Mat 21:1-11 | HilAPD | STEP | Sang malapit na sila ni Jesus sa Jerusalem kag nakaabot na sa baryo sang Betfage, sa Bukid sang mga Olibo, ginpauna ni Jesus ang duha niya ka sumulunod.

Matthew 21:1-11

Ang Madinalag-on nga Pagsulod ni Jesus sa Jerusalem

(Mar. 11:1-11; Luc. 19:28-40; Juan 12:12-19)

1 Sang malapit na sila ni Jesus sa Jerusalem kag nakaabot na sa baryo sang Betfage, sa Bukid sang mga Olibo, ginpauna ni Jesus ang duha niya ka sumulunod. 2 Nagsiling siya sa ila, “Mag-una kamo didto sa sunod nga baryo. Pagsulod ninyo, may makita kamo nga donkey nga nahigot kag ara man ang iya bata. Hubari ninyo kag dal-a diri sa akon. 3 Kon may magpamangkot sa inyo, sabta ninyo, ‘Kinahanglan ini sang Ginoo,’ kag ipadala niya dayon sa inyo.”

4 Ini natabo para matuman ang ginhambal sang propeta:

5 “Sugiri ang mga pumuluyo sang Zion ^{▼▼mga pumuluyo sang Zion: sa Griego, anak nga babayi sang Zion} nga ang ila hari nagaabot na.
Mapainubuson siya, kag nagaabot nga
nagasakay sa bataon nga donkey.” ^b
6 Gani naglakat ang duha ka sumulunod kag gintuman nila ang sugo ni Jesus. 7 Gindala nila ang donkey upod ang bata sini didto kay Jesus. Ginhapinan nila ini sang ila mga panapton kag ginsakyan dayon ni Jesus. 8 Madamo gid nga tawo ang naghumlad sang ila mga panapton sa dalan, kag ang iban nagtapas sang mga sanga sang mga kahoy kag ginladlad ini sa dalan bilang pagpadungog kay Jesus. 9 Nagsinggit ang mga tawo nga nagauna kag ang nagasunod sa iya,

“Dayawon ta ang kaliwat ni David!” ^{▼▼kaliwat ni David: Tan-awa ang footnote sa 9:27.}

“Ginapakamaayo sang Ginoo ang iya pinadala!” ^{▼▼ang iya pinadala: sa literal, ang nagakari sa ngalan sang Ginoo
,} ^e

“Dayawon ta ang Dios!”
10 Sang pagsulod ni Jesus sa Jerusalem naggirinual ang mga tawo didto. Nagsiling sila, “Sin-o bala ang tawo nga ina?” 11 Nagsabat ang mga tawo nga kaupod ni Jesus, “Amo ini ang propeta nga si Jesus nga taga-Nazaret nga sakop sang Galilea.”