1Ch 18 | KaaIBT22C | STEP | Арадан бираз ўақыт өткеннен кейин, Даўыт филистлерди жеңип, оларды бойсындырды. Гат қаласын ҳәм оның дөгерегиндеги аўылларды филистлердиң қолынан тартып алды.

‏ 1 Chronicles 18

Даўыттың жеңислери

1 Арадан бираз ўақыт өткеннен кейин, Даўыт филистлерди жеңип, оларды бойсындырды. Гат қаласын ҳәм оның дөгерегиндеги аўылларды филистлердиң қолынан тартып алды.

2 Соңынан моаб халқын да жеңилиске ушыратты. Олар Даўытқа бағынышлы болып, салық төлейтуғын болды.

3 Және де, Соба патшасы Ҳададезер Евфрат дәрьясы бойлап өз патшалығын бекитиўге барғанда, Даўыт оған Хаматқа дейин шабыўыл жасап, жеңип шықты. 4 Даўыт оның мың саўаш арбасын, жети мың арбалы ҳәм жигирма мың пияда әскерин қолға түсирди. Ол саўаш арбасына жегилетуғын барлық атлардың тирсеклерин кесип майырып, оннан тек жүз атты ғана алып қалды.

5 Даўыт Соба патшасы Ҳададезерге жәрдемге келген Дамаскте жасайтуғын арамлардан жигирма еки мың адамды өлтирди. 6 Соңынан ол Дамасктеги арамлардың жерине өзиниң сақшылар топарын орналастырды. Арамлар да Даўытқа бағынышлы болып, салық төлейтуғын болды. Даўыт қай жерге барса да, Жаратқан Ийе оны жеңиске еристирди.

7 Даўыт Ҳададезердиң сәркәрдалары алып жүрген алтын қалқанларды алып, Ерусалимге әкелди. 8 Және де, ол Ҳададезердиң қол астындағы Тибхат ҳәм Кун қалаларынан көп муғдарда қола алды. Кейин ала, Сулайман буны Үй ушын ҳәўиз, сүтинлер ҳәм ҳәр қыйлы буйымлар ислетиў ушын қолланды.

9 Хамат патшасы Тоў Даўыттың Соба патшасы Ҳададезердиң пүткил әскерлерин жеңип шыққанынан хабар тапты. 10 Сонда Тоў өз улы Ҳадорамды ^{▼▼ Ҳадорам – Иорамның басқа аты. 2Пат 8:10 қараң.} сәлем бериў ҳәм Ҳададезер үстинен ерискен жеңиси менен қутлықлаў ушын Даўыт патшаға жиберди. Себеби Тоў Ҳададезер менен узақ ўақыттан бери урысып киятырған еди. Ҳадорам Даўытқа алтын, гүмис ҳәм қоладан исленген ҳәр түрли саўғалар алып келди. 11 Патша Даўыт бул саўғаларды барлық миллетлерден – эдом, моаб, аммон, филист ҳәм амалек халықларынан алып келген гүмис ҳәм алтын менен бирге Жаратқан Ийеге бағышлады.

12 Серуя улы Абишай Дуз ойпатлығында эдом халқынан он сегиз мың адамды қырғынға ушыратты.

13 Даўыт Эдомға сақшылар топарын орналастырды. Пүткил эдом халқы Даўытқа бағынышлы болды. Даўыт қайда барса да, Жаратқан Ийе оны жеңиске еристирди.

Даўыттың хызметкерлери

14 Даўыт пүткил Израилда патшалық етип, халқына туўры ҳәм әдиллик пенен ҳүкимдарлық етти. 15 Серуя улы Иоаб сәркәрда, Ахилуд улы Еҳошафат дийўанбеги болды. 16 Ахитуб улы Садоқ пенен Абиятар улы Абимелех руўханий, ал Шаўша ^{▼▼ Шаўша – 2Пат 8:17 де Серая делинген.} хаткер еди. 17 Еҳояда улы Беная керетлер менен пелетлерден алынған тән сақшылардың ^{▼▼ Керетлер менен пелетлерден алынған тән сақшылар – шет елден жаллап алынған тән сақшылар болыўы мүмкин.} сәркәрдасы еди. Даўыттың уллары да патшаның бас хызметкерлери болды.