Biri-birinizä psalmalar, metinnik lafları hem duhça türkülär çalıp-söleyin. Bütün ürektän Saabiyä türkü hem hava çalın.

20Şükürluk getirin hepsi için herzaman Allah Bobaya bizim Saabi İisus Hristozun adınnan.

Karılar hem kocalar

21Biri-birinizä ön verin, Hristozdan korkarak.

22Karılar ön versinnär kendi kocalarına, nicä Saabiyä.

23Zerä koca baştır karıya, nicä Hristos da baştır kliseyä hem Kendisi güüdenin Kurtarıcısı.

24Nicä klisä ön verer Hristoza, hep ölä karılar da herbir iş üzerä ön versinnär kocalarına.

25Kocalar, sevin kendi karılarınızı, nicä Hristos da sevdi kliseyi da onun için kendini kurban verdi,

26ki onu, suylan yıkayıp, Allahın sözünnän pakladıktan sora ayozlasın,

27da onu Kendi önünä çıkarsın bir metinni klisä gibi, lekesiz, buruşuksuz hem başka kedersiz, ki ayoz hem kusursuz olsun.

28Kocalar da düşer kendi karılarını hep ölä sevsinnär, nicä kendi güüdelerini. Kim sever kendi karısını, o sever kendisini.

29Zerä kimsey bir sıra bilä kendi güüdesinä kin gütmedi, ama onu besleer hem yısıdêr, nicä Hristos kliseyi.

30Zerä biz Onun güüdesinin ekleri, /Onun etindän hem Onun kemiklerindän/.

31«Onuştan adam brakacek kendi bobasını hem anasını, karısına baalanacek, da ikisi bir güüdä olaceklar».

32Bu – bir büük saklılık. Bän lafederim Hristos için hem klisä için.

33Ama sizdän herkezi kendi karısını sevsin, nicä kendini; karı da hatır gütsün kocasına.