Heb 11 | KaaIBT22C | STEP | Исеним – бул үмит етилген нәрселердиң әмелге асатуғынына ҳәм көринбейтуғын затлардың бар екенине гүмансыз исениў.

‏ Hebrews 11

Исеним ҳаққында

1 Исеним – бул үмит етилген нәрселердиң әмелге асатуғынына ҳәм көринбейтуғын затлардың бар екенине гүмансыз исениў. 2 Ата-бабаларымыз усындай исеними себепли, Қудай тәрепинен хошаметленди. 3 Бизлер исенимимиз себепли, дүньяның Қудайдың сөзи менен жаратылғанын түсинемиз. Солай етип, көринбейтуғын нәрселерден көринетуғын нәрселер пайда болған. 4 Исеними себепли, Абыл Қудайға Каиннан гөре жақсырақ қурбанлық берди. Ол исеними себепли ҳақ адам деп саналып, Қудай тәрепинен хошаметленди. Өйткени Қудай оның берген садақаларын қабыл етти ^{▼▼ Жар 4:2-5.}. Абыл өлген болса да, оның исеним менен ислеген иси еле үлги болып келмекте.

5 Исеними себепли, Энох өлим көрмей-ақ жоқарыға алынды. Оны ҳеш ким таба алмады, себеби Қудай оны жоқарыға алған еди. Ол жоқарыға алыныўға дейин оның Қудайға унаған адам екени ҳаққында гүўалық берилди ^{▼▼ Жар 5:24.}. 6 Исеним болмаса, Қудайға унаў мүмкин емес. Өйткени ким де ким Қудайға жақынламақшы болса, Оның бар екенине ҳәм Оның Өзин излегенлерди сыйлықлайтуғынына исениўи тийис.

7 Исеними себепли, Нух еле болмаған нәрселер туўралы Қудай тәрепинен ескертилгенде, Қудайдан қорқып, шаңарағының қутқарылыўы ушын, кеме соқты ^{▼▼ Жар 6:13-22.}. Бул арқалы дүнья ҳүким етилди ҳәм Нух исеними себепли ақланыўға еристи.

8 Ибрайым мүлик етип берилетуғын елге кетиў ушын шақырылғанда, исеними себепли Қудайдың сөзине бойсынып, қай жерге кетип баратырғанын билмесе де, жолға шықты ^{▼▼ Жар 12:1.}. 9 Ибрайым ўәде етилген елге орналасқанда, исеними себепли жат жерли адамдай болып жасады. Өзи менен бирдей ўәдеге шерик болған Ысақ ҳәм Яқып пенен, ол шатырларда өмир кеширди. 10 Себеби ол дөретиўшиси де, қурыўшысы да Қудай болған, беккем тийкарға ийе қаланы күтетуғын еди.

11 Исеними себепли, Сараның нәсилсиз болыўына ҳәм өзиниң жасы өткенине қарамай, Ибрайым әке болыў мүмкиншилигине еристи ^{▼▼ Жар 21:1-2.}. Өйткени ол ўәде еткен Қудайдың садық екенине исенди. 12 Солай етип, бир адамнан, яғный қартайып нәсилсизленип қалған Ибрайымнан аспандағы жулдызлар сыяқлы, теңиз жағасындағы қум сыяқлы есап-сансыз әўладлар пайда болды.

13 Алдын айтылған бул адамлардың ҳәммеси де өмирлериниң ақырына дейин исенимин сақлап қалды. Ўәде етилгенлерди алмаса да, оларды узақтан көрип қуўанды. Олар өзлериниң жер жүзинде жат ҳәм қонақ адамлар екенин ашық мойынлады. 14 Усылай сөйлеген адамлар өз ўатанын излеп жүргенин көрсетеди. 15 Егер олар өзлери таслап кеткен елди ўатаным деп ойлай бергенде, сол жерге қайтып барыўға жол табар еди. 16 Бирақ, олар жердеги ўатаннан да жақсырағын, яғный аспандағы ўатанды әрман ететуғын еди. Сол себептен Қудай олардың Қудайы болыўға арланбайды. Себеби Ол олар ушын бир қала таярлап қойыпты.

