Psa 143 | GazHAHl | STEP | Yaa Waaqayyo , kadhannaa koo naa dhagaʼi; gurra kees gara waammata kootiitti deebisi; amanamummaa fi qajeelummaa keetiin, na gargaari.

‏ Psalms 143

Gad of qabanii Waaqa Kadhachuu

Faarfannaa Daawit.

1 Yaa Waaqayyo, kadhannaa koo naa dhagaʼi;
gurra kees gara waammata kootiitti deebisi;
amanamummaa fi
qajeelummaa keetiin, na gargaari.
2 Ati garbicha kee murtiitti hin dhiʼeessin;
namni lubbuun jiraatu kam iyyuu fuula kee duratti qajeelaa mitiitii.
3 Diinni lubbuu koo ariʼachaa jiraatii;
jireenya koos butuchee biyyootti make.
Akkuma warra dur duʼaniittis
dukkana keessa na jiraachiseera.
4 Kanaafuu hafuurri koo na keessatti gaggabeera;
onneen koos na keessatti rifatteerti.

5 Ani guyyoota durii nan yaadadha;
waan ati hojjette hundas irra deddeebiʼee nan yaada;
waan harki kee hojjete illee nan heda.
6 Harka koo gara keetti nan diriirfadha;
lubbuun koos akkuma lafa gogaa si dheebotti.

7 Yaa Waaqayyo, dafii deebii naa kenni;
hafuurri koo dadhabeera.
Fuula kee na duraa hin dhoksin
yookaan ani akka warra boolla buʼanii nan taʼa.
8 Ani waanan si amanadheef,
akka ani ganama ganama oduu jaalala keetii dhagaʼu godhi.
Ani lubbuu koo gara keetti ol nan kaasaatii,
karaa ani irra deemuu qabu natti argisiisi.
9 Yaa Waaqayyo, ani akka ati na dhoksituuf

sitti nan baqadhaatii,
diinota koo jalaa na baasi.
10 Ati sababii Waaqa koo taateef,
akka ani fedhii kee guutu na barsiisi;
hafuurri kee gaariin sun
karaa wal qixxee irra na haa qajeelchu.

11 Yaa Waaqayyo, maqaa keetii jedhiitii lubbuu koo jiraachisi;
qajeelummaa keetiinis rakkina keessaa na baasi.
12 Ati sababii na jaallattuuf diinota koo fixi;
waan ani garbicha kee taʼeef,
warra na cunqursan hunda barbadeessi.