1Cor 11 | GyzSC | STEP | Pa̱la̱n ilgwe a pa̱li wu na̱k gwe a pa̱l ilgwe Almasihu pa̱li wu.

‏ 1 Corinthians 11

1 Pa̱la̱n ilgwe a pa̱li wu na̱k gwe a pa̱l ilgwe Almasihu pa̱li wu.

Ga̱ɓa ten yitlat gaa ga̱ modli

2 A ta̱skii na̱k ɗe ba̱ kaa ma̱sa̱na̱n ka̱ mas ilgwe ka̱a̱ na̱ma pa̱lti sowu, ka̱a̱ ngip ilgwe a mbokikii ang dani wu ^{▼▼SogoKangwe asa̱ pa̱l wul wu} na̱k gwe ka̱a̱ kumi wu.

3 A lami ɗe ta̱k yisi ɗe Almasihu ka̱ɗe bacina ga̱ mas maani, a maani ka̱ɗe bacina ga̱ modli. A Nya ka̱ɗe bacina ga̱ Almasihu. 4 Mas maani gwe ngem Nya, sogo ta̱ dla̱m ga̱ɓa ga̱ Nya na̱ gaa ga̱ yitle ka̱ go, ta̱ mbul bacina gwasi. 5 Mas kili gwe ngem Nya, sogo ta̱ dla̱m ga̱ɓa Nya a ba̱ta̱ yitla gaa gwas ka̱ sogo, ta̱ mbul bacina gwasi. Ndakce suk ta̱s wutl gaami ka ka̱n. 6 Kume kili mbala̱n a yitla gaa gwas ka̱ sowu, ta̱s wutl ka. A kume wutlti ka sogo pashti ka cit nsha wu, ta̱s yitle ka. 7 Ba maani wo mbun ɗe ta̱s yitla gaa gwas ka̱ so, na̱k ɗe maani wo ta̱ mbok ang ten kangwe Nya ni suk nalti gwas wu. Ama modli wo ta̱ mbok ang ten nalti ga̱ maani. ^{▼▼11:4-7 Sogo 4 Mas ba maani gwe ta̱ ngem Nya sogo dla̱m ilgwe aya pi wu na̱ tlal ma̱dla̱n gaa go ta̱ mbul gaa gwasi. 5A mas kili gwe ta̱ ngem Nya sogo dla̱m ilgwe aya pi wu a ba̱ta̱ yitla gaa gwas ka̱ so go ta̱ mbul gaa gwasi. Ta̱ kak-kak suk modli jwe asa̱ yil ɗa̱ka̱ tantu jwasa̱n ka̱wu so. 6 Kume kili mbala̱n yitla gaa gwas sogo, ta̱s ni ɗe kili gwe sa̱ yisti na̱ wutlti gaa wu, ama na̱k ɗe ɗe wul nsha ka̱n ta̱ kili mbala̱n wutl gaa ka̱wu, ta̱s zaki ta̱ ma̱dla̱n gaami te ɗa. 7Ba maani mbun ɗe ta̱s zak tlal ma̱dla̱n gaa so} 8 Maani wo tet ten kili mbala̱n ka̱n ta̱ yil so, ama modli wo tet ka̱ ba maani ka̱n ta̱ yili. 9 Sa̱ pa̱l maani a gaa ga̱ modli so, ama sa̱ pa̱l modli a gaa ga̱ maani. 10 Yek laki yek ni ngetli ta̱ kili mbala̱n yitla gaa gwas ka, ta̱s mbok ang ɗe ta̱ ni atl ɗa̱ ba maani, na̱k ɗe Mil Shinti ji Nya na̱ma yenti wu.

11 Mas na̱ nu, ka̱ kopti ga̱ Bagaa wo, modli ni kak-kak suk maani so, a ba̱ maani ni kak-kak suk modli so. 12 Na̱k gwe ɗe modli wo tet ten maani ka̱n ta̱ yil wu, nu ka̱n, maani mago modli ka̱ za̱ti. Ama mas wul wo sut mal Nya ka̱n yili. 13 Ɓo yeni na̱ gaa gwaka̱n, mbun ɗe ta̱ kili mbala̱n ngem Nya a gaa gwas ni ga̱ ɓuli ka̱ lu motgaa ga̱ ma̱n kopti ya? 14 Ai pa̱lti ga̱ ba maani mboka̱n ang ɗe wul nsha ka̱n ta̱s zak ma̱dla̱n gaa gwasi ta̱ tlali. 15 Ama kume ma̱dla̱n gaa ga̱ kili mbala̱n tlal go nalti ka̱n a malti, na̱k ɗe Nya pa̱lit ma̱dla̱mi ta̱ yitlet gaa ka̱wu. 16 Kume ma̱lgon lam dla̱kti ga̱ɓa ten ga̱ɓa gwisi go, mi wo ma̱ yis ilgon so ban na̱ gwisi sowu, a motgaa ga̱ ma̱n kopti mago nu.

