‏ Romans 3

Adamın borcu Allahın önündä

1Ölä ki, iudeylerdä ne üstünnük var? Ne fayda kesikliktän?

2Her taraftan çok fayda var. İlkin, iudeylerin elinä Allahın sözleri verildi.

3Ne deyecez, eer onnardan kimisi inançsız olduysa, onnarın inançsızlıı var mı nicä yok etsin Allahın inançlıını?

4Olmaz! Eer hepsi insannar yalancı da olsa, Allah dooru kalêr, nicä yazılı: «Sözündä dooru çıkêrsın hem daavada daavayı kazanêrsın».

5Eer bizim haksızlık taa açık Allahın dooruluunu yaparsaydı, ne deyecez? Allah dooru yapmêêr mı, açan bizi cezalêêr? Düşünerim adamcasına.

6Olmaz! Ölä olursa, nicä Allah bu dünneyi daava edäbilir?

7Eer Allahın aslılıı benim yalanımnan Onun metinniini taa ii açarsaydı, ozaman neçin bän günahker gibi daava olayım?

8Neçin demeyelim «Kötülük yapalım, ki bundan iilik çıksın»? Kimisi bizi kötüleer hem söleer, ani biz ölä deeriz. Onnar, nicä düşer, daavalı olaceklar.

Hepsi kabaatlı

9Öleysä, ne deyecez? Biz iudeylär taa üstünüz başka milletlerdän mi? Elbetki diiliz. Zerä biz öncä gösterdik, ki hepsi – iudeylär dä, urumnar da – günahın zapında.

10Nicä yazılı: «Dooru kimsey yok, bir kişi bilä yoktur.

11Annayan kimsey yok, Allahı aarayan kimsey yok.

12Hepsi yoldan saptılar, hepsi faydasız oldular. İilik yapan yok, bir kişi bilä yoktur».

13«Aazları – açık mezardır, dilleri yalan söleer». «Dudaklarının altında yılan zihiri var».

14«Aazları betvaylan hem acı laflarlan dolu».

15«Ayakları kan dökmää alatlêêr,

16kayıplık hem zeet yollarında.

17Selemet yolunu onnar bilmeerlär».

18«Aklılarına Allahtan korku gelmeer».

19Ama biz bileriz, ne sölener Ayoz Zakonda, sölener onnara, kim Zakonun zapında, ölä ki herbir aaz kapansın, da bütün dünnä Allahın önündä kabaatlı kalsın.

20Zerä Zakonu tamannamaklan Allahın önündä kimsey dooru çıkmayacek, zerä Zakondan belli olêr, ani insan günahker.

Dooruluk salt inannan

21Şindi açıldı, ani Allah, bakmayarak Zakona, insanı dooru sayêr. Bunun için Zakon hem proroklar şaatlık ettilär.

22Allah hepsini inancıları dooru sayêr inannarınnan İisus Hristoza. Çünkü ayırmak yoktur.

23Hepsi günaha düştülär, Allahın metinniinä etişämedilär.

24Hepsi ödeksiz dooru sayılêrlar Allahın iivergisinnän, zerä onnarı İisus Hristos kurtardı.

25Allah Hristozu kurban yaptı, ani inannan kabledilir, ki günahlar Onun kanınnan afedilsin. Bununnan Allah gösterdi, nicä insanı dooru sayêr, zerä öncä yapılmış günahları cezasız braktı.

26Allah dayandı, o beterä, ki göstersin, nicä dooru sayêr büünkü vakıtta insanı. Butürlü O hem Kendi dooruluunu koruyêr, hem hepsini dooru sayêr, kim İisusa inanêr.

27Şindi bizä ne kaldı, üünelim? Yok neylän üünelim. Bunun sebebi nedir? Zakonu tamannamaklan mı dooru sayılêrız? Diil, ama salt inannan.

28Zerä biz inanêrız, ani insan dooru sayılêr inannan, ama diil Zakonu tamannamaklan.

29Allah ne, salt iudeylerin Allahı mı, diil mi başka milletlerin dä? Elbetki, başka milletlerin dä.

30Çünkü Allah birdir, Angısı kesikli olannarı da, kesiksiz olannarı da inannan dooru sayêr.

31Öleysä, ne, inannan Ayoz Zakonu kuvetsiz mi yapêrız? Olmaz! Ama inannan Zakonu kaavileeriz.