‏ Luke 23

Yesu a cina ɗa̱ Bilatus ka

1Yek mas kiɗi ji ma̱n Yehudasi tlinya yek sa̱ ta̱la Yesu mal Bilatus gobna, 2yek sa̱ ndet za̱t duu gaa ɗe, «Ma̱ mbi ma̱lga̱n ten gilla̱t ga̱ mbala̱n jina̱n ɗe ba̱s ba̱l wulpi boo gwasa̱n Kaisar guu so. A ta̱ na̱ma wulti ɗe tik ɗe Almasihu guu.»

3Yek Bilatus ngem Yesu ɗe, «Kik ɗe guu ga̱ ma̱n Yehuda?»

Yek Yesu wule, «Nu ka̱n ni.»

4Yek Bilatus hwi kiɗi ma̱n da̱nti ka̱ lubii ga̱ Nyami suk naa mbala̱n ɗe, «Yek laki yek ka̱a̱ tulla̱t ye? Ami wo a mbi byas ilgwe ta̱ pa̱li wu so.»

5Yek mbala̱mi ngusi wulti ɗe, «Ga̱ɓa gwe ata̱ hwi mbala̱n wu ka̱ɗe ma̱n tlilti mbadl gwasa̱n ka̱ mas ba̱n ji Yehudiya, tet Galili ka̱n ta̱ nde, yek tik ɓallu a ɗee.»

Sa̱ ta̱la Yesu mal Hiridus

6Bilatus kumi nu wugo yek ta̱ kum ga̱zi ɗe ko Yesu wo ma̱n Galili ka̱ɗe ti. Yek sa̱ wulti ɗe ma̱n Galili ka̱n. 7Bilatus kumi ɗe Yesu wo ka̱ atl ga̱ Hiridus guu ka̱n ta̱ ni wu, yek ta̱ wulsi ɗe, ta̱s ta̱lat malti na̱k ɗe Hiridus guu ni Wurshelima ka̱ multi jwisi wu.

8Hiridus guu yen Yesu wugo, yek ta̱ pa̱l hwol tuki i’e na̱k ɗe ta̱ la̱m multi ata̱ na̱ma kumti ga̱ɓa tenti wu. Ta̱ lami ta̱s yen wul cit ɓanti gwe a Yesu pa̱li wu. 9Yek ta̱ kum ga̱s wul wonti mal Yesu ama yek ba̱ Yesu wulti ɗe ilgon so. 10Kiɗi ma̱n da̱nti ka̱ lubii ga̱ Nya suk ma̱n yisti mba̱t ga̱ Musa ni ka̱li asa̱ na̱ma ta dla̱mti byas wul tenti. 11Yek Hiridus suk ma̱n hapti dlo jwas wulit wul jon, yek sa̱ wulit wul jon yek sa̱ lakit bal luka̱l, yek sa̱ palla̱t su mal Bilatus ka. 12Ndok ten gasi, yek Hiridus suk Bilatus da̱n ɗe yela̱n, na̱k ɗe yela̱n dlanti ka̱ɗe si wu.

Sa̱ ba̱l bi ga̱ Yesu ta̱s tloti

13Yek Bilatus mo kiɗi ma̱n da̱nti ka̱ bii ngemti Nya suk kiɗi ji ma̱n ba̱mi suk mbala̱mi mas. 14Yek ta̱ wulsi ɗe, «Ka̱a̱ tulli ma̱lga̱n mala̱n ɗe ta̱ na̱ma gilla̱t ga̱ mbala̱n, ama yek a bodla̱lti yek baa mbit na̱ byas ilgon so. 15A ba̱ Hiridus mbit na̱ byas ilgon so pak, yek laki yek ta̱ palla̱t tet mala̱nni. Kiik ka yeni wu, ta̱ pa̱l ilgwe a laki ɗe ta̱n tlot wu so. 16Yek laki ɗe ɓot ka̱n ba ɓoti a paa a zakti.» ▼

▼Ka̱ lishti jon ji cina wo sa lishi ɗe, ti. 17 Ka̱ Motgaa daamti ɗakcit boo ji Israila gwisi ka̱n a Bilatus kul laki asa̱ zak ɗe na̱m ka̱ ma̱jwe sa̱ ɓalsi ju.

