‏ Job 37

1“इही बात म मोर हिरदय ह कांपथे
अऊ अपन जगह ले उदकथे।
2सुन! परमेसर के अवाज के गरजन,
ओकर मुहूं ले निकलत गड़गड़ाहट ला सुन।
3ओह अपन बिजली ला जम्मो अकास के खाल्हे जावन देथे
अऊ ओला धरती के छोर तक पठोथे।
4ओकर बाद ओकर गरजन के अवाज आथे;
ओह अपन परतापी अवाज ले गरजथे।
जब ओकर अवाज फेर सुनई देथे,
तब ओह अपन करा कुछू नइं रख छोंड़य।
5परमेसर के अवाज ह अद्भूत रीति ले गरजथे;
ओह हमर समझ ले बाहिर बड़े-बड़े काम करथे।
6ओह बरफ ला हुकूम देथे, ‘धरती म गिर,’
अऊ बारिस के पानी ला हुकूम देथे, ‘जमके बरस,’
7ताकि हर एक मनखे, जऊन ला ओह बनाय हे, ओकर काम ला जानय,
ओह जम्मो मनखे ला ओमन के मेहनत करे ले रोक देथे।
8तब बन के पसुमन अपन गुफा म खुसर जाथें;
ओमन अपन मांद म रहिथें।
9अपन छेत्र ▼

▼याने कि, दक्खिन दिग

ले आंधी,
अऊ तेज बहत हवा ले जाड़ा आथे।
10परमेसर के सांस फूंके ले बरफ बनथे,
अऊ बगरे पानी ह जम जाथे।
11ओह बादरमन ला नमी ले लादथे;
अऊ अपन बिजली ला ओमन के जरिये बगराथे।
12ओकर आदेस म येमन
धरती के चारों कोति ऊपर एती-ओती किंदरथें
अऊ ओकर हुकूम के मुताबिक काम करथें।
13ओह मनखेमन ला दंड देय बर बादर लानथे,
या धरती ऊपर पानी लानके ओह अपन मया देखाथे।

14“हे अयूब, येला सुन;
रूक अऊ परमेसर के अद्भूत काम ऊपर बिचार कर।
15का तें जानथस कि परमेसर ह कइसे बादरमन ला अपन हुकूम ले चलाथे
अऊ अपन बिजली चमकाथे?
16का तेंह जानथस कि बादरमन अधर म कइसे रहिथें,
ओकर ये अचरज के काम के बारे म कोन ला सिद्ध गियान हवय?
17जब दक्खिन के हवा के कारन भुइयां ह सांत रहिथे,
अऊ तेंह अपन कपड़ा के गरमी म बियाकुल रहिथस,
18त का तेंह ओकर संग म अकास-मंडल ला तान सकत हस,
जऊन ह ढरूवा कांसा के दरपन सहीं कठोर होथे?

19“हमन ला बता कि हमन ओला का कहिबो;
हमर अंधियार के कारन, हमन अपन मामला नइं रख सकन।
20का ओला बताय जावय कि मेंह गोठियाय चाहत हंव?
का कोनो मनखे चाहथे कि ओला लील डारे जावय?
21अभी तो सूरज कोति कोनो नइं देख सकंय,
काबरकि हवा ह अकास ला साफ कर दे हे,
अऊ सूरज ह तेज चमकत हे।
22उत्तर कोति ले ओह सोन कस चमकत आथे;
परमेसर ह अद्भूत महिमा म आथे।
23सर्वसक्तिमान ह हमर पहुंच के बाहिर ए अऊ बहुंत सामर्थी ए;
अपन नियाय अऊ बड़े धरमीपन म, ओह अतियाचार नइं करय।
24एकरसेति, मनखेमन ओकर आदर करंय,
काबरकि ओह जम्मो बुद्धिमान मनखेमन के आदर करथे। ▼

▼या काबरकि ओह ओमन के आदर नइं करय, जऊन मन अपनआप ला बुद्धिमान समझथें।

”