‏ Galatians 1

Seläm

1Bän, Pavli, diil insannardan seçilmiş apostol eki insanın aracılıınnan, ama İisus Hristozdan hem Allah Bobadan, Angısı İisusu ölümdän diriltti,

2hem hepsi benimnän olan kardaşlar seläm yollêêrız Galatiya kliselerinä.

3İivergi hem usluluk sizä Allah Bobadan hem Saabi İisus Hristozdan,

4Angısı verdi Kendini bizim günahlar için, ki kurtarsın bizi büünkü kötü dünnedän, bizim Allah Bobanın istediinä görä.

5Ona olsun diveçtän divecä metinnik! Amin.

Salt bir İi Haber var

6Şaşêrım, ne tez dönersiniz Ondan, Kim Hristozun iivergisinnän çaardı sizi bir diişik ii haberä.

7Diil, ani var başka ii haber, ama var kimi insannar, ani sizi dolaştırêrlar da isteerlär Hristozun İi Haberini bozsunnar.

8Artık eer biz kendimiz yada bir angil göktän nasaat edärsä bu İi Haberä karşı, ani sizä nasaat ettik, betvalı olsun.

9Şindi enidän söleerim, ne baştan da söledim: Eer birkimsey nasaat edärsä karşı bu İi Haberä, ani siz kablettiniz, betvalı olsun.

10Bän şindi insanın kayıllıını mı aarêêrım osa Allahın mı? Acaba insana mı bakêrım kendimi beendireyim? Eer insana kendimi beendirmää bakarsam, ozaman olmarım Hristozun çıraa.

Pavli annadêr, nicä oldu apostol

11Kardaşlar, isteerim, biläsiniz, ani İi Haber, angısını nasaat ettim sizä, kurulu diil insandan.

12Zerä bän kablettim hem üürendim onu diil insandan, ama İisus Hristozun açıklamasından.

13Siz işittiniz, nicä vakıdın birindä yaşardım iudey dininä görä. Bän Allahın klisesini cansız koolardım da bakardım onu telef etmää.

14Bän iudey dinindä akrannarımın çoyundan taa öncüydüm benim milletimdä. Bendä vardı bir terbeesiz kıyaklık dedelerimin adetleri için.

15Ama Allah beni duumaktan ileri ayırdı da çaardı Kendi iivergisinnän da, açan kayıl oldu

16bana açsın Kendi Oolunu, ki Onun İi Haberini nasaat edeyim yabancı milletlerä, bän danışmadım bir dä adama.

17Gitmedim İerusalimä, onnara, kim benim önüm sora apostoldu, ama çabuk gittim Araviyaya da sora enidän Damask kasabasına geeri döndüm.

18Üç yıldan sora gittim İerusalimä, buluşayım Kifaylan ▼

▼Kifa – Petri.

deyni, da onda kaldım onbeş gün.

19Başka apostolları görmedim, İakovdan kaarä, angısı Saabinin kardaşı.

20Allahın önündä söleerim, ani, ne yazêrım sizä, diil yalan.

21Ondan sora bän gittim Siriya hem Kilikiya erlerinä.

22İudeyada Hristozun kliseleri benim üzümü taa görmediydilär.

23Salt bunu işitmiştilär: «O, kim bizi bir vakıt koolardı, şindi nasaat eder inan için, angısını taa ileri yok etmää bakardı».

24Da metinnärdilär Allahı benim için.