Psa 15 | HilAPD | STEP | Ang kanta nga ginsulat ni David. Ginoo , sin-o bala ang puwede nga makatiner sa imo templo? Sin-o bala ang puwede nga makapabilin sa imo balaan nga bukid?

Psalms 15

Ang Gusto sang Dios sa Iya mga Manugsimba

Ang kanta nga ginsulat ni David.

1 Ginoo, sin-o bala ang puwede nga makatiner ^{▼▼makatiner: ukon, makaestar} sa imo templo?
Sin-o bala ang puwede nga makapabilin ^{▼▼makapabilin: ukon, makapuyo} sa imo balaan ^{▼▼balaan: ukon, pinili} nga bukid?

2 Ang sabat sang Ginoo,
“Ang tawo nga nagakabuhi nga wala sing kasawayan
kag nagahimo sing matarong.
Nagahambal siya sing matuod kag sinsero.
3 Wala siya nagabutang-butang sa iban,
kag wala siya nagahimo ukon nagahambal sing malain sa iya isigkatawo.
4 Ginapakawalay pulos niya ang mga tawo nga akon ginasikway
pero ginapadunggan niya ang mga nagatahod sa akon.
Ginatuman gid niya ang iya promisa
bisan ano kabudlay para sa iya.
5 Nagapautang siya sang kuwarta nga wala sing saka,
kag wala siya nagabaton sang lagay
para magsaksi kontra sa wala sing sala.”

Ang tawo nga nagahimo sini mangin mabakod
ang iya kahimtangan hasta san-o.