‏ Proverbs 15

1Мүләйим жуўап ашыўды басар,
Ашшы сөз ғәзепти қозғар.
2Дананың тили билимди мақтар,
Ақылсыздың аўзынан ақмақлық ағар.
3Жаратқан Ийениң көзи ҳәмме жерде,
Ол жаманды да, жақсыны да көрип турар.
4Мүләйим тил – өмир тереги,
Өтирикши тил – жанды жаралар.
5Ақмақ әкесиниң тәрбиясынан безер,
Ескертиўге қулақ асқан ақыл-парасатлы.
6Әдилдиң үйинде мол ғәзийне болар,
Залымның тапқаны машқала алып келер.
7Дананың аўзы билим таратар,
Ақмақтың жүреги ондай емес.
8Наҳақтың қурбанлығынан Жаратқан Ийе жеркенер,
Ҳақ адамның дуўасы Оған унар.
9Залымның жолынан Жаратқан Ийе жеркенер,
Әдиллик изинен жүргенди Ол сүйер.
10Туўры жолдан адасқанлар аўыр жаза алар,
Ескертиўди жек көргенлер набыт болар.
11Өлилер мәканы ҳәм набыт болыў мәканы Жаратқан Ийеге аян екен,
Демек, адам баласының жүреги Оған олардан да аянырақ!
12Сурбет өзин әшкаралағанды унатпас,
Ол дананың қасына да жоламас.
13Жүректиң қуўанышы жүзди жарқыратар,
Жүректиң қайғысы руўхты сөндирер.
14Ақыллының жүреги билимди излер,
Ақылсыздың аўзы ақмақлыққа тойынар.
15Бахытсыздың ҳәр бир күни қайғыдан арылмас,
Жүреги қуўанышлының зыяпаты ада болмас.
16Көп байлық пенен тәшиўиште жасағаннан гөре,
Аз байлық пенен Жаратқан Ийеден қорқып жасаған абзалырақ.
17Жек көрип берилген семиз баспақ гөшинен гөре,
Сүйиспеншилик пенен берилген быламық жақсырақ.
18Ашыўшақ жәнжел туўдырар,
Сабыр-тақатлы даўды басар.
19Ериншектиң жолы шатлы тикенге уқсар,
Ҳақ адамның жолы тегис болар.
20Дана бала әкесин қуўантар,
Ақмақ бала анасын писент етпес.
21Ақмақлық ақылсызды қуўандырар,
Ақыллы адам туўры жолдан жүрер.
22Кеңеспей исленген ис босқа шығар,
Көп мәсләҳәтшиниң ой-нийети иске асар.
23Орынлы жуўап адамды қуўантар,
Өз ўақтында айтылған сөз әжайып болар!
24Төмендеги өлилер мәканына түспеўи ушын,
Ақыллыны өмир жолы жоқарыға жетелер.
25Жаратқан Ийе тәкаббирдиң үйин қулатар,
Жесирдиң жер шегарасын сақлап қалар.
26Залымлардың нийетлери Жаратқан Ийеге жеркенишли,
Жақсы сөзлер – пәк.
27Ҳарам табысқа қумар өз үйине апат келтирер,
Параны жек көрген тыныш өмир сүрер.
28Әдил ойлап жуўап берер,
Залымның аўзы жаўызлық қусар.
29Жаратқан Ийе залымлардан алыс болар,
Әдиллердиң дуўасын еситер.
30Нурлы жүз жүректи қуўантар,
Жақсы хабар сүйекке азық берер.
31Өмир беретуғын нәсиятқа қулақ салған,
Даналар арасынан орын табар.
32Нәсияттан жүз бурған өз жанын хор қылар,
Ескертиўге қулақ салған ақылға ийе болар.
33Жаратқан Ийеден қорқыў даналыққа үйретер,
Кишипейиллик даңққа баслар.