Mat 21:12-17 | KaaIBT22C | STEP | Ийса Ибадатханаға кирип, ол жерден сатыўшылар менен алыўшылардың ҳәммесин қуўып шығарды да, ақша алмастырыўшылардың столларын, кептер сатыўшылардың отырғышларын аўдарып таслап,

‏ Matthew 21:12-17

Ийсаның Ибадатханадан сатыўшыларды қуўыўы

(Мрк 11:15-19; Лук 19:45-48; Юхн 2:13-22)

12 Ийса Ибадатханаға кирип, ол жерден сатыўшылар менен алыўшылардың ҳәммесин қуўып шығарды да, ақша алмастырыўшылардың столларын, кептер сатыўшылардың отырғышларын аўдарып таслап, 13 оларға:

– «Мениң Үйим дуўа ететуғын үй деп аталады» ^{▼▼ Ийш 56:7.}, – деп Мухаддес Жазыўда жазылған, ал сизлер оны қарақшылардың уясына айландырдыңлар! ^{▼▼ Ерм 7:11.} – деди.

14 Ибадатханада Ийсаның қасына соқырлар ҳәм ақсақлар келгенде, Ол оларға шыпа берди. 15 Бас руўханийлер ҳәм диний муғаллимлер Ол ислеген кәраматларды ҳәм Ибадатханада: «Даўыттың Урпағына ҳосанна!» – деп бақырысқан балаларды көрип, ашыўланып қалды да, 16 Оған:

– Олардың не деп атырғанын еситип турсаң ба? – деди.

Ийса оларға:

– Аўа! Сизлер: «Нәрестелер ҳәм емизиўли балалардың аўзынан, Өзиңе мақтаўлар айтқыздың» ^{▼▼ Заб 8:3.}, – деп Мухаддес Жазыўда айтылғанды ҳеш оқымағансызлар ма? – деди.

17 Соннан соң, Ийса оларды қалдырып, қаладан шығып кетти ҳәм Бетанияға барып, сол жерде түнеди.