Isa 12 | KaaIBT22C | STEP | Сол күни сен былай дейсең: «Жаратқан Ийе! Сени алғыслайман. Сен маған ғәзеплендиң, Бирақ Өз ғәзебиңди басып, Мени жубаттың.

‏ Isaiah 12

Алғыс-мақтаў қосығы

1 Сол күни сен былай дейсең: «Жаратқан Ийе! Сени алғыслайман.
Сен маған ғәзеплендиң,
Бирақ Өз ғәзебиңди басып,
Мени жубаттың.
2 Ҳақыйқаттан да, Қудай мениң қутқарыўшым,
Оған үмит байлайман, енди қорқпайман,
Себеби Жаратқан Ийе болған Қудай мениң күш-қүдиретим,
Ол мени қутқарыўға келди».

3 Қутқарылыў булақларынан қуўаныш пенен суў аласызлар.
4 Сол күни былай дейсизлер:
«Жаратқан Ийеге миннетдаршылық билдирип,
Оның атын айтып шақырыңлар,
Халықларға Оның ислерин билдирип,
Атының уллылығын жәриялаңлар.
5 Жаратқан Ийеге саз шертип, алғыс айтыңлар,
Себеби Ол уллы ислер иследи,
Буны пүткил дүнья билсин!
6 Қуўаныштан қышқыр Сион халқы, шадланып бақыр,
Өйткени араңыздағы Израилдың Мухаддеси уллы!»