‏ James 3

Dilimizi kullanmak

1Kardaşlarım, çoyunuz üüredici olmayın, zerä bilersiniz, ani bizä bir taa keskin daava olacek.

2Zerä hepsimiz çok sıra yanılêrız. Kim laflan yanılmêêr, o taman adam, angısı var nicä tutsun çılbırda bütün güüdesini.

3Biz beygirlerin aazlarına kantırma koyêrız, ki terbeeleyelim onnarı. Butürlü onnarın bütün güüdelerini kullanêrız.

4Ya bakın, ne büük gemilär sert lüzgerlerdän götürüler, ama ne küçük dümennän kullanılı, onnar giderlär orayı, nereyi gemici isteer.

5Hep ölä dil dä, güüdedä küçük bir ek, ama büük işlärlän üünär. Bakın, bir küçük ateş ne büük bir daa tutuşturup-yakêr.

6Dil dä ateş gibidir, güüdemizin ekleri arasında bir kötülük dünnesi. Dil bütün güüdemizi kirleder hem yaşamamızın tekerleeni kızdırêr, zerä kendi dä cendem ateşindän kızdırılan.

7Herbir soy canavarlar, kuşlar, sürünennär hem denizdä yaşayannar adamdan zaplandı.

8Ama dili kimsey zaplayamêêr. O bir fenalık, dolu ölüm zihirinnän, angısını kimsey durgudamêêr.

9Dilimizlän Allah Bobayı metinneeriz, hep o dilimizlän insannarı betvalêêrız, angıları Allaha tıpkı yaradıldı.

10Hep bir aazdan çıkêr hem metinnik, hem betva! Olmaz bölä olsun, kardaşlarım.

11Olur mu nasıl bir sızıntıdan aksın hem tatlı, hem acı su?

12Kardaşlarım, yok nasıl incir fidanı yapsın zeytin, yada baa çotuu yapsın incir. Hep ölä, yok nasıl bir sızıntıdan aksın hem tuzlu, hem tatlı su.

İki soy aariflik

13Kim sizin aranızda aarif hem akıllı? Kendi yaptıklarını göstersin ii taşımasınnan hem münüzlüklän, ani aarifliktän geler.

14Ama eer sizin üreenizdä varsaydı kin, kıskançlık hem kendini sevmäk, yok neçin üünäsiniz hem aslılıı yalandırasınız.

15Busoy aariflik yukardan inmäz, ama geler erdän, insan tabeetindän, fena duhlardan.

16Zerä neredä kıskançlık hem kärcılık, orada sırasızlık hem hertürlü fena işlär.

17Ama yukardan inän aariflik hepsindän öncä temiz, sora uslu, yalpak, sesleyici, dolu acıyannıklan hem ii işlärlän, üzä bakmaz, ikiüzlü olmaz.

18Dooruluun meyvası ekilir uslulukta onnardan, kim usluluk için çalışêr.