‏ Judges 7

गिदोन ह मिदयानीमन ला हराथे

1एक दिन बड़े बिहनियां, यरूब्बाल (गिदोन) अऊ ओकर जम्मो मनखेमन हरोद के सोता करा डेरा डालिन। अऊ मिदयानीमन के डेरा ह ओमन के उत्तर कोति मोरे के पहाड़ी के लकठा म खाड़ी म रिहिस। 2तब यहोवा ह गिदोन ला कहिस, “तोर करा बहुंत जादा मनखे हवंय। मेंह मिदयानीमन ला तोर हांथ म नइं कर सकंव, नइं तो इसरायलीमन ये कहिके मोर बिरूध म अपन बड़ई करहीं, ‘हमन अपन ही ताकत के दुवारा बांचे हवन।’ 3एकरसेति अब तेंह जाके सेना म ये घोसना कर, ‘जऊन ह डर के मारे कांपत हे, ओह गिलाद पहाड़ ला छोंड़के वापिस जा सकत हे।’ ” तब बाईस हजार आदमी लहुंट गीन, अऊ सिरिप दस हजार आदमी रह गीन।

4पर यहोवा ह गिदोन ला कहिस, “अभी घलो बहुंत जादा मनखे हवंय। ओमन ला खाल्हे पानी करा ले जा, अऊ उहां मेंह ओमन ला तोर बर छांटहूं। यदि मेंह कहंव, ‘येह तोर संग जावय,’ त ओह जावय; पर यदि मेंह कहंव, ‘ये तोर संग झन जावय,’ त ओह झन जावय।”

5तब गिदोन ह मनखेमन ला खाल्हे पानी करा ले गीस। उहां यहोवा ह गिदोन ला कहिस, “जऊन मन कुकुर सहीं जीभ ले पानी ला चपड़-चपड़ करके पीयथें, ओमन ला अलग कर; अऊ जऊन मन माड़ी टेकके पानी पीयथें, ओमन ला अलग कर।” 6ओमा ले तीन सौ मनखे हांथ लगाके कुकुर के सहीं चपड़-चपड़ करके पानी पीईन; अऊ बाकि बचे जम्मो झन माड़ी टेकके पानी पीईन।

7तब यहोवा ह गिदोन ला कहिस, “ये तीन सौ चपड़-चपड़ करके पीयइयामन के दुवारा मेंह तुमन ला बचाहूं अऊ मिदयानीमन ला तोर हांथ म कर दूहूं। आने जम्मो झन ला ओमन के घर म पठो दे।” 8तब गिदोन ह बाकि इसरायलीमन ला ओमन के घर पठो दीस, पर ओ तीन सौ मनखेमन ला रखिस, जऊन मन आने मन के जेवन के सामान अऊ तुरहीमन ला अपन अधिकार म ले लीन।

मिदयानीमन के डेरा ह गिदोन के खाल्हे घाटी म रहय। 9ओ रथिया यहोवा ह गिदोन ला हुकूम दीस, “उठ अऊ खाल्हे जाके ओ डेरा के ऊपर हमला कर, काबरकि ओ डेरा ला मेंह तोर हांथ म कर दूहूं। 10यदि तेंह हमला करे बर डरावत हस, त अपन सेवक फूरा के संग खाल्हे डेरा म जा, 11अऊ सुन कि ओमन का कहत हें। ओकर बाद, ओ डेरा ऊपर हमला करे म तोला हिम्मत मिलही।” तब ओह अऊ ओकर सेवक फूरा, खाल्हे डेरा के सैनिक चौकीमन करा उतर गीन। 12मिदयानी, अमालेकी अऊ आने जम्मो पूरबी मनखेमन घाटी म आराम से पड़े रहंय अऊ ओमन फांफामन सहीं बहुंते रहंय। ओमन के ऊंटमन समुंदर तीर के बालू सहीं गनती ले बाहिर रिहिन।

13जब गिदोन ह उहां हबरिस, त उहां एक मनखे ह अपन सपना के बारे म अपन एक संगवारी ला अइसने बतात रहय, “मेंह एक सपना देखेंव; जौ के बने एक गोल रोटी ह उंडलत-उंडलत मिदयानीमन के डेरा म आईस अऊ डेरा ले अइसने जोर से टकराईस कि डेरा ह उलटके गिर गीस।”

