Rev 15 | KaaIBT22C | STEP | Мен аспанда және уллы ҳәм таң қаларлық басқа бир белги көрдим. Бул – қолына соңғы жети бәлени услаған жети периште еди. Өйткени усы бәлелер менен Қудайдың ғәзеби жуўмақланатуғын еди.

‏ Revelation of John 15

Жети периште ҳәм жети бәле

1 Мен аспанда және уллы ҳәм таң қаларлық басқа бир белги көрдим. Бул – қолына соңғы жети бәлени услаған жети периште еди. Өйткени усы бәлелер менен Қудайдың ғәзеби жуўмақланатуғын еди.

2 Сонда от аралас шийше теңиз сыяқлы бир нәрсени көрдим. Ҳайўанның, оның мүсининиң ҳәм атының саны үстинен жеңиске ерискенлер қолларына Қудайдың берген арфаларын алып, шийше теңиздиң үстинде турған еди. 3 Олар Қудайдың хызметшиси Муўсаның ҳәм Қозының қосығын айтып турған еди: «Қүдирети күшли Қудай Жаратқан Ийе,
Сениң ислериң уллы ҳәм әжайып,
О, миллетлер Патшасы ^{▼▼ миллетлер Патшасы – Базы қолжазбаларда «әўладлардың Патшасы».}!
Сениң жолларың ҳақыйқат ҳәм әдил.
4 Жаратқан Ийе, Сеннен қорқпайтуғын,
Атыңды алғысламайтуғын ким бар?
Себеби тек жалғыз Сен ғана мухаддессең.
Пүткил миллетлер келип,
Сениң алдыңда табынады.
Өйткени Сениң әдил ислериң аян болды».

5 Буннан соң аспандағы Ибадатхананың, яғный Келисим шатырының ^{▼▼ Келисим шатыры – сөзликтеги «Мухаддес шатыр» ға қараң.} ашылғанын көрдим. 6 Қолында жети бәле бар жети периште жарқыраған аппақ зығыр кийим кийип, көкиреклерине алтын өңирше байлап, Ибадатханадан шықты. 7 Төрт мақлуқтың бири жети периштеге мәңги-бақый жасайтуғын Қудайдың қәҳәрли ғәзебине толы жети алтын кесе берди. 8 Ибадатхана Қудайдың уллылығының ҳәм қүдиретиниң түтини менен толып кетти. Жети периштениң жети бәлеси тамамланбағанша, ҳеш ким Ибадатханаға кире алмады.