17– 18Yek mbala̱mi ɓel bi yek sa̱ ngusi wulti na̱ nda̱lti ɗe, «Za̱n gaa na̱ ma̱lga̱n! A ka̱ zakini Barabas.» 19Barabas tulli dlanti ka̱ dlo ga̱ mbala̱n a Wurshelima, yek ta̱ po tlo ma̱lgon. Yek laki yek sa̱ ɓalti.

20Yek Bilatus wulsi ɗa̱ɗe, ta̱ lami ɗe ta̱s zak Yesu. 21Yek sa̱ ngusi dla̱mti na̱ nda̱lti ɗe, «Ɓaka̱nti ten guda̱l yencin ta̱s ma̱shi!»

22Yek Bilatus po wulsi asa̱mi na mekan ɗe, «Yek laki ɗe ka̱ lami ta̱ ma̱lga̱n ma̱shi ye? Byas wul yek ta̱ pa̱li ye? A mbit na̱ byas ilgwe a laki ta tlot wu so. Ba laki asa̱ ɓot na̱ tlemɗi a paa a zakti.»

23Ama yek sa̱ nge, yek sa̱ ngusi wulti na̱ nda̱lti ɗe, «Ɓaka̱nti ten guda̱l yencin!» Yek ga̱ɓe gwasa̱n wu ka̱ dla̱li. 24Yek Bilatus pa̱lisi ilgwe sa̱ lami wu. 25Yek ta̱ zakisi Barabas, ma̱lgwe sa̱ ɓalti ten ɗe ta̱ tlo ma̱lgon wu, yek ta̱ ba̱lsi Yesu ta̱s pa̱lit ilgwe sa̱ lami wu.

Sa̱ ɓak Yesu ten guda̱l yencin

26Ma̱n hapti dlo na̱ma za̱t gaa na̱ Yesu nugo, yek sa̱ mo suk ma̱lgon asa̱ mbet ɗe Siman ma̱n ba̱n Sayirin ta̱ na̱ma la̱t Wurshelima. Yek sa̱ dopti yek sa̱ zit guda̱l yencin gwe sa̱ ɓak Yesu dani wu gaa, yek sa̱ lakti ta̱s kop Yesu na̱ nali. 27A mbala̱n wonti na̱ma kopti gwasa̱n suk modli jon asa̱ na̱ma desti lee. 28Yek Yesu balla̱ti, yek ta̱ wulsi ɗe, «Modli Wurshelima, po kuli ninini gaa so, kuli gaa gwaka̱n suk mil jwaka̱n. 29Gas gon wo ka wule, 30Ten gasisi ka̱n
«
asa̱ wul za̱nda̱l ɗe, «Yitlani ka.» > ▼

▼Yen Hos 10:8

31Kume sa̱ pa̱li nu a tlindi yi diki go, nii ka̱n a pi gwi ɗe tlindi koo wu?»

32Yek sa̱ ta̱la mbala̱n ɗe lop jon jwe pa̱l byas wul wu ta̱s tlosi pak suk Yesu. 33Yek sa̱ ta̱lasi ka̱lu gwe asa̱ mbe ɗe «Is Gaa» wu. Ka̱li ka̱n sa̱ ɓakti ten guda̱l yencin suk mbala̱n ɗe lop jwe pa̱l byas wul ju. Gon ni ten guda̱l yencin ten ka̱t ang shinti gwasi a gon wo ten ka̱t ang yali gwasi. 34Yek Yesu wule, «Aba, taasi ma̱jin byas wul jwasa̱n ka, na̱k ɗe ba̱sa̱ yis ilgwe sa̱ na̱ma pa̱lti wu sowu.» Yek sa̱ huul luka̱l ga̱ Yesu ka̱ dlo gwasa̱n ten botlti ga̱ ma̱lgwe a kan wu.

35Yek mbala̱n ngusi yenti ga̱ Yesu, yek kiɗi jwasa̱n wulit wul jon ɗe, «Ta̱ kis naa mbala̱n, ta̱s kis gaa gwas la kume tik ɗe Almasihu gwe Nya botlti wu.»

36Yek ma̱n hapti dlo jwe ɓakti ten guda̱l yencimi wu wulit wul jon, yek sa̱ takit mbayi ze. 37Yek sa̱ wulti ɗe, «Kume kik ɗe guu ga̱ ma̱n Yehuda go, kis gaa gwa la.»

