‏ Numbers 22

बालाक ह बिलाम ला बुलवाथे

1तब इसरायलीमन मोआब के मैदान म हबरिन अऊ यरीहो के सामने यरदन नदी के तीर म डेरा डालिन।

2सिप्पोर के बेटा बालाक ह ओ जम्मो ला देखिस, जेला इसरायल ह अमोरीमन संग करे रिहिस, 3अऊ मोआब ह डरा गीस, काबरकि इसरायलीमन बहुंत बड़े संखिया म रिहिन। वास्तव म, मोआब ह इसरायलीमन के कारन भयंकर डरा गीस।

4मोआबीमन मिदयानीमन के अगुवामन ला कहिन, “ये उपदरवी दल ह हमर चारों कोति के जम्मो चीज ला चट कर डारही, जइसे बईला ह खेत के घांस ला चट कर जाथे।”

ओ समय सिप्पोर के बेटा बालाक ह मोआब के राजा रिहिस; 5ओह बेओर के बेटा बिलाम ला बलाय बर संदेसियामन ला भेजिस, जऊन ह फरात नदी के लकठा म अपन जनम भुइयां पतोर सहर म रिहिस। बालाक ह कहिस:

“मिसर ले अब्बड़ मनखेमन आय हवंय; अऊ मोर बाजू म बस गे हवंय ओमन ले पूरा भुइयां ह ढंक गे हवय। 6त तेंह आ अऊ ये मनखेमन ला सराप दे, काबरकि येमन मोर ले बहुंत सक्तिसाली हें। तब सायद में येमन ला हराय सकहूं अऊ देस ले बाहिर भगाय सकहूं। काबरकि मेंह जानत हंव कि जेला तें आसीस देथस, ओह आसीस पाथे, अऊ जेला तें सराप देथस, ओह सरापित हो जाथे।”

7तब मोआब अऊ मिदयान के अगुवामन अगम बिचारे के दाम लेके चल दीन। जब ओमन बिलाम करा हबरिन, त ओला बालाक के कहे बात ला बताईन।

8बिलाम ह ओमन ला कहिस, “आज रथिया इहां रूक जावव, अऊ जऊन बात यहोवा ह मोला कहिही, ओकर मुताबिक मेंह तुमन ला जबाब दूहूं।” त मोआब के अधिकारीमन ओकर संग रूक गीन।

9परमेसर ह बिलाम करा आईस अऊ पुछिस, “तोर संग ये मनखेमन कोन अंय?”

10बिलाम ह परमेसर ला कहिस, “सिप्पोर के बेटा, मोआब के राजा बालाक ह मोला ये संदेस भेजे हवय: 11‘मिसर देस ले निकलके आय मनखेमन के एक दल ले भुइयां ह ढंक गे हवय। अब तें आ अऊ मोर बर ओमन ला सराप दे। तब सायद में ओमन संग लड़ सकहूं अऊ ओमन ला भगाय सकहूं।’ ”

12पर परमेसर ह बिलाम ला कहिस, “ओमन के संग झन जा। तें ओ मनखेमन ला सराप झन दे, काबरकि ओमन मोर आसीसित मनखे अंय।”

13ओकर दूसर दिन बिहनियां बिलाम ह उठके बालाक के अधिकारीमन ला कहिस, “तुमन अपन देस वापिस जावव, काबरकि यहोवा ह मोला तुम्हर संग जाय बर मना करे हवय।”

14तब मोआब के अधिकारीमन बालाक करा लहुंटके कहिन, “बिलाम ह हमर संग आय बर मना कर दीस।”

15तब बालाक ह आने अधिकारीमन ला पठोईस, जऊन मन संखिया म पहिले से अधिक अऊ जादा आदर योग्य रिहिन। 16ओमन बिलाम करा आईन अऊ कहिन:

“सिप्पोर के बेटा बालाक ह ये कहिथे: तोला मोर करा आय ले कोनो चीज झन रोकय, 17काबरकि में तोला बहुंत बढ़िया ईनाम दूहूं अऊ जऊन कुछू तें कहिबे, ओला करहूं। आ मोर बर ये मनखेमन ला सराप दे।”

18पर बिलाम ह ओमन ला जबाब दीस, “अऊ त अऊ यदि बालाक ह अपन महल के जम्मो सोन अऊ चांदी मोला देय दे, तभो ले मेंह यहोवा मोर परमेसर के हुकूम के बाहिर जाके छोटे या बड़े कुछू काम नइं कर सकंव। 19पर तुमन आज रथिया इहां रूकव, ताकि मेंह पता लगा सकंव कि यहोवा ह मोला का कहत हे।”

20रथिया परमेसर ह बिलाम करा आके कहिस, “जब ये मनखेमन तोला ले जाय बर आय हवंय, त ओमन के संग जा, पर सिरिप वइसने ही करबे, जइसने मेंह तोला कहिहूं।”

