Rom 12 | GagNTL | STEP | Onuştan, kardaşlar, yalvarêrım Allahın acıyannıınnan, getirin sizin güüdelerinizi bir diri, ayoz, beenilmiş kurban Allaha. Budur sizin hakına izmetçiliiniz.

‏ Romans 12

Eni yaşamak Hristozda

1 Onuştan, kardaşlar, yalvarêrım Allahın acıyannıınnan, getirin sizin güüdelerinizi bir diri, ayoz, beenilmiş kurban Allaha. Budur sizin hakına izmetçiliiniz.

2 Bu vakıtların adetlerinä görä kendinizi kullanmayın, ama Allah fikirinizi enileyip diiştirsin, ki tanıyasınız, nedir Allahın istedii – ne ii, beenilmiş hem taman.

3 Allahın iivergisinnän, ani bana verilmiş, sizä hepsinizä deerim: düşünmeyin kendiniz için taa üstün, nekadar lääzım. Ama ii düşünün o inan ölçüsünä görä, nekadar Allah herkezinä verdi.

4 Nicä bizim güüdemiz birdir, ama çok ekleri var, da nicä her ekinin var kendi işi,

5 hep ölä biz dä, çokluk olarak, hepsimiz bir güüdä olêrız Hristozda, ayırı-ayırı biri-birimizin ekleri olarak.

6 Ayırı baaşışlar kablettik Allahın iivergisinä görä, ani verilmiş bizä. Kimdä var prorokluk baaşışı, onu faydalasın kendi inan ölçüsünä görä.

7 Kimdä var izmet baaşışı, izmet etsin. Üürediciseydi, üüretsin.

8 Becerärseydi girginnetmää, girginnetsin. Becerärseydi payetmää, cömertliklän payetsin, ne var onda. Önderciseydi, çalışkan olsun. Kim başkalarına yardım eder, bunu yapsın sevinçlän.

9 Sizin sevginiz olmasın yapınmaklan. Kötülüktän iirenin, iilää yapışın.

10 Sevin biri-birinizi kardaşçasına yalpaklıklan. Yarışmaklan biri-birinizä saygı sürün.

11 Çalışkan olun, haylaz olmayın. Duhlan haşlak olun, Saabiyä izmet edin.

12 Umutlan sevinin, zeettä saburlu olun, kendinizi duaya verin.

13 Payedin, ne sizdä var Allahın ayoz halkına, açan o yoklukta. Bakın musaafirci olmaa.

14 İisözleyin onnarı, kim sizi koolêêr, iisözleyin, ama betvalamayın.

15 Kim seviner, onnarlan sevinin, kim aalêêr, onnarlan aalayın.

16 Olun bir düşünmektä biri-birinizlän. Dikleşmeyin, ama kafadarlaşın onnarlan, kim aşaalanêr.

Kin çıkarmayın

17 Çevirmeyin kimseyä kötülük için kötülük, çalışın yapmaa, ne hepsi insan ii sayêr.

18 Eer varsa nasıl sizin tarafınızdan, olun barışmakta hepsi insannan.

19 Sevgili kardaşlar, kimseydän kin çıkarmayın, brakın Allahın üfkesinä, zerä yazılı: «Kin çıkarmak Benimdir, Bän ödeyecäm kötülüklär için, deer Saabi».

20 Buna karşı, eer senin duşmanın aaçsaydı, doyur onu. Susuzsaydı, ver ona su. Eer bölä yaparsan, toplayacan kızgın kömür onun başına ^{▼▼Demäktir, onu çok utandıracan.}.

21 Kötülüktän ensenmiş olma, ama iiliklän ensä kötülüü.