‏ James 2

Zenginnär hem fukaaralar

1Kardaşlarım! İnancı olarak İisus Hristoza, bizim metin Saabiyä, kimseyä pay tutmayın.

2Sözgelişi, eer sizin toplantınıza gelärseydi bir adam, altın üzüklän hem zarif rubaylan giiyimni, hem bir fukaara, kirli rubaylan giiyimni,

3eer zarif giiyimni adama deyärseydiniz: «Buyurun, oturun bu ii erdä», ama fukaaraya deyärseydiniz: «Sän dur orada», eki: «Otur bu erä, ayaklarımın ucunda»,

4ozaman ayırmak yapmêêrsınız mı hem kötü neetli maanacılar olmêêrsınız mı?

5Sevgili kardaşlarım, sesleyin. Seçmedi mi Allah bu dünnedä fukaara olannarı, ki inanda zengin olsunnar hem mirasçı padişahlıkta, angısı adandı onnara, kim Allahı sever?

6Ama siz fukaaraları aşaalandırêrsınız. Zenginnär diil mi onnar, kim sizi ezer hem daava önünä sürükleer?

7Diil mi onnar, kim kötüleer gözäl adı, ani sizä verildi?

8Eer Padişahın Zakonunu tamannarsaydınız Ayoz Yazıya görä: «Seväsin yakın olanını, nicä kendini», ii yapêrsınız.

9Ama eer birkimseyä pay tutarsaydınız, ozaman günah yapêrsınız, hem Ayoz Zakon sizi kabaatlı bulêr nicä zakon basıcılarını.

10Zerä kim bütün Zakonu tamannarsaydı, ama salt bir sımarlamayı basarsaydı, kabaatlı hepsinä karşı olêr.

11Zerä Kim dedi: «Orospuluk yapmayasın», hep O dedi: «Öldürmeyäsin» dä. Eer orospuluk yapmarsaydın, ama öldürürseydin, hep bir sän zakon basıcısı olêrsın.

12Ölä lafedin hem ölä işleyin, nicä onnar, kim daavalı olacek Ayoz Zakona görä, ani serbestlik verir.

13Zerä acıyannıksız daava olacek onnara, kim başkalarını acımêêr. Acıyannık daavadan taa üstündür.

İnan hem iş

14Kardaşlarım, ne fayda olacek eer birkimsey deyärseydi, ani onun inanı var, ama işleri yok? Var mı nicä busoy inan onu kurtarsın?

15Eer kardaş yada kızkardaş rubasızsaydı hem onnarın hergünkü imeelii yoksaydı,

16da sizdän birisi deyärseydi: «Gidin uslulukta, yısının hem doyunun», ama vermärseydi onnara, ne güüdä için lääzım, ne fayda olur?

17Hep ölä inanın da işleri olmarsaydı, inan ölü olêr.

18Beki dä birkimsey deyecek: «Sendä var inan, bendä var işlär». Göster bana senin işsiz inanını, bän dä sana benim inanımı işlerimnän gösterecäm.

19Sän inanêrsın, ani Allah birdir. İi yapêrsın. Fena duhlar da inanêrlar hem titirerlär.

20İsteersin mi sän, adam, boş kafalı, biläsin ani inan, işleri yoksaydı, faydasızdır?

21Bizim boba Avraam işlerinnän dooru sayılmadı mı, getirip kendi oolunu İsaakı kurban olarak kurbannık üstündä?

22Görersin mi, ani onun inanı işlerinnän barabar işlärdi da inanı işlerinnän taman oldu?

23Butürlü tamannandı Ayoz Yazının sözleri: «Avraam inandı Allahı da bununnan dooru sayıldı». Onuştan Avraama Allahın dostu denildi.

24Esap alêrsın mı, ani insan kendi işlerinnän dooru sayılêr, ama diil salt inanınnan?

25Hep ölä maskara Raav da işlerinnän dooru sayılmadı mı, açan konakladı gözçüleri da çıkardı onnarı kasabadan, ki geeri başka yoldan gitsinnär?

26Nicä duhsuz güüdä ölü, hep ölä işsiz inan da ölü.