‏ Galatians 5

Koruyun serbestlii

1Hristos bizi serbest yaptı, ki serbest kalalım. Onuştan kaavi durun da verilmeyin enidän çıraklık boyunduruuna.

2Bakın, bän, Pavli, söleerim sizä, eer siz kesiklik yaparsaydınız, Hristozdan sizä hiç bir dä fayda olmayacek.

3Enidän haber vererim herkezinä, kim kesiklik yapêr, ani o borçlu tamannasın bütün Zakonu.

4Siz, ani isteersiniz dooru sayılmaa Zakonnan, Hristozdan ayırıldınız, Allahın iivergisindän yıraklandınız.

5Ama biz Ayoz Duhun yardımınnan inannan bekleeriz dooru sayılmak umudu aslı çıksın.

6Zerä İisus Hristozda yok paayı ne kesikliin, ne dä kesiksizliin, ama inanın, ani sevgiylän işleer.

7Siz ii gidärdiniz. Kim sizi durguttu, ki aslılıı seslämeyäsiniz?

8Butürlü inan gelmeer Allahtan, ani sizi çaardı.

9«Biraz maya bütün hamuru kabardêr».

10Saabidä büük inanım var, ani siz başka türlü düşünmeersiniz, ama o, kim sizi dolaştırêr, cezasını çekecek, kim dä o olsa.

11Bän, kardaşlar, eer taa nasaat edäydim kesiklii, ozaman neçin beni koolayaceydılar? Stavroz kimseyä köstek koymayaceydı.

12Olsa, ki onnar, kim sizi debreştirerlär, kendi-kendilerindän kesselär hepsiciini!

İnsan tabeeti hem Ayoz Duh

13Serbestlää çaarılmışınız, kardaşlar, sade serbestliktän yapmayın, ki izmet edäsiniz teninizä, ama sevgiylän izmet edin biri-birinizä.

14Zerä bütün Zakon bu sözlärlän tamannanêr: «Yakın olanını seväsin, nicä kendini».

15Eer siz biri-birinizi kemirirseydiniz hem iyärseydiniz, bakın, ki biri-birinizi telef etmeyäsiniz!

16Bunu demää isteerim: yaşayın Ayoz Duha görä, ozaman tamannamazsınız tenin hamellerini.

17Zerä ten isteer, ne Duha karşı, Duh da isteer, ne tenä karşı. Onnar biri-birinä karşı durêrlar; ölä, ki siz yapamêêrsınız, ne isteersiniz.

18Eer siz Duhtan kullanılmış olarsaydınız, diilsiniz Zakonun zapında.

19Tenin işleri belli. Onnar: orospuluk, diilpaklık, hayırsızlık,

20idollara baş iiltmäk, büücülük, duşmannık, kavga, kıskanmak, üfkä, çekiş, ayırılmaklık, bölünmäk,

21haseetlik, /öldürücülük,/ sarfoşçuluk, zulumnuk hem buna benzär işlär dä. İleri söleerim sizä, nicä dä söledim, ani kim yapêr bölä işleri, Gök Padişahlıında mirasçı olmayacek.

22Ama Ayoz Duhun meyvası – sevgi, sevinmäk, usluluk, saburluk, acıyannık, iilik, inancılık,

23yavaşlık, kendini zapetmäk. Bunnara karşı yok zakon.

24Ama kim Hristozun, onnar stavroza gerdilär teni onun hamellerinnän hem istemeklerinnän.

25Eer Duhlan yaşarsaydık, ozaman Duha görä gezelim.

26Olmayalım şişkinnenän, biri-birimizi küstürän, biri-birimizi kıskanan insannar.