17 – 18 Ибрайым сыналғанда ^{▼▼ Жар 22:1-14.}, исеними себепли улы Ысақты қурбанлыққа берди. Қудай Ибрайымға: «Сениң урпағың Ысақ арқалы даўам етеди», ^{▼▼ Жар 21:12.} – деген ўәдени берген болса да, ол жалғыз улын қурбан етпекши болды. 19 Өйткени Ибрайым Қудай өлилерди де тирилте алады, деп ойлады. Астарлап айтқанда, ол Ысақты өлимнен қайтарып алды. 20 Исеними себепли, Ысақ келешекте болатуғын нәрселерди болжап, уллары Яқып ҳәм Эсаўға пәтиясын берди ^{▼▼ Жар 27:1-40.}. 21 Яқып өлеринен алдын исеними себепли, Юсуптиң еки улына бирме-бир пәтиясын берди ҳәм ҳасасының ушына сүйенип, Қудайға сыйынды ^{▼▼ Жар 48:15-16, 20.}. 22 Юсуп өлеринен алдын исеними себепли, Израил балаларының Мысырдан шығатуғынын болжап айтты ҳәм оларға кетеринде өзиниң сүйегин алып кетиўди буйырды ^{▼▼ Жар 50:24-25.}.

23 Муўса туўылғанда, ата-анасы исеними себепли, оны үш ай жасырып қойды. Себеби баланың сулыў екенин көрди ҳәм патшаның пәрманынан қорқпады ^{▼▼ Шығ 2:1-2.}. 24 Муўса ержеткенде, исеними себепли, фараонның ^{▼▼ Фараон – әййемги Мысырда патша усылай аталған.} қызының баласы деп аталыўдан ўаз кешти ^{▼▼ Шығ 2:10-15.}. 25 Ол ўақытша гүнакар өмирдиң кәйип-сапасын сүриўдиң орнына, Қудайдың халқы менен бирге жәбир шегиўди таңлады. 26 Масийх себепли хорланыўды Мысырдың ғәзийнелеринен де уллырақ байлық деп санады. Өйткени ол алажақ сыйын күтетуғын еди. 27 Исеними себепли, ол патшаның қәҳәринен қорқпай, Мысырды таслап кетти ^{▼▼ Шығ 12:31-41.}. Көринбейтуғын Қудайды көргендей, ол мәрт еди. 28 Набыт қылыўшы израиллылардың туңғышларына қол тийгизбесин деп, Муўса исеними себепли, Қутқарылыў байрамын өткериўди ҳәм қанды себиўди буйырды ^{▼▼ Шығ 12:21-23.}.

29 Исеними себепли, израиллылар Қызыл теңизди қурғақ жерден өткендей кесип өтти. Мысырлылар да усылай ислемекши болып ҳәрекет еткенде, суўға батып кетти ^{▼▼ Шығ 14:28-29.}.

30 Исеними себепли, израиллылар Ерихо қаласының әтирапын жети күн айланғанда, қала дийўаллары қулады ^{▼▼ Ешу 6:19.}.

31 Сонда исеними себепли, бузық ҳаял Рахаб та Қудайға бойсынбайтуғын адамлар менен бирге өлтирилмеди. Себеби ол жансызларды жыллы жүзлилик пенен қабыл алған еди ^{▼▼ Ешу 6:21-24.}.

32 Және не айтайын? Гидеон, Барақ, Самсон, Ифтах, Даўыт, Самуел ҳәм барлық пайғамбарлар ҳаққында айтып отырыў ушын ўақтым жетпейди. 33 Исеними себепли, олар патшалықларды жеңди, әдиллик орнатты, ўәде етилген нәрселерди алды ҳәм арысланлардың аўызларын тосып қойды. 34 Лаўлаған отты сөндирди, қылыш жүзинен қашып қутылды. Ҳәлсирегенде Қудайдан күш алды, саўашта қүдиретли болды ҳәм жаў әскерлерин қыйратты. 35 Исеними себепли, ҳаяллар өз марҳумларын тирилген ҳалда қайтарып алды. Ал айырымлары еле де жақсырақ тирилиўге ерисиў ушын, азатлықтан ўаз кешти ҳәм азапланып өлтирилди. 36 Және гейбиреўлери масқараланып, қамшы жеди, ҳәтте, шынжырлар менен байланып, қамаққа салынды. 37 Тас боран қылынды, пышқы менен кесилип екиге бөлинди, қылыштан өткерилип өлтирилди. Қой ҳәм ешкиниң терилерин жамылып, сергиздан болып жүрди, жоқшылықта жасады, қыйыншылықларға ушырады ҳәм хорлық көрди. 38 Дүнья бул адамларға ылайық емес еди! Олар шөллерди, таўларды, үңгирлерди ҳәм төлелерди гезип себил болды.

39 Олардың ҳәммеси де исеними себепли Қудай тәрепинен хошаметленген болса да, ўәде етилгенди алмады. 40 Өйткени олар бизлер менен бирге минсизликке ерисиўи ушын, Қудай бизлерге буннан да жақсырақ нәрсени таярлап қойыпты.