14ओकर संगवारी ह जबाब दीस, “येह योआस के बेटा गिदोन नांव के एक इसरायली मनखे के तलवार के छोंड़ अऊ कुछू नो हय। परमेसर ह मिदयानीमन ला अऊ जम्मो डेरा ला ओकर हांथ म कर दे हवय।”

15जब गिदोन ह ओ सपना अऊ ओ सपना के मतलब के बारे म सुनिस, त ओह मुड़ नवाके यहोवा ला दंडवत करिस। ओह इसरायलीमन के डेरा म लहुंटिस अऊ कहिस, “उठव! यहोवा ह मिदयानीमन के डेरा ला तुम्हर हांथ म कर दे हवय।” 16तब ओह ओ तीन सौ मनखे ला तीन ठन दल म बांटिस, अऊ ओमा के हर एक मनखे के हांथ म एक तुरही अऊ खाली घघरी दीस, अऊ घघरीमन के भीतर म एक मसाल रहय।

17तब ओह ओमन ले कहिस, “मोला देखव; अऊ मोर पाछू-पाछू आवव। जब मेंह ओमन के डेरा के तीर म जावंव, अऊ जइसने मेंह करंव, त तुमन घलो वइसने करव। 18जब मेंह अऊ मोर संग के जम्मो झन अपन तुरही ला फूंकंय, तब तुमन घलो डेरा के चारों कोति अपन तुरही ला फूंकव अऊ चिचियाके कहव, ‘यहोवा बर अऊ गिदोन बर।’ ”

19अध-रथिया के सुरूआत म, पहरेदारमन के बदले जाय के तुरते बाद, गिदोन अऊ ओकर संग म सौ झन मनखे मिदयानीमन के डेरा के तीर म हबरिन; अऊ अपन-अपन तुरही ला फूंकिन अऊ अपन हांथ म धरे घघरीमन ला टोर दीन। 20तब तीनों दल के मनखेमन घलो तुरहीमन ला फूंकिन अऊ घघरीमन ला टोर दीन, अऊ अपन-अपन डेरी हांथ म मसाल अऊ जेवनी हांथ म फूंके बर तुरही धरके, ओमन चिचियाके कहिन, “यहोवा बर अऊ गिदोन बर एक तलवार!” 21हर एक मनखे डेरा के चारों कोति अपन-अपन जगह ले लीन, त जम्मो मिदयानीमन रोवत भागे लगिन।

22जब ओमन तीन सौ तुरही ला फूंकिन, त यहोवा ह अइसने करिस कि पूरा डेरा म आदमीमन एक-दूसर के ऊपर तलवार चलाय लगिन, अऊ सेना के मनखेमन सरेरा नगर कोति तब्बात के लकठा म आबेल-महोला नगर के सीमना तक बेत-सित्ता करा भाग गीन। 23नपताली, आसेर अऊ जम्मो मनस्से के इसरायलीमन ला बलाय गे रिहिस, अऊ ओमन मिदयानीमन के पीछा करिन। 24गिदोन ह एपरैम के जम्मो पहाड़ी देस म ये कहे बर दूतमन ला पठोईस, “मिदयानीमन के बिरोध म आवव अऊ यरदन नदी के पानी ला ओमन के पहिले बेत-बारा तक रोक देवव।”

एकरसेति एपरैम के जम्मो आदमीमन आईन अऊ यरदन नदी के पानी ला बेत-बारा तक रोक दीन। 25अऊ ओमन ओरेब अऊ जेब नांव के मिदयानीमन के दू झन अगुवामन ला पकड़ लीन; अऊ ओमन ओरेब ला ओरेब नांव के चट्टान करा अऊ जेब ला जेब नांव के अंगूर के रस निकाले के कुन्ड करा मार डारिन; अऊ ओमन मिदयानीमन के पीछा करिन अऊ ओरेब अऊ जेब के मुड़ ला यरदन के पार गिदोन करा लानिन।