Rev 8 | GagNTL | STEP | Açan Kuzu açtı edinci mühürü, göktä sansın yarım saat kadar sus oldu.

‏ Revelation of John 8

Edinci mühür koparılêr

1 Açan Kuzu açtı edinci mühürü, göktä sansın yarım saat kadar sus oldu.

2 Gördüm edi angili, ani durardılar Allahın önündä. Onnara verildi edi truba.

3 Sora geldi başka bir angil da durgundu altar önündä, bir altın kadilniţa elindä. Verildi ona çok günnük, ki Allahın bütün ayoz halkının dualarınnan koysun altın altar üstünä, ani bulunêr çorbacılık skemnesinin önündä.

4 Angilin elindän günnük tütünü kalktı Allahın önündä ayoz halkının dualarınnan.

5 Sora angil aldı kadilniţayı da doldurdu altardan ateştän koorlan da erä attı. Ozaman gök gürültüleri hem uultular işidildi, çimçirik çaktı hem er tepredi.

Edi truba

6 Edi angil, tutarak edi trubayı, hazırlandılar trubaları baartmaa.

7 İlk angil trubayı baarttı, da tolu hem ateş kannan karışık er üstünä yaadı. Erin üçüncü payı yandı, fidannarın üçüncü payı hem hepsi eşil otlar da yandı.

8 İkinci angil trubayı baarttı, da sansın bir büük yanar bayır tutuştu da deniz içinä atıldı. Denizin üçüncü payı kan gibi oldu.

9 Üçüncü payı onnardan, ani deniz içindä yaşêêrlar, öldülär. Üçüncü payı gemilerdän telef oldu.

10 Üçüncü angil trubayı baarttı, da göktän bir büük yıldız, ani yanardı, nicä bir şafk, düştü akar suların üçüncü payı üstünä hem su sızıntıları üstünä.

11 Yıldızın adı «Pelin». Suların üçüncü payı acı oldu pelin gibi, da çok insan öldü, zerä sular pek acı olmuştu.

12 Dördüncü angil trubayı baarttı, da üçüncü payı günün, üçüncü payı ayın hem üçüncü payı yıldızların tutuldu, da şafklarının üçüncü payı süündü. Günün dä, gecenin dä üçüncü payı şafksız kaldı.

13 Baktım da işittim bir kartal ^{▼▼Kartal: kimi tekstlerdä «angil».}, ani uçardı gökün ortasında da baarardı bir büük seslän: «Bela, bela, bela erdä yaşayannara kalan truba seslerinin beterinä, angılarını üç angil baardacek».