Revelation of John 6
Altı mühür koparılêr
1Sora gördüm, ani Kuzu açtı edi mühürün birisini, da işittim yaratıkların birisini, ani dedi gök gürültüsü gibi bir seslän: «Gel /da bak/!» 2Açan baktım, tä, gördüm bir biyaz beygir. Bir atlı vardı onun üstündä, elindä bir yay. Verildi ona bir feneţ, da o yollandı nicä enseyici, ki ensemäk kazansın. 3Açan Kuzu açtı ikinci mühürü, işittim ikinci yaratıı, ani dedi: «Gel /da bak/!» 4Yollandı bir royba beygir. Onun üstündä atlı olana verildi izin er üstündän usluluu alsın, da ozaman insan biri-birini öldürsün. Atlıya bir büük kılıç da verildi. 5Açan Kuzu açtı üçüncü mühürü, işittim üçüncü yaratıı, ani dedi: «Gel /da bak/!» Açan baktım, tä, gördüm bir kara beygir. Onun üstündä atlı olanın elindä vardı bir terezä ▼▼Terezä – kantar.
. 6Dört yaratıın arasından işittim bir ses, ani deyärdi: «Bir ölçü ▼▼Ölçü – grekçä «hiniks» (1 hiniks = 1,1 litra).
booday bir dinara ▼▼Dinar – bir günnük işin ödemesi.
, üç ölçü arpa bir dinara, ama zeytin yaayını hem şarabı bozma!» 7Açan Kuzu açtı dördüncü mühürü, işittim dördüncü yaratıın sesini, ani deyärdi: «Gel /da bak/!» 8Açan baktım, tä, bir şarga beygir. Onun üstündä atlı olanın adı ölüm, da onun ardınca ölülär eri gelärdi. Verildi onnara izin erin dördüncü payı üstünä, öldürsünnär kılıçlan, aaçlıklan, çumaylan hem canavarlarlan. 9Açan Kuzu açtı beşinci mühürü, kurbannık altında gördüm insannarın cannarını, angıları buazlanmıştılar Allahın sözü için hem şaatlık için, ani yapardılar. 10Onnar baarardılar büük seslän da deyärdilär: «Ayoz hem dooru Çorbacı, nezamanadan daava kesmeyecän da cezalamayacan er üstündä insannarı bizim kanımız için?» 11Onnara herbirinä verildi biyaz ruba da denildi, ki taa biraz dinnensinnär, onnarın izmettä kafadarların hem kardaşların sayısı tamannanınca, angıları onnar gibi öldürüleceklär. 12Açan Kuzu açtı altıncı mühürü, gördüm, ani oldu bir büük er tepremesi. Gün karardı keçi yapaasından bir çuval gibi, ay kan gibi oldu, 13da yıldızlar göktän erä düştülär, nicä incir fidanından düşer eşil meyvaları, açan sallanêr bir kuvetli lüzgerdän. 14Gök bir sarılan kola gibi yok oldu, da hepsi bayırlar hem adalar erlerindän kımıldandılar. 15Dünneyin padişahları, büük adamnarı, asker zaabitleri, zenginneri, kudretli insannarı hem hepsi çıraklar hem serbest olannar saklandılar minalar içinä hem kanara aralarına bayırlarda. 16Onnar deyärdilär bayırlara hem kanaralara: «Düşün bizim üstümüzä da saklayın bizi, çorbacılık skemnesindä Oturanın üzündän hem Kuzunun üfkesindän, 17zerä geldi Onnarın büük üfkeli günü, da kim var nasıl ayakça dursun?»
Copyright information for
GagNTL