Da̱lti ka̱n ten ngukti wul ga̱ Bagaa Yesu

17 Ten iljin ɗe ba hwikii go, ba ta̱skii so, na̱k ɗe motgaa gwaka̱n wo hwa motgaa ka̱ sowu. 18 Ten ndat zhile wo a kumi ɗe kume ka̱a̱ mogaa wu, a ba̱ bi gwaka̱n a ni ɗe na̱m so, yek a ɓa kan naa ga̱ɓa jon ɗe gem. 19 Nuk ni, bi gwaka̱n a ni ɗe na̱m so, ta̱ mbala̱n yis ma̱jwe na̱ma kopti Nya na̱ gem wu ɗa. 20 Ka̱a̱ mogaa wugo, ngukti wul ga̱ Bagaa ka̱n aka̱a̱ nguk so. 21 Ka̱a̱ mogaa wi ɗe ka̱a̱ ɓa nguk wul go ko wokko ata̱ nguk gwasi. Kuza̱n na̱ma tlot ga̱ ma̱li gon a ma̱li gon wo ta̱ nguk wi hal ɓa tloti. 22 Boo nikii ɗa̱ɗe ta̱k nguka̱n aka̱a̱ tla sa? Ko motgaa ga̱ ma̱n kopti ka̱n kaa mbuli? Ko ma̱jwe ba̱ ilgon nisi ɗa̱ sowu ka̱n ka̱a̱ lami ɗe ta̱ nsha cisi? Yek ka̱a̱ lami ɗe ta hwikii ye, ni wu? Ta ta̱skii ten ilgwe ka̱a̱ na̱ma pa̱lti gwa? Ko njaa, ba ta̱skii so.

Ndat ngukti wul ga̱ Bagaa

23 Ilgwe a nikii ma hwiti go yek ɗe, ten gas gwe sa̱ ba̱l bi Bagaa Yesu wu yek ta̱ kan burodi. 24 Ta̱ pa̱l hwol tuk na̱ Nya wugo, yek ta̱ caali, yek ta̱ wule, «Ga̱n go dli gi ka̱n, gwe Nya ba̱li ga̱ kisti gwaka̱n wu. ngusi pa̱lti nu, ta̱k daama̱n ninini ɗa.» 25 Yek ta̱ po pa̱li nu ɗa kaal ɗa̱ ngukti wul ga̱ ka̱ gasisi, yek ta̱ kan mbuke, yek ta̱ wule, «Mbuka ga̱n go yek ɗe ga̱ pyal dla̱lla̱t ga̱ɓa ga̱ hwulan gini. Dlip ka̱a̱ tla wugo aka̱a̱ ngusi daamti gini.» ^{▼▼Yen Yil 24:6-8; Irm 31:31-34.} 26 Dlip kume ka̱a̱ nguk burodisi yek ka̱a̱ tla ka̱ mbuke wu, ka̱a̱ na̱ma ga̱ɓa ten bi ma̱shka̱n ga̱ Bagaa se gas gwe ta pal sut wu.

27 Yek laki, mas ma̱lgwe nguk burodisi yek ta̱ tla ka̱ mbuka ga̱ Bagaa ba̱ kangwe mbun ɗe ta̱s pa̱li wu sogo, ta̱ pa̱li byas wul dli ga̱ Bagaa suk hwulan gwas wi. 28 Ta̱ mbala̱n daamti paa apaa ta̱ nguk burodisi ata̱ tla ka̱ mbuke. 29 Mas ma̱lgwe nguk burodisi yek ta̱ tla ka̱ mbuke a ba̱ta̱ yis da̱mti ga̱ dli Bagaa, ngukti suk tlatisi ɗe ta̱ pa̱li go ta̱ nima tulla̱t nolti gaa gwasi. 30 Yek laki yek ba̱ mbala̱n wonti ka̱ kii nda̱l so, a jon wo cwo na̱ma cit gwasa̱n, a jon wo yek sa̱ ma̱shi. 31 Ama kume ma̱ nola̱n gaa ga̱na̱n paa go, Nya a nola̱nni so. 32 A kume Bagaa ka̱ nola̱nni wu, ta nola̱nni ba̱s nola̱nni suk naa mbala̱n ji dii atl so.

33 Yek laki yek a nikii ma hwiti ɗe, kume ka̱a̱ mogaa wi ɗe ta̱k nguka̱n ilga̱ nguki ga̱ Bagaa go, ɓa̱ta̱n yilkeni. 34 Ma̱lgwe kuza̱n na̱ma tlot gwas go, ta̱s nguk wul gwas a lubii, ba̱ motgaa gwaka̱n laki a Nya nolkii so.

Naa wul jwe yi kaal go, a tul wugo ba hwikii ilgwe kaa pa̱li wu.