Phili 4 | GagNTL | STEP | Ölä ki, sevgili kardaşlarım, angılarını çok özledim, benim sevinmeliim hem feneţim, bölä kaavi durasınız Saabidä, sevgililär.

‏ Philippians 4

Bitki nasaatlar

1 Ölä ki, sevgili kardaşlarım, angılarını çok özledim, benim sevinmeliim hem feneţim, bölä kaavi durasınız Saabidä, sevgililär.

2 Yalvarêrım Evodiyaya, yalvarêrım Sintihiyä, Saabidä olun bir annamakta.

3 Sän dä, Sizig ^{▼▼Sizig adın annaması «kafadar hep bir boyundurukta».}, hakına kafadarım, yardım et bu karılara, ani savaştılar İi Haberi nasaat etmää benimnän, Klementlän hem kalannarlan, ani benimnän işleerlär, angıların adları yazılı yaşamak kiyadında.

4 Sevinin Saabidä herzaman, taa bir sıra deerim, sevinin.

5 Sizin yalpaklıınız hepsi insannardan bilinsin. Saabi yakın.

6 Kahırlanmayın bişey için, ama hertürlü duada hem yalvarmakta açın sizin istemeklerinizi Allahın önündä şükürlüklän.

7 Ozaman Allahın selemeti, ani taa üüsek herbir akıldan, koruyacek sizin üreklerinizi hem fikirlerinizi İisus Hristozda.

8 Bitkidä, kardaşlarım, ne var hakına, saygılı, dooru, temiz, sevimni hem mayıl, ne var ii hem metinni, onnar için düşünün.

9 Ne üürendiniz, kablettiniz, işittiniz hem gördünüz bendä, onnarı tamannayın, da selemet verän Allah sizinnän olacek.

Pavlinin şükürü

10 Bän pek sevindim Saabidä, ani siz enidän başladınız benim için meraklanmaa. Siz herzaman meraklanardınız benim için, ama yoktu kolaylıınız.

11 Deerim bunu, diil ani benim zorum var. Zerä bän üürendim şükür olayım o halda, angısında bulunêrım.

12 Bilerim yaşamaa, nicä yoklukta, hep ölä bollukta da. Üürendim sekreti, ani hererdä, herbir halda, nicä tok olayım, hep ölä aaç da durayım, nicä bollukta, hep ölä zorlukta da bulunayım.

13 Hepsini becererim Hristozda, ani beni kaavileer.

14 Ama siz ii yaptınız, ani benimnän pay aldınız benim zeetlerimdä.

15 Siz dä, Filiplilär, bilersiniz, ani açan İi Haber daalmaa başladı, da bän çıktım Makedoniyadan, bir dä klisä pay almadı yardım vermektä hem nasaat kabletmektä, sizdän kaarä.

16 Bän Saloniktä bulunarkan, siz birkaç sıra yardım yolladınız bana, açan zorum vardı.

17 Söleerim bunu, diil ani baaşış aarêêrım. Tersinä, aarêêrım bir kazanç sizin faydanız için.

18 Bendä hepsi var, bollukta yaşêêrım. Bän tokum, kablettim, neyi Epafroditin elinnän yollamışınız. Bu – nicä gözäl kokulu bir baaşış, bir kurban, angısını Allah kableder hem beener.

19 Allahım da dolduracek hepsi sizin lääzımnıklarınızı Kendi zebilliktän zenginniinä görä İisus Hristozda.

20 Allah Bobamıza olsun metinnik diveçtän divecä! Amin.

21 Selämneyin İisus Hristozun bütün ayoz halkını. Kardaşlar, ani benimnän, sizä seläm yollêêrlar.

22 Allahın bütün ayoz halkı, hepsindän çok – Kesarın evindekilär, sizä seläm yollêêrlar.

23 Saabi İisus Hristozun iivergisi olsun sizin duhunuzlan. /Amin./