Phili 3 | GagNTL | STEP | Bitkidä, kardaşlarım, sevinin Saabidä. Bana diil aar yazmaa sizä hep o işleri, zerä bu sizi zarardan koruyar.

‏ Philippians 3

Hakına dooruluk

1 Bitkidä, kardaşlarım, sevinin Saabidä. Bana diil aar yazmaa sizä hep o işleri, zerä bu sizi zarardan koruyar.

2 Korunun o köpeklerdän! Korunun kötülük yapannardan! Korunun kesiklik kasaplarından!

3 Zerä hakına kesikli – biz, ani duhça izmet ederiz Allaha, üüneriz İisus Hristozlan hem umudumuzu koymêêrız insan işlerinä.

4 Aslıda bän dä var nicä umudumu koyayım insan işlerinä. Eer birkimsey sanarsa, ani var nasıl umutlansın insan işlerinä, bän taa çok umutlanabilerim.

5 Sekizinci günü duumaktan kesikliyim, İzrail milletindän, Veniamin tamızlıından, çıfıtlardan çıfıt, Ayoz Zakona görä farisey.

6 Kıyaklıklan kliseyi koolardım. Eer lafedärsäk dooruluk için, ani Ayoz Zakonda temelli, bän kabaatsızdım.

7 Ama nedä bän üstündüm, onu kayıplık saydım Hristos için.

8 Bundan taa çok, hepsini sayêrım kayıplık, bakarak, nekadar taa üstündür tanımak Hristos İisusu, benim Saabimi. Hristos için hepsini kaybettim hem gübür sayêrım, ki edenäbileyim Hristozu

9 da bulunayım Onda, diil kendi dooruluumnan, ani Zakondan geler, ama dooruluklan, ani Allahtan geler inannan Hristoza da inanda temelli.

10 İsteerim tanıyım Onu hem dirilmesinin kuvedini, pay alayım Onun zeetlerindän hem ölümünnän Ona benzär olayım,

11 nesoy da olsa, etişäbileyim ölülerin dirilmesinä.

Kaçalım çizgiyä dooru

12 Diil, ki demää, ani şindän sora kablettim eki taman oldum, ama çalışêrım, ki edeneyim, nicä Hristos beni edendi.

13 Kardaşlar, saymêêrım, ani bän edendim, salt bunu yapêrım: geerisini unudarak da önümdä işlerä uzanarak,

14 kaçêrım o uura etişmää çizgiyä, ki ödää kazanayım – göktä yaşamayı, angısına Allah çaardı beni İisus Hristozda.

15 Onuştan hepsimiz, kim duhça ergin, lääzım bölä düşünelim. Eer sizdä varsa başka bir neet bişey için, Allah bunu da açacek sizä.

16 Ama neylän bir annamaya geldik, onu ölä dä tutalım.

17 Bana benzär olmaa çalışın, kardaşlar, da islää bakın onnara, kim yaşêêr o örnää görä, angısını biz sizä verdik.

18 Zerä çoyu onnardan, kimin için çok sıra söledim sizä, şindi dä söleerim aalayarak, yaşêêrlar nicä Hristozun stavrozunun duşmannarı.

19 Onnarın sonu kayıplık olacek. Onnarın allahı – kendi şkembeleri, da üünerlär onunnan, nedän lääzım utansınnar. Onnar düşünerlär erdeki işlär için.

20 Bizim vatanımız sa göklerdä, neredän bekleeriz Kurtarıcıyı, Saabi İisus Hristozu,

21 Angısı bizim bu düşkün güüdemizi diiştirecek da yapacek Kendi şannı güüdesinä benzär olsun, faydalayarak o kuvedi, angısınnan O var nasıl zapetsin hepsini.