‏ Romans 15

Kaavilär saburlu olsunnar zayıflarlan

1Biz, ani kaaviyiz inanda, düşer taşıyalım kuvetsizlerin zayıflıklarını da bakmayalım salt kendi hoşluumuza.

2Herbirimiz lääzım beendirsin kendini yakın olanına iilik için, ki duhça kaavilendirsin onu.

3Zerä Hristos da bakmadı Kendisini Kendinä beendirsin, ama nicä yazılı: «Seni kötüleyennerin kötülüü Benim üstümä düştü».

4Hepsi, ne öncä yazılıydı, yazıldı bizim üürenmemiz için, ki dayanmaklan hem havezlenmäklän Ayoz Yazılardan umudumuzu koruyalım.

5Allah, Kim dayanmak hem havezlik verer, baaşlasın sizä, ki biri-birinizlän bir düşünmektä olasınız İisus Hristozun örneenä görä.

6Ölä ki, birliktä, bir aazdan metinneyäsiniz Allahı – Saabimizin İisus Hristozun Bobasını.

7Onuştan biri-birinizi kabledin, nicä sizi dä Hristos kabletti, Allahın metinnii için.

8Zerä deerim, ani Hristos izmetçi kesiklilär için oldu, ki Allahın inançlıını göstersin, adamakları kaavilesin, ani bobalarımıza adanmıştı,

9ki başka milletlär metinnesinnär Allahı Onun acıyannıı için, nicä yazılı: «Onun için şükür edecäm Sana milletlerin arasında hem türkü Senin adına çalacam».

10Hep ölä yazılı: «Milletlär, sevinin Onun insanınnan barabar».

11Sora enidän dener: «Allahı hepsi milletlär metinnesin, hem hepsi halklar şannasın».

12Hep ölä İsaya deer: «İesseyin kökündän bir filiz çıkacek, Angısı üüselecek, çorbacı milletlerä olsun, milletlär dä Ona umutlanaceklar».

13Allah, Kim umut bizä versin, sizi doldursun hertürlü sevinmäklän hem usluluklan inanınızda, ki Ayoz Duhun kuvedinnän sizi umutlan zenginnetsin.

Pavli – Hristozun izmetkeri milletlerin arasında

14Kardaşlarım, bän kendim çok inanêrım, ani siz pek iilikçiysiniz, ii bilersiniz, ne yapmaa, hem da becerersiniz biri-birinizä nasaat vermää.

15Ama kıyışmaklan yazdım sizä, ki enidän aklınıza getireyim kimi işleri Allahın iivergisinnän, ani bana verdi,

16ki İisus Hristozun izmetkeri olayım milletlerin arasında. Bän çalışêrım ayoz izmetçiliktä, nasaat ederäk Allahın İi Haberini, ki milletlär olsunnar Allahtan kabledilmiş kurban gibi, ani Ayoz Duhtan ayozlanmış.

17Bu beterä İisus Hristozda üünäbilerim Allaha izmetçiliimdä.

18Zerä kıyışacam lafetmää salt o işlär için, ne Hristos yaptı, beni kullanarak, ki milletlär Onu seslesinnär, laflarımnan hem işlerimnän,

19meraklı nışannarın hem şaşmaklı işlerin kudretliinnän, Ayoz Duhun kuvedinnän. Ölä ki, Hristos için İi Haberi hererdä nasaat ettim, İerusalimdän İlliriya dolayına kadar.

20Çalıştım nasaat etmää İi Haberi orada, neredä Hristozun adı bilinmärdi, ki yıvmayım bir temel üstünä, ani başkasından koyulu.

21Nicä yazılı: «Onnar, kim Ondan habersizdi, Onu göreceklär, hem onnar, kim Onun için işitmediydilär, annayaceklar».

Pavli isteer Romaya gitmää

22Bunnarın beterinä çok sıra köstek oldu bana, sizä geleyim.

23Ama şindi yok bir iş bilä, ne tutabilsin beni bu erlerdä, da çünkü çok yıllardan beeri isteerim sizä geleyim,

24bakacam uurayım sizä, açan İspaniyaya gidecäm. Zerä umutlanêrım, öncä sizi, geçärkän, göreyim hem hoşlanayım baarlem biraz sizinnän kalmaktan, sora yardım edirsiniz bana, orayı gideyim.

25Ama şindi giderim İerusalimä, ki yardım Allahın ayoz halkına götüreyim.

26Zerä Makedoniyadan hem Ahayadan inancılar kayıl oldular, toplasınnar yardım fukaaralar için Allahın ayoz halkından, onnar için, kimnär yaşêêrlar İerusalimdä.

27Elbetki kayıl olaceklar, çünkü onnar borçlu yardım etsinnär. Zerä başka milletlär iudeylerin duhça iiliklerindän pay aldılar, onun için onnar da borçlu yardım etsinnär güüdeycesinä.

28Yaptıktan sora bu işi – götürdüktän sora onnara hepsi bu baaşışları, sizdän geçip, İspaniyaya gidecäm.

29Bilerim, ani, açan gelecäm sizä, gelecäm bütün iisözlemäklän Hristozdan.

30Yalvarêrım, kardaşlar, bizim Saabi İisus Hristos için hem Duhun sevgilii için, çalışın benimnän barabar dualarınızda Allaha benim için,

31ki kurtulayım inansızlardan İudeyada, da İerusalimä izmetim ii kabledilsin Allahın ayoz halkından,

32da butürlü, Allah istärsä, sevinmäklän sizä geleyim hem biraz serinneyim sizin aranızda.

33Allah, usluluk verän, olsun sizinnän hepsinizlän! Amin.