‏ Exodus 6

1तब यहोवा ह मूसा ला कहिस, “अब तेंह देखबे कि मेंह फिरौन के का करहूं: मोर सक्तिसाली हांथ के कारन ओह इसरायलीमन ला जावन दीही अऊ ओह ओमन ला अपन देस ले भगा दीही।”

2परमेसर ह मूसा ला ये घलो कहिस, “मेंह यहोवा अंव। 3मेंह सर्वसक्तिमान परमेसर के रूप म अब्राहम, इसहाक अऊ याकूब ला दरसन दे हंव, पर अपन नांव यहोवा के दुवारा मेंह अपनआप ला ओमन ऊपर पूरा परगट नइं करेंव। 4मेंह ओमन संग करार घलो करेंव कि ओमन ला कनान देस ला दूहूं, जिहां ओमन परदेसी के रूप म रिहिन। 5अऊ मेंह इसरायलीमन के कलहरई ला सुने हंव, जेमन ले मिसरीमन गुलामी करवात हें, अऊ मेंह अपन करार ला सुरता करे हवंव।

6“एकरसेति इसरायलीमन ले कह: ‘मेंह यहोवा अंव, अऊ मेंह तुमन ला मिसरीमन के गुलामी ले बाहिर निकालहूं। मेंह तुमन ला ओमन के गुलामी ले छोंड़ाहूं, अऊ मेंह अपन बढ़ाय भुजा अऊ बड़े नियाय ▼

▼मिसरीमन ला भयंकर दंड देय के दुवारा

के दुवारा तुमन ला छोंड़ा लूहूं। 7मेंह तुमन ला अपन खुद के मनखे सहीं अपना लूहूं, अऊ मेंह तुम्हर परमेसर होहूं। तब तुमन जान लूहू कि मेंह यहोवा तुम्हर परमेसर अंव, जऊन ह तुमन ला मिसरीमन के गुलामी ले बाहिर निकालिस। 8अऊ मेंह तुमन ला ओ देस म लानहूं, जऊन ला मेंह अब्राहम, इसहाक, अऊ याकूब ला देय बर हांथ उठाके किरिया खाय रहेंव। मेंह ओला तुम्हर अधिकार म कर दूहूं। मेंह यहोवा अंव।’ ”

9मूसा ह इसरायलीमन ला ये बात बताईस, पर अपन निरासा अऊ कठोर मेहनत के कारन ओमन मूसा के बात ला नइं सुनिन।

10तब यहोवा ह मूसा ला कहिस, 11“जा अऊ मिसर के राजा फिरौन ला कह कि ओह इसरायलीमन ला ओकर देस ले बाहिर जावन दे।”

12पर मूसा ह यहोवा ला कहिस, “यदि इसरायलीमन मोर बात ला नइं सुनिन, त फेर फिरौन ह मोर बात ला काबर सुनही, जबकि बात करे म, मेंह हकलाथंव घलो?”

मूसा अऊ हारून के परिवार के बिबरन

13तब यहोवा ह मूसा अऊ हारून ले इसरायली अऊ मिसर के राजा फिरौन के बारे म बात करिस, अऊ ओह ओमन ला हुकूम दीस कि ओमन इसरायलीमन ला मिसर देस ले निकालके ले जावंय।

14येमन अपन परिवारमन ^b के मुखिया रिहिन:

इसरायल के पहिलांत बेटा रूबेन के बेटामन:
हनोक, अऊ पल्लू, हेसरोन अऊ करमी।
येमन रूबेन के गोत्र रिहिन।

15सिमोन के बेटामन:
यमूएल, यामीन, ओहद, याकीन, सोहर अऊ साऊल जऊन ह एक कनानी माईलोगन के बेटा रिहिस।
येमन सिमोन के गोत्र रिहिन।

16ओमन के लिखाय बंसावली के मुताबिक येमन लेवी के बेटा रिहिन:
गेरसोन, कहात अऊ मरारी।
(लेवी ह 137 बछर तक जीईस।) 17गोत्र के मुताबिक गेरसोन के बेटामन:
लिबनी अऊ सिमी।
18कहात के बेटामन:
अमराम, ईसहार, हेबरोन अऊ उजीएल।
(कहात ह 133 बछर तक जीईस।)
19मरारी के बेटामन:
महली अऊ मूसी।
ओमन के अभिलेख के मुताबिक येमन लेवी के गोत्र रिहिन।

20अमराम ह अपन फूफू योकेबेद ले बिहाव करिस, जेकर ले मूसा अऊ हारून पईदा होईन।
(अमराम ह 137 बछर तक जीईस।) 21ईसहार के बेटामन:
कोरह, नेपेग अऊ जिकरी।
22उजीएल के बेटामन:
मिसाएल, एलसाफान अऊ सितरी।
23हारून ह अमीनादाब के बेटी, नहसोन के बहिनी एलीसेबा ले बिहाव करिस, अऊ ओह नादाब, अबीहू, एलिआजर अऊ ईतामार ला जनम दीस।

24कोरह के बेटामन:
अस्सीर, एलकाना अऊ अबीआसाप।
येमन कोरही गोत्र रिहिन।

25हारून के बेटा एलिआजर ह पूतीएल के एक बेटी ले बिहाव करिस, अऊ ओह पीनहास ला जनम दीस।

अपन-अपन कुल के मुताबिक लेवी परिवारमन के मुखिया येमन रिहिन।

26ये हारून अऊ मूसा रिहिन, जेमन ला यहोवा ह हुकूम दे रिहिस, “इसरायलीमन ला ओमन के दल के मुताबिक मिसर देस ले बाहिर निकालके लानव।” 27ये मूसा अऊ हारून रिहिन, जेमन इसरायलीमन ला मिसर देस ले बाहिर लाने बर मिसर के राजा फिरौन ले बात करिन।

हारून ह मूसा बर गोठियाथे

28जब यहोवा ह मिसर देस म मूसा ले गोठियाईस, 29त ओह मूसा ला कहिस, “मेंह यहोवा अंव। जऊन कुछू मेंह तोला कहत हंव, ओ जम्मो बात तेंह मिसर के राजा फिरौन ला बता।”

30पर मूसा ह यहोवा ला कहिस, “देख, मेंह बात करे म हकलाथंव, त फिरौन ह मोर बात ला काबर सुनही?”