Rom 2 | GagNTL | STEP | Ölä ki, sana yok afetmäk, bey adam, kim dä sän olsan, eer maana bularsaydın. Zerä, başkasına maana bulurkan, kendi-kendini kabaatlandırêrsın, zerä sän, ani maana bulêrsın, kendin dä hep onu yapêrsın.

‏ Romans 2

Allahın dooru daavası

1 Ölä ki, sana yok afetmäk, bey adam, kim dä sän olsan, eer maana bularsaydın. Zerä, başkasına maana bulurkan, kendi-kendini kabaatlandırêrsın, zerä sän, ani maana bulêrsın, kendin dä hep onu yapêrsın.

2 Biz bileriz, ki bölä yapannara Allah dooru daava keser.

3 Bey adam, sän, ani bölä yapannara maana bulêrsın, ama kendin dä hep ölä yapêrsın, sanêrsın Allahın daavasından kurtulabilecän mi?

4 Osa paya koymêêrsın Allahın cömert iiliklerini, saburluunu hem çok dayanmasını? Bilmeersin, ani Allah iiliklerini uzadêr, ki seni günahlarından Kendisinä döndürsün?

5 Ama sän inatlaşêrsın da günahlarından dönmää istämeersin, onuştan Allahın cezasını o üfkeli daava günü için toplêêrsın. Ozaman Allahın dooru kararı görünecek.

6 O herkezinä kendi yaptıklarına görä ödeyecek.

7 Onnara, kim, dayma iilik yaparak, metinnik, ikram hem ölümsüzlük aarêêr, diveç yaşamak verecek.

8 Ama kim kendini sever, aslılıı seslämeer hem haksızlaa veriler, onnara üfkesini gösterecek hem bela verecek.

9 Hepsi, kim kötülük yapêr, öncä iudeylerin, sora urumnarın üstünä zeet hem sıkıntı gelär.

10 Buna karşı, hepsinä, kim iilik yapêr, öncä iudeylerä, sora urumnara, metinnik, ikram hem usluluk olacek.

11 Zerä Allah kimseyä pay tutmaz.

12 Kim, Ayoz Zakonu bilmeyeräk, günah yapêr, onnar, Zakona bakmayarak, telef olaceklar. Ama kim, Zakonu bileräk, günah yapêr, onnara Zakona görä dä daava olacek.

13 Zerä diil Zakonu işidennär Allahın önündä dooru, ama Zakonu tamannayannar dooru sayılacek.

14 Zerä o milletlär, kimdä yok Ayoz Zakon, duygularından Zakona görä yaşadıkça, onnar gösterirlär, ne lääzım hem diil lääzım yapılsın, makar ki Zakonu bilmeerlär.

15 Bununnan göstererlär, ani ne Zakon isteer, onnarın üreklerindä yazılı. Onnarın içyandan duyguları bunu dooruklêêr, fikirleri onnarı ya kabaatlandırêr, ya da dooru çıkarêr

16 o gün, açan İi Haberä görä, angısını bän nasaat ederim, Allah daava yapacek İisus Hristozlan insannarın saklı işlerinä.

İudeylär hem Ayoz Zakon

17 Sän, ani kendini iudey sayêrsın, umutlanıp Ayoz Zakona, Allahlan üünersin,

18 bilersin Onun istediini hem, Zakondan üürenmiş, annêêrsın, ne taa ii,

19 inanêrsın, ani köörları gezdiräbilirsin, karannıkta olannara aydınnık olabilirsin,

20 akılsızları yola getiräbilirsin hem uşakları üüredäbilirsin, zerä Zakonnan etiştin bilginin hem aslılıın tamannıına.

21 Öleysä, nesoy sän, başkasını üürederäk, kendini üüretmeersin? Nasaat ederäk: «çalmayasın», kendin çalêrsın?

22 «Orospuluk yapma» söleyeräk, kendin yapêrsın? İdollardan azetmeyeräk, kendin ayoz binaları soyêrsın?

23 Ayoz Zakonnan üünersin, ama Allahı aşaalêêrsın, zerä Zakonu basêrsın?

24 Nicä var yazılı: «Sizin beterinizä Allahın adı milletlär arasında kötülener».

25 Eer Ayoz Zakonu tamannarsaydın, elbetki kesikliin faydası var, ama eer Zakonu basarsaydın, kesiklik olêr, nicä dä kesiksizlik.

26 Onuştan, eer kesiksiz adam Zakonun sımarlamaklarını tamannarsa, sayılmayacek mı o nicä kesikli?

27 Kim güüdeycesinä kesiksiz, ama Zakonu tamannêêr, kabaatlandırmayacek mı seni, kimdä var Ayoz Yazılar hem kesiklik, ama basêrsın Zakonu?

28 O diil iudey, kim dışandan ölä sade, hem o diil kesiklik, ne güüdedä nışannı sade.

29 Ama hakına iudey o, kim içyandan ölä, hem hakına kesikli o, ani duhça ürektä kesikli, ama diil sade kiyat üstündä. Hakına iudey odur, kim diil insandan, ama Kendindän Allahtan metinni.