‏ Hebrews 3

İisus hem Moisey

1Ölä ki, ayoz kardaşlarım, siz, ani bizimnän bilä gökä çaarıldınız, çevirin bakışınızı Apostola hem Baş popaza, Angısını şaatlık ederiz inanda, İisusa.

2İisus, nicä dä Moisey, bütün Allahın evindä inançtı Allaha, Kim koydu Onu bu izmetçilää.

3Onuştan Allah uygun buldu, ani İisusa taa büük metinnik verilsin, nekadar Moiseyä, ölä nicä evi yapan taa çok hatırlanêr, nekadar ev.

4Zerä herbir ev yapılı birkimseydän, ama hepsini yapan – Allahtır.

5Hakına, ani Moisey «inançtı bütün Allahın evindä», nicä izmetkär, şaatlık etsin deyni o işlär için, ne sora haberleneceydi.

6Ama Hristos, nicä Ool, inançtı Allaha Kendi evindä. Onun evi – biz, eer kıyışmaklan /bitkiyädän/ koruyarsak umudu, neylän üüneriz.

İnansızlaa düşmektän korunun

7Onuştan, nicä Ayoz Duh deer: «Büün, eer işidirseniz Allahın sesini,

8inatlaştırmayın üreklerinizi, benzämeyin dedelerinizä, angıları, baş kaldırıp, denedilär Onu çol erdä.

9Orada denedilär Beni, baktılar annamaa aslısını Benim için, makar ki gördülär Benim yaptıklarımı kırk yıl.

10Onuştan o boy insan darsıttı Beni, da bu beterä dedim: „Onnar herzaman şaşık ürekli adamnar, Benim yollarımı tanımadılar.

11Onuştan Bän üfkeylän emin ettim, ani onnar girmeyeceklär Benim raatlııma“».

12Kardaşlar, bakın, olmasın sizdän birisindä fena hem inansız bir ürek, angısı atılêr diri Allahtan.

13Üreklendirin biri-birinizi her gün, okadar vakıt, nekadar dener «Büün», ki biriniz bilä inatlaştırmasın üreeni, aldanarak günahlan.

14Çünkü olêrız paycı Hristozlan bilä, eer baştan bitkiyädän umudun temelini kaavi tutarsak.

15Nicä öncä dedik: «Büün, eer işidirseniz Allahın sesini, inatlaştırmayın üreklerinizi dedeleriniz gibi, açan baş kaldırdılar».

16Zerä kimdir onnar, kim işittiktän sora baş kaldırdı? Diil mi hepsi onnar, kim Moiseyin yardımınnan Mısırdan çıktılar?

17Kimdi onnar, kim Onu kırk yıl darsıttı? Diil mi onnar, ani günaha girdilär da ölüp-düştülär çol erdä?

18Kimin için O emin etti, ani girmeyeceklär Onun raatlıına? Diil mi onnar için, angıları seslämedilär?

19Ölä ki, göreriz, ani onnar girämedilär inansızlık beterinä.