बिलाम के गदही

21बिलाम ह बिहनियां उठिस, अपन गदही म काठी बांधिस अऊ मोआब के अधिकारीमन संग चल दीस। 22पर परमेसर ह बहुंत गुस्सा होईस, जब बिलाम ह ओमन के संग गीस, अऊ यहोवा के स्वरगदूत ह ओकर बिरोध करे बर सड़क म ठाढ़ हो गीस। बिलाम ह अपन गदही म चघके जावत रिहिस, अऊ दू झन सेवकमन ओकर संग रिहिन। 23जब ओ गदही ह यहोवा के स्वरगदूत ला अपन हांथ म तलवार लिये देखिस, त ओह सड़क ला छोंड़के खेत कोति उतर गीस। तब बिलाम ह गदही ला फेर सड़क म लाने बर ओला मारिस।

24तब यहोवा के स्वरगदूत ह अंगूर के बारीमन के संकरा रसता म ठाढ़ हो गीस, जेकर दूनों कोति दीवार रहय। 25जब गदही ह यहोवा के स्वरगदूत ला देखिस, त ओह दीवार ले संट गीस, जेकर ले बिलाम के गोड़ ह दीवार ले रगड़ा गीस। त ओह फेर गदही ला मारिस।

26तब यहोवा के स्वरगदूत ह आघू बढ़िस अऊ संकरा जगह म ठाढ़ हो गीस, जिहां न तो जेवनी अऊ न ही डेरी कोति हटे के जगह रिहिस। 27जब गदही ह यहोवा के स्वरगदूत ला देखिस, त ओह बिलाम ला लेके बईठ गीस; तब बिलाम ह गुस्सा होईस अऊ गदही ला अपन लउठी ले मारे लगिस। 28तब यहोवा ह गदही के मुहूं ला खोल दीस अऊ गदही ह बिलाम ला कहिस, “मेंह तोर का करे हंव कि तीन बार हो गीस, तेंह मोला मारत हस?”

29त बिलाम ह गदही ला जबाब दीस, “तेंह मोला मुरूख बना दे हस! कहूं मोर हांथ म तलवार होतिस, त अभीच मेंह तोला मार डारतेंव।”

30ओ गदही ह बिलाम ला कहिस, “का मेंह तोर खुद के गदही नो हंव, जेमा तेंह हमेसा आज तक सवारी करत आय हस? का मेंह तोर संग कभू अइसने करे रहंय?”

ओह कहिस, “नइं।”

31तब यहोवा ह बिलाम के आंखी ला खोल दीस, अऊ ओह यहोवा के स्वरगदूत ला तलवार लेके सड़क म खड़े देखिस। तब ओह झुकिस अऊ मुहूं के भार गिरके दंडवत करिस।

32यहोवा के स्वरगदूत ह ओकर ले पुछिस, “तेंह अपन गदही ला ये तीन बार ले काबर मारय? मेंह इहां तोर बिरोध करे बर आय हंव, काबरकि जऊन काम तेंह करत हस, ओह मोर आघू म सही नो हय। 33गदही ह मोला देखिस अऊ तीन बार मोर ले दूरिहा घुंचिस। यदि ओह नइं घुंचे रहितिस, त खचित मेंह अब तक तो तोला मार डारे रहितेंव, पर गदही ला छोंड़ देतेंव।”

34बिलाम ह यहोवा के स्वरगदूत ला कहिस, “मेंह पाप करे हंव। मोला पता नइं रिहिस कि तेंह मोर सामना करे बर सड़क म खड़े हस। यदि तेंह ये बात ले नाखुस हस, त मेंह वापिस चल दूहूं।”

35यहोवा के स्वरगदूत ह बिलाम ला कहिस, “ओ मनखेमन संग जा, पर जऊन बात में बताहूं, ओही बात ला कहिबे।” तब बिलाम ह बालाक के अधिकारीमन संग चल दीस।

36जब बालाक ह सुनिस कि बिलाम ह आवत हे, त ओह बिलाम ले मिले बर अरनोन के सीमना म मोआबी नगर करा गीस, जऊन ह ओकर इलाका के तीर म हवय। 37बालाक ह बिलाम ला कहिस, “का मेंह तोला जरूरी बात बर नइं बलाय रहेंव? तेंह मोर करा काबर नइं आवत रहय? का मेंह तोला आदर देय के लईक नो हंव?”

38बिलाम ह बालाक ला जबाब दीस, “देख, अब तो में तोर करा आ गे हंव, पर मेंह अपन मन से कुछू नइं कहंव। जेला परमेसर मोर मुहूं म डारही, सिरिप ओहीच बात कहिहूं।”

39तब बिलाम ह बालाक के संग किरयत-हुसोत नगर म गीस। 40उहां बालाक ह पसु अऊ भेड़मन के बलि चघाईस, अऊ कुछू भाग बिलाम अऊ अधिकारीमन ला दीस, जेमन ओकर संग रिहिन। 41ओकर दूसर दिन बिहनियां बालाक ह बिलाम ला ऊपर बामोत-बाल करा ले गीस, अऊ उहां ले ओह इसरायलीमन के डेरा के बाहिरी भाग ला देखिस।