Isa 16:6-12 | GazHAHl | STEP | Nu of tuulummaa Moʼaab, of guddisuu fi kooruu ishee, of tuuluu fi addaggee taʼuu ishee dhageenyeerra; of jajuun ishee garuu faayidaa hin qabu.

‏ Isaiah 16:6-12

6 Nu of tuulummaa Moʼaab,
of guddisuu fi kooruu ishee,
of tuuluu fi addaggee taʼuu ishee dhageenyeerra;
of jajuun ishee garuu faayidaa hin qabu.
7 Kanaafuu Moʼaabonni ni booʼu;
isaan tokkummaadhaan Moʼaabiif booʼu.
Namoota Qiir Hareeshetiif
faarsanii booʼuudhaan gaddu.
8 Lafti qotiisaa Heshboon,
mukni wayinii Sibimaas coollageera.
Bulchitoonni sabootaa
mukkeen wayinii filatamoo
kanneen duraan Yaʼizeerin gaʼanii
gara gammoojjiitti babalʼatan dhidhiitaniiru.
Lataan isaanii dheeratee hamma galaanaatti diriire.
9 Kanaafuu ani akkuma Yaʼizeer boosse sana,
mukkeen wayinii Sibimaatiif nan booʼa.
Yaa Heshboon, yaa Eleʼaalee,
ani imimmaan kootiin sin jiisa!
Ililleen yeroo midhaan siif gaʼeetii fi
gammachuun yeroo midhaan siif

haamamu ture sun hafeera.
10 Ililchuu fi gammaduun iddoo biqiltuu keessaa badaniiru;
namni tokko iyyuu iddoo dhaabaa wayinii keessatti

hin faarfatu yookaan hin ililchu:
sababii ani ilillee balleesseef
namni iddoo wayinii itti cuunfanitti wayinii dhidhiitu tokko hin jiru.
11 Garaan koo akkuma baganaa faarsee Moʼaabiif booʼa;
keessi koos Qiir Hareeshetiif booʼa.
12 Moʼaab yoo iddoo ol kaʼaatti mulʼatte,
isheen ofuma dadhabsiifti;
yoo kadhannaaf gara iddoo qulqulluu ishee dhaqxe
kunis faayidaa tokko illee hin qabu.