‏ Proverbs 23

Jecha torbaffaa

1Ati yeroo waa nyaachuuf bulchaa tokko wajjin teessutti,
waan fuula kee dura jiru hubadhuu ilaali;
2ati yoo nyaataaf fedhii guddaa qabaatte,
qoonqoo kee irra billaa kaaʼi.
3Waan nyaanni sun nama gowwoomsuuf,
miʼaa isaatti hin gaggabin.

Jecha saddeettaffaa

4Sooromuuf jettee of hin dadhabsiisin;
of qabuufis ogummaa qabaadhu.
5Sooromni yommuu ati ija irra buufattutti ni bada;
inni dhugumaan Baallee baafatee
akkuma risaa gara samiitti ol barrisaatii.

Jecha saglaffaa

6Buddeena doqnaa hin nyaatin;
cidha isaas hin kajeelin;
7inni yeroo hunda waaʼee gatii yaadaatii.
Inni, “Nyaadhuu dhugi” siin jedha;
garaan isaa garuu si wajjin hin jiru.
8Ati waanuma xinnoo nyaatte sana ni diddigda;
dubbii kee gaarii sana illee ni dhabda.

Jecha kurnaffaa

9Sababii inni ogummaa dubbii keetii tuffatuuf
ati nama gowwaatti hin dubbatin.

Jecha kudha tokkoffaa

10Dhagaa daangaa durii hin dhiibin
yookaan lafa qotiisaa ijoollee abbaa hin qabneetti hin darbin.
11Furiin isaanii jabaadhaatii;
inni gara isaanii goree sitti falma.

Jecha kudha lammaffaa

12Qalbii kee gara gorsaatti, gurra kee immoo
gara dubbii beekumsaatti deebifadhu.

Jecha kudha sadaffaa

13Ijoollee kee adabachuu hin dhiisin;
yoo ati arcummeedhaan adabde isaan hin duʼan.
14Arcummeedhaan isaan adabiitii
lubbuu isaanii duʼa oolchi.

Jecha kudha afraffaa

15Yaa ilma ko, yoo garaan kee ogeessa taʼe,
garaan koo ni gammada;
16yoo arrabni kee waan qajeelaa dubbate,
keessi koo baayʼee gammada.

Jecha kudha shanaffaa

17Garaan kee cubbamootatti hin hinaafin;
garuu yeroo hunda Waaqayyoon sodaadhu.
18Ati dhugumaan gara fuulduraatti abdii qabda;
abdiin kees hin citu.

Jecha kudha jaʼaffaa

19Yaa ilma ko, dhaggeeffadhu; ogeessa taʼi;
qalbii kee daandii qajeelaa irra buufadhu.
20Warra daadhii wayinii baayʼee dhuganitti
yookaan warra foonitti gaggabanitti hin makamin;
21machooftuu fi albaadheyyiin ni hiyyoomu;
hirriba baayʼisuunis moofaa nama uffachiisa.

Jecha kudha torbaffaa

22Abbaa kee kan si dhalche dhagaʼi;
haadha kees yeroo isheen jaartu hin tuffatin.
23Dhugaa bitadhu malee hin gurgurin;
ogummaa, qajeelfamaa fi hubannaas bitadhu.
24Abbaan nama qajeelaa gammachuu guddaa qaba;
namni ilma ogeessa qabu isatti gammada.
25Abbaan keetii fi haati kee haa gammadan;
isheen si deesse sun haa ililchitu!

Jecha kudha saddeettaffaa

26Yaa ilma ko, garaa kee naa kenni;
iji kees karaa koo haa ilaalu;
27sagaagaltuun boolla gad fagoodhaatii,
niitiin ganda labeenis boolla bishaanii dhiphaa dha.
28Isheen akkuma saamtuutti riphxee nama eeggatti;
namoota gidduuttis warra hin amanamne baayʼifti.

Jecha kudha saglaffaa

29Eenyutu, “Anaaf wayyoo!” jedha? Eenyutu gadda qaba?
Eenyutu lola qaba? Eenyutu komii qaba?
Eenyutu sababii malee madaaʼa? Kan iji isaa diimatu eenyu?
30Warra daadhii wayinii dhuguu irra akka malee turan,
warra daadhii wayinii walmakaa afaaniin qabuu dhaqanii dha.
31Yeroo inni diimatutti, yeroo inni billillee keessa ol xixinniqutti,
yeroo inni suuta jedhee gad buʼutti
daadhii wayinii ija itti qabdee hin ilaalin.
32Dhuma irratti akkuma bofaa nama idda;
akkuma buutiis nama ciniina.
33Iji kee waan haaraa arga;
qalbiin kees jalʼina yaada.
34Ati akkuma nama walakkaa galaana guddaa ciisuu ti;
akkuma nama fiixee utubaa doonii irra ciisuu taata.
35Ati akkana jetta; “Isaan na dhaʼan;
ani garuu hin miidhamne!
Isaan na tuman; garuu natti hin dhagaʼamne!
Ani dhugaatii biraa barbaaddachuuf yooman dammaqa?”