Heb 10 | GagNTL | STEP | Ayoz Zakon, angısında var salt gelär iiliklerin gölgesi, ama diil hakına işlerin aslısı, hep o kurbannarlan, ani yıldan yıla durmamayca getiriler, yok nicä taman yapsın onnarı, kim Allaha yaklaşêr.

‏ Hebrews 10

Bitki kurban

1 Ayoz Zakon, angısında var salt gelär iiliklerin gölgesi, ama diil hakına işlerin aslısı, hep o kurbannarlan, ani yıldan yıla durmamayca getiriler, yok nicä taman yapsın onnarı, kim Allaha yaklaşêr.

2 Başka türlü durgunaceydılar kurbannarı getirmää, zerä onnar, kim izmet eder Allaha, bir kerä paklandıktan sora duymazdılar üreklerindä kendilerini günahker.

3 Ama bu kurbannar yıl yıldan insanın aklına getirer günahlarını.

4 Zerä yok nasıl bualar hem tekelär kanı günahı yok etsin.

5 Onuştan Hristos, gelip bu dünneyä, dedi Allaha: «Sän kurban hem baaşış istämedin, ama bir güüdä Bana hazırladın.

6 Heptän yakılan hayvannarı hem günah için kurbannarı Sän beenmedin.

7 Ozaman dedim: „Tä, gelerim, nicä Zakon kiyadında yazılı Benim için, ey, Allah, ki Senin istediini yapayım!“»

8 Hristos baştan dedi: «Ne kurbannarı, ne baaşışları, ne heptän yakılan hayvannarı, ne günah için kurbannarı Sän istämedin hem beenmedin, makar ki bunnar Zakona görä getiriler».

9 Sora ekledi: «Tä, gelerim, /ey, Allah,/ ki Senin istediini yapayım». İlkinkisini ortadan kaldırır, ki erinä ikincisini koysun.

10 Allahın bu istemesinä görä, biz ayozlandık bir sıra herzamana, açan İisus Hristos kurban getirdi Kendi güüdesini.

11 Herbir popaz, gün gündän izmetçilik yaparak, çok sıra getirer hep o kurbannarı, angıları bir sıra bilä yok edämäz günahı.

12 Ama O, Kendini getirip salt bir sıra kurban günahlar için, oturdu herzamana Allahın saa tarafına.

13 Şindän sora bekleer, duşmannarı koyulsun Onun ayakları altına.

14 Zerä O bir kurbannan taman yaptı herzamana onnarı, kim ayozlanmak yolunda.

15 Bunun için bizä şaatlık eder Ayoz Duh da, deyip:

16 «Tä, budur baalantı, ani o günnerdän sora onnarlan yapacam, deer Saabi: Benim zakonnarımı onnarın üreklerinä koyacam hem onnarın fikirlerinä yazacam.

17 Artık onnarın günahlarını hem zakonsuzluklarını aklıma getirmeyecäm».

18 Ama neredä günah afedilmiş, orada yok lääzımnık günah için kurban getirmää.

Brakılmayın inandan!

19 Ölä ki, kardaşlar, İisus Hristozun kanınnan var nasıl kıyışmaklan En ayoz erä eni hem diri yoldan girelim.

20 Bu yolu O açtı bizä içyankı perdeylän, angısı Onun güüdesidir.

21 Bir büük Popazımız da var koyulu Allahın evinin üstünä.

22 Onuştan yaklaşalım Allaha pak üreklän hem kaavi inannan, serpip üzlerimizi, kötü neetlerdän paklayalım hem güüdemizi temiz suylan yıkayalım.

23 Sallanmadık o umuttan tutunalım, angısı için şaatlık ederiz, zerä adamak verän inançtır.

24 Çalışalım biri-birimizi havezlendirmää, ki sevgiylän iilik yapalım.

25 Toplantılarımızdan brakılmayalım, nicä kimileri alıştı, ama okadar taa çok biri-birimizi üreklendirelim, nekadar taa çok görersiniz, ani o Gün yaklaştı.

26 Zerä eer biz, kim aslılıı üürendi hem kabletti, isteyeräk günah yaparsak, ozaman başka bir kurban günahlarımız için kalmaz.

27 Kalêr, salt korkuylan beklenilsin daava vakıdı hem kızgın ateş, ani yok edecek duşmannarı.

28 Eer onnar, angıları Moiseyin zakonunu basardı, iki-üç kişinin şaatlıınnan acıyannıksız öldürülürsä,

29 siz ne deersiniz? Nekadar taa büük ceza kabledecek o, kim Allahın Oolunu çiinemiş, baalantı kanını aşaalamış, neylän ayozlandıydı, da butakım Allahın hayırlı Duhunu gücendirmiş.

30 Biz tanıyêrız Onu, Kim dedi: «Kin çıkarmak Benim işim, kötülüklär için Bän ödeyecäm, deer Saabi» hem «Saabi Kendi daava kesecek insanına».

31 Titsidir, düşäsin diri Allahın elinä!

32 Aklına getirin baştan vakıtları, açan aydınnıı gördüktän sora, çok savaşıp, acı çektiniz.

33 Kimi kerä takazalanıp hem zeetlenip, aalemin gülüntüsü oldunuz. Kimi kerä pay aldınız onnarlan, angıları hep bu denemeklerdän geçirdilär.

34 Siz acıdınız onnarı, kim kapanda bulundu; varlıınızın kayıplıını sevinmäklän kablettiniz, çünkü bilersiniz, ani /göktä/ taa ii hem geçmäz bir varlık edeneceniz.

35 Ölä ki brakmayın girginniinizi, angısı için bir büük baaşış olacek.

36 Sizä dayanmak lääzımdır, ki, tamannayıp Allahın istediini, kabledäsiniz, ne adanmış sizä.

37 Zerä, nicä Allah deer Ayoz Yazıda, «az, pek az kaldı da Gelän gelecek, hiç oyalanmayacek.

38 Benim dooru olannarım inannan yaşayaceklar, ama kim geeri çekiler, onnarı beenmäm».

39 Biz diiliz onnardan, kim geeri çekiler da kaybeler, ama onnardan, kim inanêr da canını koruyêr.