38Yek sa̱ lishi ten guda̱l yencimi to gaa ɗatka̱ɗe, «Ma̱lga̱n ka̱ɗe guu ga̱ ma̱n Yehuda.»

39Yek ɗe na̱m ka̱ ma̱jwe pa̱l byas wul ɗe sa̱ ɓaksi ten guda̱l yencin mal Yesu wu, hwit byas ga̱ɓa ɗe, «Ale kik ɗe Almasihu nwa? Kis gaa gwa aka̱ kisnii pak la.» 40Yek ma̱li gon wu matlti yek ta̱ wulti ɗe, «Ɓanti ga̱ Nya mago cik sa? Ɗe ilgwe sa̱ pa̱lini wu ka̱n sa̱ pa̱lit wu. 41Mi wo byas ilgwe ma̱ pa̱li wu mbuki ta̱s pa̱lini nu, ama ma̱lga̱n go ta̱ pa̱l byas ilgon so.»

42Yek ta̱ wul Yesu ɗe, «A ka̱ yisi lu ne, kume ka̱ ɓal ɗe guu wu.»

43Yek Yesu wulti ɗe, «A nikma hwit gem ɗe, ase go ka da̱n suk ami ka̱ Boo ga̱ Nya.»

Ma̱shka̱n ga̱ Yesu

44Sa̱ ni nugo, ka̱ dlo cin, yek da̱mshal yitla lu ka mas, se na̱k cin celti. 45Yek cin zak cilti, yek labule ga̱ lubii ga̱ Nya kesh su dlo ka. 46Yek Yesu wul na̱ nda̱lti ɗe, «Aba gini, ka̱ ang gwaka̱n a zi mbadl gini.» Ta̱ dla̱m nu wugo, yek ta̱ ma̱shi.

47Yek bal ma̱n hapti tlo ga̱ ma̱n Roma gwe ni ka̱li wu yeni nu wugo, yek ta̱ ta̱s Nya, yek ta̱ wule, «Gem, ma̱lga̱n go zok mbala̱n ka̱n.» 48Yek mas ma̱jwe mogaa ta̱s yen ilgwe a pi wu yeni nu wugo, yek sa̱ ɓo ang ten ngetli, yek sa̱ zigaa. 49Yek mas ma̱jwe yis Yesu, suk modli jwe kopti tet Galili wu dla̱l tet dlenti, yek sa̱ ngusi yenti ilgwe na̱ma pa̱t wu.

Lepti ga̱ Yesu

50– 51Ma̱lgon ni ɗa asa̱ mbet ɗe Yusupu ma̱n pa̱lti zok wul gon. Ta̱ na̱ma hwol tuk ten ɓa̱tti ga̱ Nya ta̱s tul ɗe guu ka̱ mbadl ga̱ mbala̱n. Ti wo ma̱n ba̱n ga̱ Yehuda gon ka̱n gwe asa̱ mbe ɗe Arimatiya wu, a bal mbala̱n ga̱ ma̱n Yehuda ka̱ pak. Ama ba̱ta̱ mo bi suksi ten ilgwe sa̱ pa̱li Yesu wu so. 52Yek ta̱ li mal Bilatus yek ta̱ ngemti ta̱s ba̱lti hwuu ga̱ Yesu. Yek ta̱ zakti ta̱s lak kami. 53Yek Yusupu shit hwuunisi sut ɗa̱ ten guda̱l yencimi ka, yek ta̱ kus ka ka̱ mbuni hwol luka̱l yek ta̱ zi ka̱ gaa zukɗi gwe sa̱ tlat ka̱ paa a ba̱sa̱ ɓo lep ma̱lgon giɓi sowu. 54A cin la̱ka̱nti wul ka̱n na̱k ɗe gas shukti ɓal njaa wu.

55Yek modli jwe kop Yesu tet Galili wu li suk Yusupu yek sa̱ yen gaa zukɗisi suk kangwe sa̱ zi hwuu ga̱ Yesu a giɓi wu. 56Yek sa̱ li ga̱za̱n yek sa̱ la̱ka̱n turare suk mil tuksa̱ti, yek sa̱ shuki ten gas shukti na̱k gwe mba̱t ga̱ Musa dla̱m wu.