Heb 1 | KaaIBT22C | STEP | Қудай әййемги заманларда пайғамбарлар арқалы көп мәртебе ҳәм ҳәр түрли жоллар менен ата-бабаларымызға сөйлеген еди.

‏ Hebrews 1

Қудай Өз Улы Ийса арқалы сөйледи

1 Қудай әййемги заманларда пайғамбарлар арқалы көп мәртебе ҳәм ҳәр түрли жоллар менен ата-бабаларымызға сөйлеген еди. 2 Ал бул соңғы ўақытларда болса, Қудай бизлерге Өз Улы Ийса арқалы сөйледи. Қудай Өз Улын пүткил барлықтың мийрасхоры етип белгилеп, Ол арқалы пүткил дүньяны жаратқан еди. 3 Қудайдың Улы – Қудайдың салтанатының жарқыраған нуры болып, Ол Қудайдың тәбиятының ҳақыйқаттан қандай екенин көрсетеди. Ул Өзиниң қүдиретли сөзи менен пүткил барлықты сақлап тур. Ол Өзин қурбан етип, бизлерди гүналарымыздан тазалағаннан соң, жоқарыдағы қүдиретли Қудайдың оң жағына отырды.

Ийса периштелерден уллы

4 Қудайдың Улы периштелерден қаншелли жоқары атты алған болса, Ол олардан соншелли үстин турады. 5 Өйткени Қудай периштелердиң қайсы бирине: «Сен Мениң Улымсаң,
Бүгин Мен Саған Әке болдым». ^{▼▼ Заб 2:7.}

Және де: «Мен Оған Әке боламан,
Ол Маған Ул болады», ^{▼▼ 2Пат 7:14.} –

деген еди? 6 Және де, Қудай туңғыш Улын дүньяға жиберип атырып былай деген: «Мениң барлық периштелерим Оған сыйынсын». ^{▼▼ Нзм 32:43; Заб 96:7.}

7 Ал периштелер ҳаққында болса, Мухаддес Жазыў былай дейди: «Қудай Өз периштелерин самалдай,
Хызметшилерин оттың жалынындай қылады». ^{▼▼ Заб 103:4.}

8 Бирақ, Қудайдың Улы ҳаққында Мухаддес Жазыў былай дейди: «Қудай, тахтың мәңги-бақый турар,
Сениң патшалық ҳасаң – әдалат ҳасасыдур.
9 Сен әдилликти сүйип, нызамсызлықты жек көрдиң.
Соның ушын, Қудай, Сениң Қудайың,
Досларыңнан гөре көбирек Сени,
Қуўаныш майы менен майлады». ^{▼▼ Заб 44:7-8.}

10 Және де, былай дейди: «О Ийемиз,
Әўел баста жердиң тийкарын Сен салғансаң.
Көклер Сениң қолларыңның дөретпеси.
11 Олар жоқ болады, ал Сен даўам етесең.
Олардың ҳәммеси де кийимдей тозып қалады.
12 Оларды шапан сыяқлы орап қоясаң,
Олар кийим сыяқлы өзгертиледи.
Бирақ Сен өзгермейсең,
Ҳеш таўысылмайды Сениң жылларың». ^{▼▼ Заб 101:26-28.}

13 Қудай периштелердиң ҳеш бирине де: «Душпанларыңды аяғыңның астына бастырмағанымша,
Мениң оң жағымда отыр», ^{▼▼ Заб 109:1.} –

демеген. 14 Ақыры периштелердиң ҳәммеси қутқарылыўға ийе болатуғынларға хызмет қылыў ушын жиберилген хызметши руўхлар.