Phile | GagNTL

‏

‏ Philemon

Seläm

1 Bän, Pavli, İisus Hristos için kapancı, hem kardaş Timofey, seläm yollêêrız sana, Filimona, ani bizim sevgili kafadarımız iştä,

2 kızkardaş Apfiyaya, Arhipä, ani bizim kafadarımız bir düüştä, hem senin evdeki klisenä.

3 İivergi sizä hem usluluk bizim Allah Bobadan hem Saabi İisus Hristozdan.

Şükür hem dua

4 Şükür ederim benim Allahıma, herzaman seni anarak benim dualarımda,

5 zerä işittim, nicä inandın Saabi İisusa hem nicä seversin Allahın hepsi ayoz halkını.

6 Dua ederim, ki sän çalışkan olasın haberlemektä senin inanını, çünkü tanıyêrsın herbir iilii, angısını kablettik İisus Hristozdan.

7 Zerä biz pek sevindik hem üreklendik senin sevgin için, zerä seninnän, kardaşım, hoşlandı ayozların ürekleri.

Pavlinin yalvarması Onisim için

8 Makar ki Hristozda var kıyışmaklıım, sana sımarlayım, ki yapasın, ne lääzım,

9 sayêrım, taa islää yalvarayım sana sevgiylän. Zerä yalvaran diil başkası, ama bän, ihtär Pavli, ani şindi İisus Hristos için kapancı.

10 Yalvarêrım sana benim uşaam için, Onisim ^{▼▼Onisim adın annaması «faydalı, yarar».} için, angısını duudurdum, bulunarak baalı sincirlärlän.

11 Bir vakıt o sana yaramardı, ama şindi yarar hem sana, hem bana.

12 Onu, kim benim ürääm, sana geeri yollêêrım.

13 Bän istedim onu yanımda tutayım, ki senin erinä izmet etsin bana bu sincirlerdä, neylän baalıyım İi Haber için.

14 Ama izin olmayınca sendän, istämedim bunu yapmaa. İstedim, iilik yapasın diil zorlanmış, ama ii istediindän.

15 Zerä olabilir, ani o bir parça vakıda ayırıldı sendän, ki geeri onu alasın herzamana,

16 diil nicä bir çıraa, ama taa üstün çıraktan, olsun nicä bir sevgili kardaş, çok benim için, ama taa çok senin için, nicä bir insan, hep ölä nicä bir inancı Saabidä.

17 Eer sän beni paydaş sayarsaydın, kablet onu, nicä beni.

18 Eer seni bişeylän gücendirdiysä eki borçluysa sana, koy onnarı benim üstümä.

19 Bän, Pavli, yazdım kendi elimnän: kendim ödeyecäm. Demeerim, ani sän kendin dä bana borçluysun.

20 Hakına, kardaşım, ver bana kolaylık Saabidä sendän faydalanayım, hoşlandır benim üreemi Hristozda.

21 Yazdım sana, çok inanarak, ani sän sesleyecän, da bilerim, ani yapacan taa çok, nekadar bän isteerim.

22 Hep ölä hazırla bir er bana, kalayım sendä, zerä umutlanêrım, sizin dualarınızlan, çıkıp kapandan, geleyim sizä.

Son selämnär

23 Seläm yollêêr sana Epafras, ani kapancı benimnän bilä İisus Hristos için,

24 Mark, Aristarh, Dimas, Luka, benim kafadarlarım.

25 Bizim Saabi İisus Hristozdan iivergi sizin duhunuzlan olsun. /Amin./