‏ Revelation of John 9

1Beşinci angil trubayı baarttı, da gördüm bir yıldız, göktän erä düşük. Ona verildi anatar dipsizlik pınarından.

2O açtı dipsizlik pınarını, da oradan kalktı tütün, bir büük fırından gibi. Bu pınarın tütünündän gün hem hava karardı.

3Tütün içindän er üstünä çekirgelär çıktılar. Onnara verildi kuvet, nicä kuvet, ani var erdeki skorpionnarda.

4Onnara sımarlandı kederlämesinnär erdeki otları hem hiç bir eşillii eki fidanı, ama salt insannarı, angıların annılarında yok Allahın mühürü.

5Çekirgelerä verildi kuvet, diil ki öldürsünnär insannarı, ama beş ay zeetlesinnär. Onnarın zeeti benzärdi o acıya, açan skorpion insanı dalêêr.

6O günnerdä insannar aarayacek ölümü, ama bulamayaceklar. İsteyeceklär ölsünnär, ama onnardan ölüm kaçacek.

7Çekirgelerin görünüşü benzärdi cenk için hazırlanmış beygirlerä. Başlarında vardı feneţlär, sansın altından, ama üzleri benzärdi insan üzünä.

8Saçları benzärdi karı saçlarına, dişleri dä aslan dişleri gibiydi.

9Güüslerindä vardı zirh, sansın demirdän zirh, da kanatlarının uultusu benzärdi çok cenk arabası sesinä, koşulu beygirlärlän, ani cengä giderlär atılama.

10Onnarın kuyrukları hem iineleri, nicä skorpionnarın. Onnarın kuvedi kuyruklarındadır, ki zeetlesinnär insanı.

11Onnarın üstünä padişah odur, kim dipsizliin angili, kimä çıfıtçasına dener Avaddon, ama urumcasına Apollion.

12Bir bela geçti, te, taa iki bela ardına geler.

13Altıncı angil trubayı baarttı, da işittim bir ses altın altarın dört buynuzundan, ani bulunêr Allahın önündä.

14O ses, altıncı angilä, ani trubayı tutardı, dedi: «Salver dört angili, angıları baalı büük Evfrat deresindä».

15Dört angil salverildi, angıları hazırlanmıştılar o saat, o gün, o ay hem o yıl için, ki öldürsünnär üçüncü payını insandan.

16Atlı askerlerin sayısı vardı irmi bin kerä on bin. Onnarın sayısını işittim.

17Tä nesoy gördüm görümdä beygirleri hem üstündä atlıları. Onnarın güüslerindä zirhlär vardı ateş, gök yakut hem kükürt rengindä. Beygirlerin kafaları benzärdi aslan kafasına, da aazlarından çıkardı ateş, tütün hem kükürt.

18İnsandan üçüncü payı öldü bu üç beladan – ateştän, tütündän hem kükürttän, ani çıkardı onnarın aazlarından.

19Beygirlerin kuvedi aazlarında hem kuyruklarında. Zerä kuyrukları, angılarında var kafalar, benzär yılana, da bunnarlan insanı zeetlärdilär.

20Kalan insannar, ani öldürülmedilär bu belalardan, dönmedilär Allaha kendi ellerinin yaptıklarından. İleri dooru baş iilttilär cinnerä hem altın, gümüş, tunç, taş hem aaçtan idollara, angıları görämeerlär, işidämeerlär hem gezämeerlär.

21Onnar dönmedilär adam öldürmektän, büü yapmaktan, orospuluktan hem hırsızlıktan.