Luk 20:1-8 | HauSRK | STEP | Wata rana da Yesu yana koyar da mutane, yana musu wa’azin bishara a filin haikalin, sai manyan firistoci da malaman dokoki, tare da dattawan suka zo wurinsa.

‏ Luke 20:1-8

An yi shakkar ikon Yesu

(Mattiyu 21.23-27; Markus 11.27-33)

1 Wata rana da Yesu yana koyar da mutane, yana musu wa’azin bishara a filin haikalin, sai manyan firistoci da malaman dokoki, tare da dattawan suka zo wurinsa. 2 Suka ce masa, “Gaya mana, da wane iko kake yin waɗannan abubuwa. Wa ya ba ka wannan ikon?”

3 Ya amsa ya ce, “Ni ma zan yi muku wata tambaya. Ku faɗa mini, 4 baftismar Yohanna, daga sama ne ta fito, ko kuwa daga wurin mutane ne?”

5 Sai suka yi shawara da junansu, suka ce, “In muka ce, ‘Daga sama ne,’ zai tambaya, ‘To, don me ba ku gaskata shi ba?’ 6 Amma in kuma muka ce, ‘Daga mutane ne,’ dukan mutanen za su jajjefe mu da duwatsu, domin sun tabbata cewa, Yohanna annabi ne.”

7 Don haka, sai suka amsa cewa, “Ba mu san inda ta fito ba.”

8 Yesu ya ce, “To, ni ma ba zan gaya muku, ko da wane iko ne, nake yin waɗannan abubuwa ba.”