‏ Romans 4

Avraamın inanı bizä örnek

1Ne deyecez bizim güüdeycesinä dedemizin Avraamın durumu için?

2Eer Avraam dooru sayılaydı kendi işlerinnän, ozaman vardır neylän üünsün insanın, ama diil Allahın önündä.

3Zerä Ayoz Yazı ne deer? «Avraam inandı Allahı, da bu ona dooruluk sayıldı».

4Kim işleer, ödeeni saymaz baaşış, ama sayêr hak.

5Kim kendi işlerinä umutlanmêêr, ama inanêr Ona, Kim allahsızı dooru sayêr, inannan ona dooruluk sayılêr.

6David dä mutlu sayêr onu, kimi Allah, bakmayarak yaptıklarına, dooru sayêr. O dedi:

7«Odur mutlu, kimin zakonsuzluu afedildi hem günahları örtüldü!

8Ne mutludur o adam, kimin günahlarını Allah esaba koymayacek!»

9Bu mutluluk sade kesikli olannar için mi osa kesiksiz olannar için dä mi? Biz deeriz: «Avraam kendi inanınnan dooru sayıldı».

10Nezaman dooru sayıldı? Kesikliktän öncä mi osa kesikliktän sora mı? Diil kesikliktän sora, ama kesikliktän öncä.

11Kesiklik nışanını kabletti nicä dooruluk mühürü. Dooruluu inannan edendi, taa kesikli olmadıynan. Ölä ki, o oldu hepsi kesiksiz inancıların bobası, ki onnar da dooru sayılsınnar deyni.

12Hem kesikli olannarın da bobası oldu, kim diil sade kesikli, ama bobamızın Avraamın izlerindän giderlär, angısı inanardı, taa kesikli olmadaan.

İnannan adamak edeniler

13Zerä Zakonnan verilmedi adamak Avraama hem onun uşaklarına, ki dünneyi elä alsınnar, ama dooruluklan, ani edeniler inannan.

14Eer mirasçılık olaydı salt onnara, kim Zakonu tutêr, ozaman inan boşuna kalaceydı, adamak da faydasız olaceydı.

15Zerä Zakon Allahın üfkesini getirer, ama neredä yok zakon, orada yok zakon basması da.

16Onuştan adamak inana görä edenilir, ki Allahın iivergisindän tutunsun da butürlü kaavilensin Avraamın hepsi uşaklarına, diil sade onnara, kim Zakonu tutêr, ama hepsinä dä, kim inanêr Avraam gibi, angısı hepsimizin bobası.

17Nicä var yazılı: «Seni, boba olasın çok milletlerä, yaptım». O Allahın önündä, Kimi inandı, hepsimizä boba oldu. Allah Odur, Kim dirilder ölüleri hem varlaa çaarêr onnarı, ne yok.

18Umut yokkan, Avraam umutlandı hem inandı. Butürlü oldu çok milletlerin bobası, nicä Allah ona adamıştı: «Senin senselän okadar çok olacek, yıldızlar gibi».

19Çünkü onun inanı yufkalanmadı, o bakmadı ölü gibi güüdesinä, ani yakın üz yaşındaydı, hem Sarranın uşaksızlıına.

20O Allahın adamasında ikilämedi hem inansız olmadı, ama inanı kaavilendi da Allahı metinnedi.

21Bütün ürektän inandı, ani Allah ne adadı, hepsini tamannayabilir.

22Onuştan o inanınnan dooru sayıldı.

23Diil salt Avraam için yazılı, ani «ona dooruluk sayıldı»,

24ama bizim için dä, ani dooru sayılacez, zerä inanêrız Ona, Kim diriltti Saabimizi İisusu ölüdän.

25İisus bizim günahlarımız için ölümä verildi hem bizim dooru sayılmamız için dirildildi.