‏ Galatians 4

1Bunu demää isteerim: nekadar vakıt mirasçı uşak bulunêr, o bişeylän çıraktan ayırılmêêr, makar ki çorbacı hepsinä.

2O bakıcıların hem vekillerin zapında o vakıdadan, nezamanadan bobası bennedi.

3Butürlü biz dä, nekadar vakıt duhçasına uşaktık, okadar vakıt çırak bulunardık dünneyin başlankı üüretmeklerinä.

4Ama, açan vakıt tamannandı, Allah bizä Kendi Oolunu yolladı, Angısı duudu karıdan da yaşadı Zakonun zapında,

5ki kurtarsın onnarı, kim bulunêr Zakonun zapında, da busoy oolluk edenelim.

6Çünkü oolluk edendiniz, Allah Kendi Oolunun Duhunu üreenizä yolladı, ani baarêr «Avva!» – annaması «Boba!»

7Onuştan sän şindän sora diilsin çırak, ama ool, da çünkü ool oldun, Allah seni mirasçı yaptı.

Pavlinin kahırı galatiyalılar için

8Vakıdın birindä, açan tanımardınız Allahı, çırak bulunardınız allahlara, angıları diil hakına allah.

9Ama şindi tanıyêrsınız Allahı, taa doorusu, Allah sizi tanıyêr. Öleysä, nasıl enidän geeri dönersiniz yufka hem paasız başlankı üüretmeklerä, angılarına siz enidän çırak olmaa isteersiniz?

10Tutêrsınız günneri, ayları, vakıtları hem yılları.

11Sizin için korkêrım, sizdä savaşmam naafilä kalmasın.

12Kardaşlar, yalvarêrım, olun benim gibi, zerä bän dä oldum sizin gibi. Siz bişeylän bana zarar yapmadınız.

13Nicä bilersiniz, ilk sıra nasaat ettim sizä İi Haberi, çünkü güüdeycesinä hastaydım.

14Bu hastalıım sizä bir denemäkti. Buna bakmayarak, siz beni aşaalamadınız hem retetmediniz. Siz beni, nicä Allahın angilini, kablettiniz, nicä İisus Hristozu Kendini.

15Ne oldu o mutluluktan, ani ozaman duyardınız? Şaatlık ederim, ani eer olaydı kolay, siz çıkaraceydınız kendi gözlerinizi da bana vereceydiniz.

16Acaba, şindi bän sizä duşman mı oldum, çünkü aslısını söledim?

17O adamnar sizi kazanmaa girişerlär, ama diil ii neetlän. Salt isteerlär sizi bizdän ayırsınnar, ki onnar için çalışasınız.

18İidir, diil sade açan bän aranızdayım, çalışkan olasınız, ama herzaman.

19Bän sizin için, uşaklarım, enidän ana zeetlerindeyim, o vakıdadan, açan siz etişeceniz Hristos gibi olasınız.

20Nekadar istärdim şindi sizinnän olayım da sesimi diiştireyim, zerä şaşêrım bu halınıza!

Agar hem Sarra

21Söleyin bana siz, kim Ayoz Zakonun zapında olmaa isteersiniz, ne, bilmeersiniz mi, ne deer Zakon?

22Var yazılı, ani Avraamın iki oolu vardı: birisi çırak karıdan, öbürü serbest karıdan.

23Oolu çırak karıdan öbür adamnar gibi duudu, ama oolu serbest karısından Allahın adamasına görä duudu.

24Bunnarı lääzım annamaa bir benzetmäk gibi. Bu karılar – iki baalantı: birisi Sinay bayırından, çıraklık için duuduran, angısı Agar.

25Agar – Araviyada Sinay bayırıdır, da şindiki İerusalimä benzeer, zerä o şindi çıraklıkta bulunêr uşaklarınnan barabar.

26Ama gökteki İerusalim serbest. Odur bizim anamız.

27Zerä var yazılı: «Sevin sän, uşak duuduramayan karı, ani hiç duudurmadın. Sesini kaldır da baar, sän, ani duudurmak aarısı çekmedin, zerä brakılmış karının taa çok uşaa olacek, nekadar onun, kimin kocası var».

28Kardaşlar, siz dä, nicä İsaak, Allahın adamasına görä duulmuş uşaklarsınız.

29Ama nicä ozaman ool, kim duudu öbür adamnar gibi, koolardı onu, kim duudu Allahın Duhunun sözünä görä, hep ölä olêr büün dä.

30Ama ne deer Ayoz Yazı? «Koola çırak karıyı hem onun oolunu, zerä çırak karının oolu mirasçı olmayacek barabar serbest karının oolunnan».

31Ölä ki, kardaşlar, biz diiliz çırak karının uşakları, ama serbest karının.