Isa 4 | KaaIBT22C | STEP | Сол күни жети ҳаял бир еркекке жабысып, оған: «Бизлер өз нанымызды жеп, өз кийимимизди кийемиз, Бизлерди өз некеңе алып, Шерменделиктен қутқарсаң болғаны»,

‏ Isaiah 4

1 Сол күни жети ҳаял бир еркекке жабысып, оған:
«Бизлер өз нанымызды жеп, өз кийимимизди кийемиз,
Бизлерди өз некеңе алып,
Шерменделиктен қутқарсаң болғаны», – дейди.

Ерусалимниң келешеги

2 Сол күни Жаратқан Ийе отырғызған нәл гөззал ҳәм салтанатлы болады. Жердиң мийўеси де Израилдың аман қалғанларына мақтаныш ҳәм даңқ болады. 3 Сионда қалғанлар, Ерусалимде аман қалғанлар – Ерусалимде тири қалыў тәғдирине жазылған ҳәр бир адам «мухаддес» деп аталады. 4 Ийемиз Сион қызларының напәклигин жуўып таслағанда, Ерусалимде төгилген қанды да ҳүким руўхы ҳәм от руўхы менен тазалайды. 5 Соңынан Жаратқан Ийе Сион таўының ҳәмме тәрепиниң үстине ҳәм ол жерге жыйналғанлардың үстине күндиз булт ҳәм түтин, түнде жалынлаған оттың жақтысын жаратады. Пүткил салтанат үсти қапланған болып, 6 ол күндизги ыссыда шатыр, даўыл менен жаўында пана ҳәм қорғаныш болады.