‏ Romans 7

Zakondan azat

1Ne, bilmeersiniz mi, kardaşlar – lafederim onnara, kim biler Ayoz Zakonu – Zakonun var kuvedi adamın üstünä okadar vakıt, nekadar adam yaşêêr.

2Sözgelişi: Zakona görä evli karı baalı kocasınnan, nekadar vakıt kocası yaşêêr, ama eer kocası ölürseydi, karı boşanêr steonozluk zakonundan.

3Ama okadar vakıt, nekadar kocası yaşêêr, eer başka bir adamnan yaşarsaydı, orospu sayılêr. Ama eer kocası ölürseydi, karı Zakondan boşanêr, da ozaman, eer başka adama evlenärseydi, orospuluk yapmêêr.

4Hep ölä siz dä, kardaşlar, çünkü pay alêrsınız Hristozun güüdesindän, öldünüz Zakon için, ki baalanasınız başkasına – Ona, Kim ölüdän dirildi. Bu oldu, ki faydalı olalım Allahın izmetindä.

5Zerä, yaşarkan tenimizä görä, günahker havezleri, Zakondan debreştirilmiş, işlärdilär bizim güüdemizin eklerindä, da yaptıklarımızın meyvası ölümdü.

6Ama şindi, ölüp, boşandık o zakondan, angısınnan baalıydık, ki izmet edelim Allaha Duhun eniliinnän, diil bukvanın eskiliinnän.

Zakon açıklêêr günahı

7Ne deyecez? Ayoz Zakon günahker mi? Olmaz! Buna karşı, o Zakon olmasaydı, biz günahı tanımayaceydık. Sözgelişi, bän bilmeyeceydim, nedir tamahlık, eer Zakon demeyeydi: «Tamahlanmayasın».

8Ama günah, faydalanarak sımarlamaklan, bendä üzä çıkardı hertürlü tamahlık. Zerä neredä yok Zakon, orada günah ölü.

9Bän vakıdın birindä diriydim, açan bilmärdim Zakonu. Ama açan peydalandı sımarlamak, günah dirildi, bän dä öldüm.

10Sımarlamak, ani lääzımdı yaşamak versin, beni ölümä götürdü.

11Zerä günah, sımarlamaklan faydalanarak, aldattı beni da bununnan öldürdü.

12Ölä ki, hiç lafsız, Zakon – ayoz, sımarlamak da ayoz, dooru hem ii.

13Ozaman ii bişey, çıkêr, bana ölüm getirdi? Olmaz! Ama günah, faydalanarak ii bişeylän, bana ölüm getirärdi, ki sımarlamaklan açılsın günah nekadar günahlı.

Günahlan düüşmäk

14Hakına bileriz, ani Zakon duhça bişey, ama bän tendän bir insanım, satılı günaha çırak gibi.

15Bilmeerim, ne yapêrım, zerä yapmêêrım, ne isteerim, ama yapêrım onu, nedän azetmeerim.

16Ne yapêrım, bununnan kayıl diilseydim, bundan görüner, ki kablederim, ani Zakon ii.

17Bundan tanınêr, ani artık bunu yapmêêrım bän, ama günah yapêr, ani bendä yaşêêr.

18Bilerim, ani bendä, doorusu, benim tenimdä, yok iilik. Bendä var ii istemeklär, ama yok kuvet, yapayım ne ii.

19Zerä iilik, ani isteerim yapmaa, yapmêêrım, ama kötülük, ani istämeerim yapmaa, onu yapêrım.

20Çünkü yapêrım, ne istämeerim, bunu yapan artık diil bän, ama günah, ani bendä yaşêêr.

21Ölä ki, kendimdä bulêrım bir zakon, ani istärkän iilik yapmaa, kötülük bendä hazır durêr.

22İçyankı adamdan hoşluk alêrım Allahın Zakonundan.

23Ama görerim benim güüdemin eklerindä bir başka zakon, ani düüşer zakona karşı, angısını kablederim fikirimnän, hem beni esir eder günah zakonunnan, ani işleer benim güüdemdä.

24Zavallıyım bän! Kim kurtarabilir beni bu güüdedän, ani ölümä götürer?

25Şükür ederim Allaha, Saabimiz İisus Hristos kurtarêr beni. Ölä ki, bän kendim fikirimnän izmet ederim Allahın Zakonuna, ama tenimnän izmet ederim günah zakonuna.